រយៈពេល១២ឆ្នាំមកហើយតាំងពីមានការបោកគ្រាប់បែកនៅមុខមន្ទីររដ្ឋសភាកាលពីឆ្នាំ១៩៩៧ ទៅលើហ្វូងបាតុកម្មដែលដឹកនាំដោយមេបក្សប្រឆាំងលោក សម រង្ស៊ី រហូតមកដល់ពេលនេះ ឃាតករនិងអ្នកនៅខាងក្រោយខ្នងនៃអំពើនោះមិនទាន់ត្រូវបានគេវែកមុខឃើញនៅឡើយទេ។
ប្រភពពីកាសែតឌឹ ខេមបូឌា ដេលី បានចេញរបាយការណ៍មួយជាចំហរបស់ការិយាល័យសហព័ន្ធស៊ើបអង្កេត FBI ក្រោយពីបានស្រាវជ្រាវទាក់ទងទៅនឹងអំពើបោកគ្រាប់បែកនៅក្នុងឆ្នាំ១៩៩៧ ទៅលើបាតុករក្រុមអ្នកប្រឆាំង។
តំណាងរាស្ត្រនិងជាអ្នកនាំពាក្យគណបក្សប្រឆាំងសមរង្ស៊ី លោក យឹម សុវណ្ណ បានថ្លែងថា ១២ឆ្នាំមកហើយដែលក្រុមអ្នករងគ្រោះបានរង់ចាំមើលយុត្តិធម៌ ប៉ុន្តែវាហាក់ដូចជាស្ងាត់ទៅៗ។ លោកបន្ទោសអំពីការព្រងើយកន្តើយរបស់រដ្ឋាភិបាល។ ប៉ុន្តែលោកបញ្ជាក់ថា ក្រុមអ្នកប្រឆាំងនៅតែបន្តទាមទារយុត្តិធម៌។
លោក យឹម សុវណ្ណ ថ្លែងថា ៖ «១២ឆ្នាំមកហើយដែលយើងរង់ចាំយុត្តិធម៌។ កន្លងមកហ្នឹង គឺថាក្រសួងមហាផ្ទៃអាចធ្វើអ្វីៗបាន ឲ្យអ្វីដែលគេចង់គឺគេអាចធ្វើបាន ប៉ុន្តែខ្ញុំមិនដឹងក្នុងករណីនេះហេតុអ្វីមិនអាចធ្វើបាន? ដូចករណី ហេង ពៅ ទៅដល់ម៉ាឡេស៊ីហើយនៅតែគេអាចចាប់មកកាត់ទោសនៅស្រុកខ្មែបាន តែខ្ញុំឆ្ងល់ករណីនេះហេតុអីគេចាប់មិនបាន?»។
កាលពីខែមីនា ឆ្នាំ១៩៩៧ លោក សម រង្ស៊ី ដែលកាលនោះលោកជាប្រធានគណបក្សជាតិខ្មែរ បានដឹកបាតុកម្មមួយប្រឆាំងនឹងលទ្ធផលបោះឆ្នោត និងទាមទារឲ្យមានការកែប្រែប្រព័ន្ធតុលាការ ដោយមានមនុស្សរាប់រយនាក់ចូលរួម។
នៅអំឡុងពេលនៃការតវ៉ាទាមទារនៅមុខមន្ទីររដ្ឋសភាចាស់ ដែលមានទីតាំងនៅលើផ្លូវសុធារស ទល់មុខសួនច្បាវត្តបទុមវត្តី គ្រាប់បែកចំនួន៤គ្រាប់ត្រូវបានគេគប់ចូលទៅក្នុងហ្វូងបាតុករដែលបណ្តាលឲ្យមនុស្សយ៉ាងហោចណាស់១៦នាក់ស្លាប់ ដែលក្នុងនោះមានអង្គរក្សផ្ទាល់លោក សម រង្ស៊ី ដែលកំពុងនៅឈរក្បែរលោកផងនោះស្លាប់និងមានមនុស្សជាង១០០ទៀតរបួស។
ក្រោយពីការវាយប្រហារដោយគ្រាប់បែកដៃនោះភ្លាមៗ លោក សម រង្ស៊ី បានចោទប្រកាន់ថា លោក ហ៊ុន សែន ជាអ្នកនៅពីក្រោយក្នុងរឿងនេះ ប៉ុន្តែត្រូវបានលោកបដិសេធដាច់ណាត់មកវិញ។
អតីតអ្នកដឹកនាំការស៊ើបអង្កេតអស់ជាច្រើនឆ្នាំហើយដែលបច្ចុប្បន្នបានចូលនិវត្តន៍ទៅហើយនោះ គឺលោក ថូម៉ាស់ នីកូលែតទី (Thomas Nicoletti) បានឲ្យកាសែត ឌឹ ខេមបូឌា ដេលី ដឹងក្រោយពីការចេញរបាយការណ៍នោះថា ភស្តុតាងដែលភ្ជាប់កងកម្លាំងដែលស្មោះត្រង់នឹងគណបក្សប្រជាជនកម្ពុជាក្នុងអំពើនោះ គឺមានច្រើន ប៉ុន្តែមិនទាន់ពេញលេញនៅឡើយ។
អ្នកនាំពាក្យរដ្ឋាភិបាលខ្មែរលោក ខៀវ កាញារីទ្ធ មិនអាចទាក់ទងបំភ្លឺបានឡើយនៅក្នុងថ្ងៃនេះ ជុំវិញកំណត់ត្រាថ្មីរបស់ FBI ដោយទូរស័ព្ទរបស់លោកមានអ្នកទទួលជំនួសប្រាប់ថា លោកមិននៅ។ រីឯ មន្ត្រីជាន់ខ្ពស់ក្រសួងមហាផ្ទៃលោកឧត្តមសេនីយ៍ សុខ ផល មិនធ្វើអត្ថាធិប្បាយទេ ដោយលោក ទុកឲ្យលោកឧត្តមសេនីយ៍ ខៀវ សុភ័គ វិញ ហើយលោកឧត្តមសេនីយ៍ ខៀវ សុភ័គ បានទុកឲ្យលោកឧត្តមសេនីយ៍ តេង សាវង្ស វិញ ហើយចុងក្រោយលោកឧត្តមសេនីយ៍ តេង សាវង្ស បានថ្លែងថា លោកជាប់រវល់ប្រជុំ។
នៅក្នុងបទសម្ភាសន៍របស់កាសែត ឌឹ ខេមបូឌា ដេលី ដដែលបានស្រង់សំដីរបស់លោក ថូម៉ាស់ ដែលបាននិយាយថា សកម្មភាពចេតនាបំភ័ន្តនិងយឺតយ៉ាវរបស់នគរបាលកម្ពុជានោះ FBI បានចាប់ផ្តើមស៊ើបអង្កេតដោយមិនឲ្យពួកគេដឹងឡើយ៕