នាយកប្រចាំតំបន់របស់អង្គការ Oxfam អាមេរិកលោក ប្រាយអ៊ិន ឡាន់ (Brian Lund) មានប្រសាសន៍នៅព្រឹកថ្ងៃទី១៤ ខែធ្នូ នាទីក្រុងភ្នំពេញថា យុទ្ធនាការដែលមានឈ្មោះថា "ទិក! ទិក! ទិក!" មានគោលបំណង ជំរុញឲ្យមេដឹកនាំពិភពលោក ចំនួន ១៩២ប្រទេស ដែលកំពុងចរចានៅទីក្រុងខូផិនហេហ្គិន (Copenhagen) ប្រទេសដាណឺម៉ាក នាថ្ងៃច័ន្ទ ទី១៤ ខែធ្នូ ឲ្យកំណត់គោលដៅឲ្យបានខ្ពស់ក្នុងការកាត់បន្ថយការបំភាយសារធាតុកាបោននៅក្នុងបរិយាកាស និងទាមទារឲ្យពួកគេ ផ្តល់ថវិកាដល់ប្រទេសកំពុងអភិវឌ្ឍន៍ដូចជាកម្ពុជា ដើម្បីបន្សាំទៅនឹងការប្រែប្រួលអាកាសធាតុទាំងនេះ។
លោកបញ្ជាក់ថា ការប្រែប្រួលអាកាសធាតុបានធ្វើឲ្យពលរដ្ឋក្រីក្រ និងកសិករជាអ្នករងគ្រោះធ្ងន់ធ្ងរ ដែលធ្វើឲ្យរាំងស្ទះក្នុងការកាត់បន្ថយភាពក្រីក្ររបស់រដ្ឋាភិបាល និងបានបណ្តាលឲ្យមនុស្សធ្វើចំណាកស្រុកកាន់តែច្រើន ហើយនាំឆ្ពោះទៅរកពិភពលោកមួយ ដែលមានស្ថិរភាពតិចជាងមុន។
ប្រធានអង្គការអ្នកកសាងសមត្ថភាព លោក គង់ ផារិទ្ធ ដែលបានចូលរួមក្នុងយុទ្ធនាការជំរុញ និងទប់ស្កាត់ ផលប៉ះពាល់ពីការប្រែប្រួលអាកាសធាតុនេះដែរ បានបញ្ជាក់ពីផលប៉ះពាល់ និងអំពាវនាវទៅមេដឹកនាំនៅលើពិភពលោកដូច្នេះ ៖ «ទម្រាំផែនដីល្អ ម្លេះនៅមានជំងឺ បើសិនជាផែនដីមានជំងឺ នោះយើងនឹងត្រូវស្លាប់។ ដូច្នេះ នេះជារឿងសំខាន់ណាស់ចំពោះបម្រែបម្រួលអាកាសធាតុនៅលើភពផែនដី។ ជំរុញឲ្យថ្នាក់ដឹកនាំដែលកំពុងប្រជុំថ្ងៃនេះ ពិនិត្យពិចារណាទៅលើការបញ្ចេញឧស្ម័ន ហើយវិនិយោគលុយឲ្យបានច្រើនសម្រាប់ដោះស្រាយបញ្ហាភពផែនដីនេះ។ ហើយអង្គការអ្នកកសាងសមត្ថភាពបានចាប់ផ្តើមកម្មវិធីកាត់បន្ថយជាតិឧស្ម័នពុលនេះ ធ្លាប់ធ្វើមកហើយនៅស្ថានីយសាកអាគុយប្រើប្រាស់ពន្លឺព្រះអាទិត្យ ហើយដែលខ្ញុំខំប្រឹងធ្វើឡានដើរដោយថាមពលពន្លឺព្រះអាទិត្យជាដើមហ្នឹង គឺគម្រោងអស់ហ្នឹងគឺយើងបាន និងកំពុងយកចិត្តទុកដាក់ពីការប្រែប្រួលអាកាសធាតុហ្នឹងហើយ»។
សម្រាប់លោក អ៊ុក ណាវ៉ាន់ មន្ត្រីតំណាងមកពីក្រសួងបរិស្ថានមានប្រសាសន៍ថា មេដឹកនាំពិភពលោក ដែលជាប្រទេសឧស្សាហកម្មជឿនលឿនធំៗ នៅលើពិភពលោក ត្រូវតែយកចិត្តទុកដាក់ក្នុងការជួយទប់ស្កាត់ និងត្រូវតែផ្តល់ជំនួយដល់បណ្តាប្រទេសកំពុងអភិវឌ្ឍន៍ ដែលបានទទួលរងពីផលប៉ះពាល់ពីបម្រែបម្រួលអាកាសធាតុ ដែលបានបង្កគ្រោះមហន្តរាយកាន់តែធ្ងន់ធ្ងរពីមួយឆ្នាំទៅមួយឆ្នាំ។
លោក អ៊ុក ណាវ៉ាន់ និយាយថា ៖ «មេដឹកនាំពិភពលោក ត្រូវតែគិតគូរពីកាតព្វកិច្ច និងតួនាទីរបស់ខ្លួនដែលបង្កឲ្យមានស្ថានភាពប្រែប្រួលនេះឡើងតាមរយៈ ការផ្តល់ថវិកាដើម្បីផ្តល់ឲ្យប្រទេសក្រីក្រដូចជាប្រទេសកម្ពុជាយើងមានលទ្ធភាពក្នុងការបន្សាំខ្លួនទៅនឹងការប្រែប្រួលអាកាសធាតុ»។
ព្រឹត្តិការណ៍ទាមទារឲ្យមានកិច្ចព្រមព្រៀងអាកាសធាតុពិភពលោក ដ៏យុត្តិធម៌ថ្មីមួយស្រដៀងគ្នា នឹងកម្ពុជាបើកយុទ្ធនាការពីផលប៉ះពាល់នៃបម្រែបម្រួលអាកាសធាតុនេះដែរ ដោយឡែកនៅបណ្តាប្រទេសជុំវិញពិភពលោក ក៏បានរៀបចំឡើងដែរដូចជានៅអឺរ៉ុប អូស្ត្រាលី និងនៅប្រទេសដាណឺម៉ាក ជាដើម៕