លោក ឡូយ សូផាត អភិបាលខេត្តស្ទឹងត្រែង ឲ្យដឹងនៅថ្ងៃច័ន្ទ ទី៥ ខែតុលា ឆ្នាំ២០០៩ ថា ៩៥%នៃតួលេខខាងលើត្រូវខូចទាំងស្រុង ជាមួយនោះដែរប្រជាពលរដ្ឋជាង៣០០គ្រួសារត្រូវជម្លៀសទៅកាន់ទីទួលសុវត្ថិភាព ៖ «ទឹកនេះឡើងលឿនតែក្នុងរយៈប៉ុន្មានថ្ងៃនេះ...»។
ទឹកជំនន់ទន្លេសេសាននិងទន្លេស្រែពកបានជន់លិចភូមិឃុំជាច្រើននៅតំបន់ខ្សែទឹកខាងលើនាខេត្តរតនគិរី តាំងពីថ្ងៃទី២៨ ខែកញ្ញា ឆ្នាំ២០០៩មក ហើយឥទ្ធិពលនៃជំនន់បានជន់ទៅលើទន្លេសំខាន់ចំនួន៣នៅខេត្តស្ទឹងត្រែង មានទន្លេសេកុង ទន្លេសេសាន និងទន្លេមេគង្គ ធ្វើឲ្យផ្ទះសម្បែងប្រជាពលរដ្ឋជិត៣ពាន់គ្រួសារត្រូវទឹកលិច។
អាជ្ញាធរខេត្តស្ទឹងត្រែងឲ្យដឹងថា តួលេខគិតត្រឹមថ្ងៃទី៥ តុលា មានភូមិចំនួន៨១ក្នុងឃុំចំនួន២៦របស់ស្រុកចំនួន៥ក្នុងខេត្តស្ទឹងត្រែងកំពុងត្រូវទឹកជន់លិច។
លោក ប៉េ នូកន អ្នកភូមិរស់នៅភូមិបានមួង ស្រុកសៀមប៉ាង ឲ្យដឹងថា ផ្លូវធ្វើដំណើរក្នុងមូលដ្ឋានត្រូវទឹកលិចទាំងស្រុង ហើយទឹកនៅបន្តឡើងថែមទៀតនៅថ្ងែច័ន្ទដើមសប្តាហ៍នេះ ៖ «ទឹកនេះ វាខូចអស់ហើយស្រូវហ្នឹង។ រាជរដ្ឋាភិបាលជួយផង!»។
លោក ស៊ី សួន អភិបាលស្រុកសៀមប៉ាង មានប្រសាសន៍ថា ក្រុមអាជ្ញាធរបានត្រៀមមធ្យោបាយជម្លៀសប្រជាពលរដ្ឋ ៖ «ប្រសិនបើថាត្រូវជម្លៀស គឺយើងមានមធ្យោបាយសម្រាប់ជម្លៀសទៅទីទួលសុវត្ថិភាព»។
ទឹកជំនន់នាឆ្នាំនេះ មន្ត្រីអាជ្ញាធរមូលដ្ឋានឲ្យដឹងថា កម្ពស់ទឹកឡើងលឿនខុសធម្មតាធ្វើឲ្យប្រជាពលរដ្ឋនៅតំបន់ខ្សែទឹកខាងលើ ជាពិសេសនៅខេត្តរតនគិរី ប្រជាពលរដ្ឋមិនអាចជម្លៀសទ្រពសម្បត្តិ សត្វពាហនៈ ទាន់ពេលបានឡើយ។
មន្ត្រីអាជ្ញាធរនិងអង្គការក្រៅរដ្ឋាភិបាលឃ្លាំមើលបញ្ហានេះបញ្ជាក់ថា ព្យុះក្នុងតំបន់បានធ្វើឲ្យមានភ្លៀងច្រើននៅក្នុងប្រទេសនិងប្រទេសវៀតណាមដែលមានទំនប់វារីអគ្គិសនីជាច្រើនត្រូវបើកទ្វារបង្ហូរទឹក។
លោក ទេព បុណ្ណារិទ្ធ ប្រធានសមាគមអភិរក្សបរិស្ថានមានមូលដ្ឋាននៅខេត្តស្ទឹងត្រែង មានប្រសាសន៍ថា ផលប៉ះពាល់នៃទឹកជំនន់នាពេលនេះមួយផ្នែកធំទាក់ទិនទៅនឹងការបើកទំនប់វារីអគ្គិសនីពីប្រទេសវៀតណាម។
លោក ទេព បុណ្ណារិទ្ធ បានបញ្ជាក់ថា ៖ «រាជរដ្ឋាភិបាលត្រូវឲ្យមានផែនការច្បាស់លាស់ជម្លៀសប្រជាពលរដ្ឋចេញ កុំឲ្យជួបបញ្ហាហ្នឹងរៀងរាល់ឆ្នាំ»។
សូមបញ្ជាក់ដែរថា តួលេខនៃផលប៉ះពាល់បណ្តោះអាសន្នពីគ្រោះទឹកជំនន់នៅខេត្តរតនគិរី មានមនុស្ស៣នាក់ស្លាប់និងកុមារម្នាក់រងរបួស ផ្ទះអ្នកភូមិជិត៧ពាន់គ្រួសារត្រូវទឹកជន់លិច ក្នុងនោះផ្ទះជាច្រើនរយខ្នងត្រូវដួលរលំនិងហូរតាមខ្សែទឹក ធ្វើឲ្យអ្នកភូមិ៥០%ខ្វះជម្រក ស្រូវជាង៨ពាន់ហិកតារត្រូវទឹកលិច និងគោ ក្របី ជ្រូក មាន់ ទា និងទ្រពសម្បត្តិជាច្រើន ត្រូវទឹកលិច មិនទាន់ដឹងទំហំនៃការខូចខាត ហើយប្រភពនៅរសៀលថ្ងៃច័ន្ទ អ្នកភូមិសេកុង ខេត្តស្ទឹងត្រែង ឲ្យដឹងថា កសិករម្នាក់ក៏បានស្លាប់ក្នុងទឹកជំនន់នោះដែរ។ យ៉ាងដូច្នេះក្តី មិនទាន់មានសេចក្ដីអះអាងពីអាជ្ញាធរពីករណីស្លាប់នេះនៅឡើយ។
ការប្រែប្រួលនៃអាកាសធាតុគំរាមកំហែងពលរដ្ឋរាប់លាននាក់នៅតំបន់អាស៊ីអាគ្នេយ៍
ទីភ្នាក់ងារព័ត៌មាន រ៉យទ័រ (Reuters) របស់អង់គ្លេស រាយការណ៍ឲ្យដឹងថា ប្រតិភូចំនួន១៨០នាក់មកពីប្រជាជាតិនានាកំពុងជួបប្រជុំពិភាក្សារកវិធានការស្របគ្នាដើម្បីពង្រីកកិច្ចប្រឹងប្រែងជាសកលក្នុងការប្រយុទ្ធប្រឆាំងនឹងការប្រែប្រួលអាកាសធាតុ។
មូលនិធិពិភពលោកអភិរក្សសត្វព្រៃ (World Wild Fund) ក្នុងរបាយការណ៍នៅថ្ងៃច័ន្ទ ទី៥ ខែតុលា ស្របពេលគ្នានៃកិច្ចប្រជុំរបស់អង្គការសហប្រជាជាតិស្តីពីបញ្ហាប្រែប្រួលអាកាសធាតុដែលប្រព្រឹត្តទៅនៅទីក្រុងបាងកក បានបង្ហាញថា ការប្រែប្រួលអាកាសធាតុនិងកម្ពស់ទឹកសមុទ្ទបានធ្វើឲ្យប៉ះពាល់និងគំរាមកំហែងដល់ជីវិតរស់នៅរបស់ប្រជាពលរដ្ឋជាច្រើនលាននាក់នៅក្នុងតំបន់អាស៊ីអាគ្នេយ៍។
របាយការណ៍បានគូសបញ្ជាក់ទៀតថា គ្រោះធម្មជាតិធ្ងន់ធ្ងរដែលរួមមានទឹកជំនន់ ភាពរាំងស្ងួត ការបាក់ច្រាំងសមុទ្ទ និងការឡើងកម្ពស់ទឹកសមុទ្ទ ព្រមទាំងចរន្តរលកកម្ដៅ នៅក្នុងរយៈពេលប៉ុន្មានទសវត្សរ៍ខាងមុខនេះ នឹងបំផ្លាញស្រែស្រូវ ឈើហូបផ្លែ ដំណាំឧស្សាហកម្ម មានកាហ្វេជាដើម ហើយនិងការនេសាទនៅក្នុងមហាតំបន់អាងទន្លេមេគង្គ ដែលមនុស្សប្រមាណ៦៥លាននាក់ពឹងផ្អែករកទទួលទានចិញ្ចឹមជីវិត។
ក្នុងរបាយការណ៍របស់អង្គការមូលនិធិអភិរក្សបរិស្ថានពិភពលោកក៏បានឲ្យដឹងទៀតថា ទឹកជំនន់និងគ្រោះរាំងស្ងួតដែលកើតមានញឹកញាប់នឹងបង្កមហន្តរាយដល់អាយុជីវិតមនុស្សសត្វ និងទ្រព្យសម្បត្តិ និងធ្វើឲ្យបាត់បង់ប្រភពទឹកស្អាតប្រើប្រាស់ ជាពិសេសក្នុងរដូវប្រាំង៕