ជន​រង​គ្រោះ​ក្នុង​ជម្លោះ​ដី​ធ្លី​អំពាវនាវ​ឲ្យ​បញ្ឈប់​ការ​បណ្ដេញ​ពលរដ្ឋ​ចេញ​ពី​ដី​ធ្លី

ប្រជាជន​ប្រមាណ​១៥០​នាក់​មក​ពី​សហគមន៍​រង​ជម្លោះ​ដី​ធ្លី ដែល​បាន​ចេញ​និង​ត្រៀម​ឲ្យ​ចេញ​ពី​ផ្ទះ មក​ជួប​ជុំ​គ្នា​នៅ​កន្លែង​អតីត​ដើមពោធិ៍ ភូមិ​ដី​ក្រហម សង្កាត់​ទន្លេ​បាសាក់ ក្រុង​ភ្នំពេញ ក្នុង​ថ្ងៃ​ទិវា​នារី​អន្តរជាតិ ៨ មីនា ឆ្នាំ​២០០៩ លើក​ទី​៩៩ ដើម្បី​ប្រារព្ធ​ពិធី​បុណ្យ​បញ្ឈប់​ការ​បណ្តេញ​ពលរដ្ឋ​ពី​ផ្ទះ​សម្បែង។

0:00 / 0:00

ស្រ្តី​តំណាង​សហគមន៍​ដី​ក្រហម បាន​និយាយ​ថា ស្រ្តី​និង​កុមារ​កំពុង​ឈឺ​ចាប់​ក្រោម​អំពើ​បង្ខំ​ឲ្យ​ចេញ​ពី​ផ្ទះ​ទាំង​ព្រលឹម នា​ថ្ងៃ​ទី​២៤ ខែ​មករា ឆ្នាំ​២០០៩ ៖ «ម្ចាស់​ទឹក​ម្ចាស់​ដី​នៅ​ដី​ក្រហម​នេះ សូម​កុំ​ឲ្យ​ពួក​រំលោភ​បំពាន​យក​ដី​ប្រជាពលរដ្ឋ​នៅ​ដី​ក្រហម​នេះ​ធ្វើ​អ្វី​បាន​ទាំង​អស់ សូម​ឲ្យ​រលាយ​សាប​សូន្យ​ឆាប់ៗ​ទាន់​ហន់ ងាប់​ទាំង​កូន ទាំង​ប្រពន្ធ ទាំង​ចៅ ទាំង​ពូជ ទាំង​អម្បូរ​វា​ទាំង​អស់ ចំពោះ​អ្នក​ដែល​រំលោភ​យក​ដី​ធ្លី​នៅ​ដី​ក្រហម​នេះ»

ស្រ្តី​តំណាង​គ្រួសារ​ដែល​ត្រៀម​ឲ្យ​ចាក​ចេញ​ពី​តំបន់​បឹង​កក់ បន្ថែម​ថា សុំ​បួង​សួង​កុំ​ឲ្យ​កើត​មាន​អំពើ​បណ្តេញ​ពី​ផ្ទះ ដូច​សហគមន៍​ដី​ក្រហម ៖ «ខ្ញុំ​ថា ទាំង​អស់​គ្នា​ដែល​ជា​នារី បើ​សិន​ជា​មាន​ការ​បណ្ដេញ​ចេញ​ដូច​នៅ​ដី​ក្រហម​អ៊ីចឹង ពួក​ខ្ញុំ​នឹង​មាន​ទុក្ខ​វេទនា ពីព្រោះ​ពួក​ខ្ញុំ​នារី​ទទួល​បន្ទុក​ធ្ងន់​បំផុត ពីព្រោះ​អនាគត​ពួក​ខ្ញុំ​នឹង​ប្រឈម​មុខ​ដូច​ពួក​គេ​អ៊ីចឹង»

បុរស​ម្នាក់​មក​ពី​សហគមន៍​បឹងកក់ មាន​ប្រសាសន៍​ថា ៖ «គោល​បំណង​ចង់​បាន​សិទ្ធិ​សេរីភាព និង​ការ​តស៊ូ​មតិ​ដើម្បី​កុំ​ឲ្យ​បណ្ដេញ​ចេញ​ដូច​ដី​ក្រហម កុំ​ឲ្យ​មាន​អំពើ​ហិង្សា​អ៊ីចឹង​ទៀត»

តំណាង​ក្រុម​៧៨ អះអាង​ថា អ្នក​ត្រូវការ​យក​ដី​ក្រោម​លេស​អភិវឌ្ឍន៍​និង​សាលាក្រុង​ប្រើ​អំណាច​បង្ខំ​មនុស្ស​ឲ្យ​ចាក​ចេញ​ពី​ដី​ដោយ​គ្មាន​ការ​ចរចា បាន​បង្ក​ភាព​ឈឺ​ចាប់​ដល់​ប្រជាជន​ទាំង​ក្មេង​ទាំង​ចាស់ ៖ «ចង់​យក​ប្រជាជន​ចេញ​ពី​ទីក្រុង​ត្រូវ​ដោះស្រាយ​ជា​លុយ​កាក់​មុន រួច​ហើយ​សឹម​យក​ប្រជាជន​ចេញ កុំ​ធ្វើ​ដូច​នៅ​ដី​ក្រហម សម្បុក​ចាប​ហ្នឹង ប្រជាជន​នៅ​ក្រោយៗ​មិន​ទទួល​យក​បាន​ទេ»

តំណាង​សហគមន៍​មក​ពី​ខេត្ត​នានា អះអាង​ថា ការ​អភិវឌ្ឍ​ដែល​​គ្មាន​ការ​ចរចា​ផ្តល់​សំណង​សមរម្យ ធ្វើ​ឲ្យ​កើន​ឡើង​វិញ​នូវ​ភាព​ក្រីក្រ​និង​ធ្វើ​ឲ្យ​ព្រៃ​ឈើ មច្ឆជាតិ និង​បរិស្ថាន កាន់​តែ​វិនាស​ទៅ។

តំណាង​ក្រុម​អង្គការ​ក្រៅ​រដ្ឋាភិបាល ដែល​ឃ្លាំ​មើល​សកម្មភាព​ក្រុម​អ្នក​មាន​ជម្លោះ​ដី​ធ្លី ក្រោម​ការ​អភិវឌ្ឍ​របស់​រដ្ឋាភិបាល កំពុង​ប្រារព្ធ​ពិធី​នោះ លោក វ៉ាន់ សុផាត ឲ្យ​ដឹង​ថា អ្នក​មក​ចូល​រួម​នេះ ប្រមាណ​១៥០​នាក់ មក​ពី​សហគមន៍​ដី​ក្រហម សហគមន៍​ភ្នំពេញ​ថ្មី សហគមន៍​បឹងកក់ សហគមន៍​សំបុក​ចាប និង​សហគមន៍​នានា​ក្នុង​ប្រទេស​កម្ពុជា ដែល​ពួក​គេ​សុទ្ធ​តែ​ជា​អ្នក​រង​នូវ​អំពើ​បណ្តេញ​ពី​ផ្ទះ​និង​ត្រៀម​បង្ខំ​ចេញ​ពី​ផ្ទះ ដោយ​មិន​បាន​ទទួល​សំណង​សមរម្យ។ ពួក​គេ​មក​សុំ​ឲ្យ​រដ្ឋាភិបាល​កម្ពុជា​គោរព​ច្បាប់​ភូមិ​បាល ឆ្នាំ​២០០១ ដែល​ចែង​អំពី​សិទ្ធ​មាន​លំនៅ​ឋាន​របស់​ប្រជា​ពលរដ្ឋ។

បន្ទាប់​ពី​ព្រះសង្ឃ ៥​អង្គ សូត្រ​ធម៌​ប្រោះ​ព្រំ​ទឹក​មន្ត​រួច​មក ការ​បង្ហោះ​ប៉េង​ប៉ោង​ចង​ពាក្យ​ស្លោក​ថា បញ្ឈប់​ការ​បណ្តេញ​ចេញ​គឺ​លើក​ស្ទួយ​សិទ្ធិ​ស្រ្តី លំនៅ​ឋាន​សមរម្យ​ជា​សេចក្តី​ត្រូវការ​ចាំបាច់​របស់​ស្រ្តី លើក​ស្ទួយ​សិទ្ធិ​ស្រ្តី​គឺ​លើក​ស្ទួយ​ប្រទេស​ជាតិ ត្រូវ​បាន​ធ្វើ​ឡើង។

ក្នុង​ពិធី​បុណ្យ​ក្រៅ​របង​ក្រុមហ៊ុន7NG គ្មាន​ការ​បង្រ្កាប​ពី​ក្រុមហ៊ុន ក៍​ដូចជា​ប៉ូលិស​មូលដ្ឋាន​ក្នុង​ថ្ងៃ​ប្រារព្ធ​ពិធី​បុណ្យ​របស់​ក្រុម​អ្នក​ស្រុក​ដែល​មាន​រឿង​ជម្លោះ​ដីធ្លី​នោះ​ទេ៕