លោក ម៉ង់ ពុទ្ធី ប្រធានសមាគមប្រជាធិបតេយ្យ ឯករាជ្យ សេដ្ឋកិច្ចក្រៅប្រព័ន្ធ ប្រចាំនៅក្នុងខេត្តបន្ទាយមានជ័យ ជាប់ព្រំដែនកម្ពុជា-ថៃ បានមានប្រសាសន៍ថា គ្រួសារខែ្មរកម្ពុជាក្រោមទាំង ២៤នាក់នោះមានសុវត្ថិភាពជាធម្មតាទេ ប៉ុន្តែការហូបចុកគឺពួកគាត់ពឹងផ្អែកដោយខ្លួនឯង។
លោក ម៉ង៉ ពុទ្ធី បញ្ជាក់ថា ៖ «បងប្អូនកម្ពុជាក្រោមគាត់នៅទីនេះ គាត់មានជីវភាពធូរធារ គាត់ជួយឧបត្ថម្ភខ្លះដែរណា! យើងជាអ្នកផ្តល់កន្លែងឲ្យស្នាក់នៅ»។
នាយរងប៉ុស្តិ៍នគរបាលប៉ោយប៉ែត ខេត្តបន្ទាយមានជ័យ លោក តឹក យ៉ាឌី ដែលបានទទួលគ្រួសារទាំងនោះពីភាគីថៃថ្មីៗនេះ បានមានប្រសាសន៍ថា ៖ «មិនថាកម្ពុជាក្រោម ឬកម្ពុជាលើអីទេ ឲ្យតែឃើញកម្ពុជា យើងទទួលហើយអប់រំ។ បានថៃបញ្ជូនមកអ៊ីចឹងរួចទុក្ខទោសហើយ។ យើងអត់មានធ្វើអីគេទេ គឺយើងឲ្យគេចេញប្រញាប់ទៅផ្ទះតែម្តង»។
ខែ្មរកម្ពុជាក្រោមម្នាក់នៅក្នុងចំណោមគ្រួសារខែ្មរកម្ពុជាក្រោម ២៤នាក់ ឈ្មោះ ចៅ ហេន ដែលកំពុងតែរស់នៅបណ្តោះអាសន្នក្រោមកិច្ចគ្រប់គ្រងដោយអង្គការក្រៅរដ្ឋាភិបាលខាងលើនេះនៅប៉ោយប៉ែត ខេត្តបន្ទាយមានជ័យ បានថែ្លងប្រាប់វិទ្យុអាស៊ីសេរីថា ៖ «សុំអំពាវនាវដល់អាជ្ញាធរប្រទេសកម្ពុជាយើងដើម្បីជួយអន្តរាគមន៍ផ្តល់សិទ្ធិជ្រកកោនអ្វីមួយដែលស្របច្បាប់លើពលរដ្ឋរបស់ខ្មែរ ហើយដោយមានការរស់នៅពឹងពាក់អាស្រ័យប្រចាំថ្ងៃ»។
នៅមិនទាន់មានការបញ្ជាក់ជាផ្លូវការណាមួយនៅទ្បើយទេពីមន្រ្តីក្រសួងមហាផៃ្ទ ឬក្រសួងការបរទេសកម្ពុជា អំពីជោគវាសនានៃគ្រួសារខែ្មរកម្ពុជាក្រោម ២៤នាក់នោះ។
លោក ថាច់ ឈួនយ៉ាត ប្រធានអង្គភាពស៊ើបអង្កេតសមាគមការពារសិទ្ធិមនុស្សខែ្មរកម្ពុជាក្រោមនៅ ក្នុងប្រទេសកម្ពុជា ដែលកំពុងតែតាមដានករណីខាងលើនេះ បានមានប្រសាសន៍ថា ៖ «ខ្ញុំព្រួយបារម្ភខ្លាំងណាស់ត្រង់ថា ទី១ គាត់អត់មានទីជម្រកមិនដឹងគាត់ទៅនៅឯណា! មួយទៀត បើអាជ្ញាធររបស់កម្ពុជាយើងហ្នឹងមានការចាត់វិធានការឲ្យស្នាក់នៅប្រទេសកម្ពុជានេះជាការល្អមួយ ហើយប្រហែលជាគាត់នៅហើយមិនទៅណាទេ។ ប៉ុន្តែបើសិនណាមានការចាប់បញ្ជូនទៅវៀតណាមវិញនោះ គឺគ្រោះថ្នាក់ណាស់ ព្រោះពួកគាត់មកហ្នឹងព្រោះមានបញ្ហាតវ៉ារឿងដីធ្លីជាមួយវៀតណាម»។
គ្រួសារខែ្មរកម្ពុជាក្រោមចំនួន ២៤នាក់ខាងលើនេះ បានរត់គេចខ្លួនពីខេត្តអានយ៉ាង ទឹកដីខែ្មរកម្ពុជាក្រោម ដែលកំពុងកាន់កាប់ដោយវៀតណាម កាលពីឆ្នាំ២០០៨កន្លងទៅ ទៅកាន់ប្រទេសថៃ ដើម្បីសុំសិទ្ធិជ្រកកោននៅប្រទេសទី៣ ក្រោយពីអាជ្ញាធរវៀតណាមបានតាមចាប់ខ្លួន ដោយសារតែពួកគាត់ទាំងនោះបានងើបតវ៉ាទាមទារដីធ្លីពីដូនតាមកវិញ កាលពីឆ្នាំ២០០៧កន្លងទៅ។ ក្រោយមកពួកគាត់ត្រូវបានអាជ្ញាធរថៃចាប់បញ្ជូនពីប្រទេសថៃមកប្រទេសកម្ពុជា តាមច្រកព្រំដែនប៉ោយប៉ែត ខេត្តបន្ទាយមានជ័យ កាលពីថៃ្ងសៅរ៍ ចុងសប្តាហ៍កន្លងទៅថ្មីៗនេះប្រគល់ឲ្យអាជ្ញាធរកម្ពុជា៕