ប្រភពពីកងយោធាខ្មែរដែលកំពុងប្រយុទ្ធនៅតំបន់ប្រាសាទតាមាន់ធំ បានឲ្យដឹងថា ទាហានខ្មែរ-ថៃ បានវាយប្រយុទ្ធគ្នាជាលើកទី២ កាលពីម៉ោងប្រមាណ ១២ថ្ងៃត្រង់ នៅជិតប្រាសាទតាក្របី នៅថ្ងៃសុក្រ ទី២២ ខែមេសានេះ បន្ទាប់ពីកងទ័ពទាំងសងខាងបានប្រយុទ្ធគ្នារយៈពេលជាង ៣ម៉ោង ចាប់តាំងពីម៉ោងជាង ៦ រហូតដល់ម៉ោងជាង ១០ព្រឹកម្ដងមកហើយនោះ។
ទាហានខ្មែរម្នាក់ដែលកំពុងប្រយុទ្ធនៅតំបន់ប្រាសាទតាមមាន់ បានមានប្រសាសន៍ឲ្យដឹងកាលពីរសៀលថ្ងៃសុក្រ ទី២២ ខែមេសា ថា ទាហានថៃ ដែលមានអាវុធគាំទ្រថ្មើរជើ់ង និងកាំភ្លើងធំបាញ់ចេញពីលើរថក្រោះផង បានវាយប្រហារមកលើកងយោធពលខេមរភូមិន្ទជាលើកទី២ នៅប្រាសាទតាក្របី បន្ទាប់ពីការប្រយុទ្ធគ្នាលើកទី១បានស្ងប់ស្ងាត់ប្រហែលជាងមួយម៉ោងប៉ុណ្ណោះ ៖ «វ៉ៃហើយ! វ៉ៃខ្លាំងហើយ! កុំចុច (ទូរស័ព្ទ) មក ។ បាទ! នេះកំពុងវ៉ៃហើយ...»។
ប្រភពព័ត៌មានក្រៅផ្លូវការពីទាហាននៅតំបន់ប្រយុទ្ធបានឲ្យដឹងថា ក្នុងការប្រយុទ្ធគ្នាជាង ៣ម៉ោងរវាងទាហានខ្មែរ-ថៃ ក្នុងរឿងជម្លោះព្រំដែននៅតំបន់ប្រាសាទតាមាន់ និងប្រាសាទតាក្របីនោះ បណ្ដាលឲ្យទាហានខ្មែរ ២នាក់ស្លាប់ និង ៥នាក់ផ្សេងទៀតរងរបួស ក្នុងការវាយប្រយុទ្ធគ្នាទាំងពីរលើក។ ក៏ប៉ុន្តែតួលេខនេះមិនទាន់មានការបញ្ជាក់ជាផ្លូវការពីមន្ត្រីក្រសួងការពារជាតិនៃប្រទេសកម្ពុជា នៅឡើយទេ។
ចំណែកកាសែត បាងកក ប៉ុស្តិ៍ (Bangkok Post) បានដកស្រង់សម្ដីអ្នកនាំពាក្យរងយោធាថៃ គឺអ្នកស្រី សិរ៉ីចាន់ ង៉ាថង (Sirichan Ngathong) ដែលអះអាងកាលពីវេលាម៉ោងជាង ១រសៀលថ្ងៃសុក្រ ថា ក្នុងការប្រយុទ្ធគ្នានោះ គឺទាហានថៃចំនួន ៤នាក់បានស្លាប់ និង ៨នាក់ផ្សេងទៀតបានរងរបួស គិតត្រឹមម៉ោង ៤រសៀលថ្ងៃទី២២ ខែមេសានេះ។
ក៏ប៉ុន្តែតួលេខដែលមន្ត្រីយោធាថៃអះអាងនេះ គឺវាផ្ទុយនឹងការអះអាងរបស់ទាហានខ្មែរនៅតំបន់ប្រយុទ្ធដែលថា គេបានឃើញទាហានថៃចំនួន ១៣នាក់បានស្លាប់ និងជាង ២០នាក់ផ្សេងទៀ ត បានរងរបួស។
អាជ្ញាធរមូលដ្ឋាននៅក្នុងឃុំគោកមន ស្រុកបន្ទាយអំពិល ខេត្តឧត្តរមានជ័យ បានឲ្យដឹងថា នៅពេលដែលទាហានខ្មែរ-ថៃ កំពុងប្រយុទ្ធគ្នាដោយបាញ់កាំភ្លើងដៃ និងកាំភ្លើងធំដាក់គ្នាទៅវិញទៅមកនោះ គឺគ្រាប់កាំភ្លើងធំរបស់ទាហានថៃ មួយចំនួនបានផ្លោងចូលមកក្នុងភូមិជនស៊ីវិលខ្មែរដែលនៅចម្ងាយប្រមាណជាង ២០គីឡូម៉ែត្រ ភាគខាងកើតពីជាយដែនខ្មែរ-ថៃ។
លោក អួន វី មេឃុំគោកមន នៃស្រុកបន្ទាយអំពិល បានមានប្រសាសន៍ថា លោកបានដឹងថា គ្រាប់កាំភ្លើងធំរបស់ទាហានថៃ បានផ្លោងធ្លាក់នៅក្នុងភូមិប្រជាពលរដ្ឋរបស់លោក ប៉ុន្តែមិនបណ្ដាលឲ្យរងគ្រោះដល់ប្រជាពលរដ្ឋណាមួយទេ ៖ «ខ្ញុំបានជូនកងរាជអាវុធហត្ថទៅមើលរណ្ដៅគ្រាប់បាន ២កន្លែង ដែលឮសូរផ្ទុះចំនួន ២គ្រាប់ នៅក្នុងទឹកដីភូមិគោកស្វាយ ចម្ងាយពីវត្តតាណេសប្រហែលជាជាង ១០០ម៉ែត្រ»។
នៅថ្ងៃផ្ទុះអាវុធនេះដែរ លោកឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិនៃប្រទេសកម្ពុជា បានអះអាងថា ការប្រយុទ្ធគ្នានោះ គឺបណ្ដាលមកពីទាហានថៃ បានលួចឆ្លងដែនចូលមកវាយឆ្មក់លើកងទាហានខ្មែរមុននៅតំបន់ប្រាសាទតាក្របី រហូតដល់តំបន់ជប់គគីរ ចាប់តាំងពីម៉ោងជាង ៦ព្រឹក ហើយនៅពេលដែលថៃ វាយឆ្មក់មកលើទាហានខ្មែរនោះ គឺទាហានថៃ ក៏បានប្រើកាំភ្លើងផ្លោងធុនធ្ងន់ ធុន១៥៥ មីលីម៉ែត្របាញ់ចូលភូមិជនស៊ីវិលខ្មែរ ដែលនៅចម្ងាយជាង ២០គីឡូម៉ែត្រពីតំបន់ព្រំដែនទៀតផង។
មន្ត្រីក្រសួងការពារជាតិរបស់ប្រទេសកម្ពុជា បានឲ្យដឹងថា នៅថ្ងៃផ្ទុះអាវុធដដែលនោះ ទាហានខ្មែរនៅតែមានការត្រៀមប្រយុទ្ធនៅឡើយ នៅតាមបណ្ដោយព្រំដែនកម្ពុជា-ថៃ ចំណែកឯការជួបចរចាគ្នា ឬការទាមទារសំណងអ្វីផ្សេងៗដែលខូចខាតនោះ គេនឹងរង់ចាំជជែកគ្នានៅពេលក្រោយ។
នេះជាការប្រយុទ្ធគ្នាក្នុងទ្រង់ទ្រាយធំមួយទៀតរវាងទាហានខ្មែរ-ថៃ ក្នុងរឿងជម្លោះព្រំដែននាឆ្នាំនេះ បន្ទាប់ពីមានការប្រយុទ្ធគ្នាជាទ្រង់ទ្រាយធំកាលពីថ្ងៃទី៤ ដល់ថ្ងៃទី៧ ខែកុម្ភៈ នៅជុំវិញតំបន់ប្រាសាទព្រះវិហារមក។
ខ្មែរធ្វើសន្និសីទកាសែតសរុបរបាយការណ៍នៃការវាយប្រយុទ្ធគ្នា
នៅក្រោយការប្រយុទ្ធគ្នារវាងកម្ពុជា-ថៃ រួចមក កម្ពុជាធ្វើសន្និសីទកាសែតបន្ទាន់មួយនៅរសៀលថ្ងៃសុក្រ ទី២២ មេសានេះ។
លោក សុខ សេរី មានសេចក្ដីរាយការណ៍ផ្ទាល់ពីទីនោះ ៖
កម្ពុជាផ្ញើលិខិតទៅអាស៊ាននិងក្រុមប្រឹក្សាសន្តិសុខ អ.ស.ប.
ក្រោយពីជួបប្រយុទ្ធគ្នារវាងកងទ័ពខ្មែរ-ថៃ នៅព្រឹកថ្ងៃសុក្រ ទី២២ មេសានេះ ក្រសួងការបរទេសកម្ពុជា បានផ្ញើលិខិតចំនួនពីរទៅស្ថាប័នផ្សេងគ្នា គឺទៅប្រធានអាស៊ាន លោក ម៉ាទី ណាតាឡេហ្គាវ៉ា (Marty Natalegawa) និងទៅប្រធានក្រុមប្រឹក្សាសន្តិសុខអង្គការសហប្រជាជាតិ លោក ណេសស្ទើរ អូសូរីយ៉ូ (Nestor Osorio)។
នៅក្នុងលិខិតទាំងពីរនោះបានឲ្យដឹងថា ការវាយប្រយុទ្ធគ្នានេះជាការឈ្លានពានពីភាគីថៃ ជាថ្មីទៀត ហើយបានរំលោភរាល់ឧបករណ៍ច្បាប់ និងរំលោភចំពោះសេចក្ដីថ្លែងការណ៍ព័ត៌មានថ្ងៃទី១៤ កម្ភៈ ឆ្នាំ២០១១ របស់ក្រុមប្រឹក្សាសន្តិសុខអង្គការសហប្រជាជាតិ ក៏ដូចជាសេចក្ដីថ្លែងការណ៍របស់ប្រធានអាស៊ាន បន្ទាប់ពីមានកិច្ចប្រជុំក្រៅផ្លូវការនៃរដ្ឋមន្ត្រីការបរទេសអាស៊ាន កាលពីថ្ងៃទី២២ ខែកុម្ភៈ ឆ្នាំ២០១១ ដែលបានអំពាវនាវឲ្យឈប់បាញ់គ្នាជាអចិន្ត្រៃយ៍៕