កុមារីដែលគេអះអាងថាបានស្លាប់ ដោយសារជំងឺគ្រុនផ្ដាសាយបក្សី H5N1 នោះ ឈ្មោះ ណយ មករា អាយុ ៦ឆ្នាំ មានទីលំនៅៗ នៅភូមិក្បាលកោះ ឃុំអំពិលទឹក ស្រុកកំពង់ត្រឡាច ខេត្តកំពង់ឆ្នាំង។
ប្រធានមន្ទីរសុខាភិបាលខេត្ដកំពង់ឆ្នាំង លោក ប្រាក់ វ៉ុន បានឲ្យដឹងថា កុមារីរងគ្រោះបានចាប់ផ្ដើមឈឺ កាលពីថ្ងៃទី ២២ មីនា ហើយបានស្លាប់នៅវេលាម៉ោង ៨ និង ៣០ នាទីព្រឹក ថ្ងៃទី៣០ ខែមីនា នៅឯមន្ទីរពេទ្យគន្ធបុប្ផា នារាជធានីភ្នំពេញ។
លោក ហេង ចំរើន៖ «ឪពុកឈ្មោះម៉ៅ ណម អាយុ ៥៦ ឆ្នាំ ឯម្ដាយឈ្មោះ ឃៅ សាវ៉ន អាយុ ៤៩ ឆ្នាំ។ កុមារីរងគ្រោះឈ្មោះ ណយ មករា អាយុ ៦ ឆ្នាំ។ ពេទ្យថ្នាក់ជាតិ និងថ្នាក់ខេត្ត គេបានចុះមកព្រោងព្រាតហើយថ្ងៃនេះ។ គេនៅបន្តបាញ់ថ្នាំសម្លាប់មេរោគ»។
លោកមេឃុំបានឲ្យដឹងទៀតថា នៅក្នុងភូមិ ដែលកុមារីរងគ្រោះរស់នៅមានសត្វមាន់ឈឺហើយក្រុមគ្រួសាររបស់នាងបានយកមាន់ ដែលឈឺមួយក្បាលមកធ្វើម្ហូប។ ប្រមាណជា ៤ ថ្ងៃក្រោយពីការទទួលទានសាច់មាន់នោះ កុមារីរងគ្រោះបានចាប់ផ្ដើមឈឺ។
លោក ប្រាក់ វ៉ុន ជាប្រធានមន្ទីរសុខាភិបាលខេត្តកំពង់ឆ្នាំង។ លោកមានប្រសាសន៍ថា ចាប់តាំងពីថ្ងៃ ៣០ មីនាមក ក្រុមមន្ត្រីជំនាញរបស់មន្ទីរ បានចុះទៅទីតាំងកើតហេតុ ដើម្បីផ្សព្វផ្សាយដល់ប្រជាពលរដ្ឋនៅទីនោះ ពីអនាម័យនៃការរស់នៅ និងវិធានការការពារការឆ្លងជំងឺនេះ។
លោក ប្រាក់ វ៉ុន៖ «យើងបានចុះទៅធ្វើការពន្យល់ និងអប់រំអំពីវិធានការការពារ និងបញ្ហាអនាម័យក្នុងពេលមានការផ្ទុះជំងឺចំពោះអ្នកភូមិ និងសិស្សានុសិស្ស»។
ចំណែកប្រធានមន្ទីរកសិកម្មខេត្តកំពង់ឆ្នាំង លោក ង៉ាន ណានី ក៏បានឲ្យដឹងនៅព្រឹកថ្ងៃទី១ មេសាដែរថា ក្រុមមន្ត្រីមកពីមន្ទីរពិសោធន៍ក្រសួងសុខាភិបាល មន្ទីរសុខាភិបាលខេត្តកំពង់ឆ្នាំង ព្រមទាំងមន្ត្រីនៃមន្ទីរកសិកម្មខេត្ត បានចុះទៅពិនិត្យដល់លំនៅឋានកុមារីរងគ្រោះ និងបានកំណត់តំបន់ ដោយបានប្រមូលយកវត្ថុវិភាគទៅធ្វើការពិសោធន៍ នៅវិទ្យាស្ថានបសុពេទ្យ។ ប្រសិនបើរកឃើញថា មានរោគសញ្ញានោះ ទើបធ្វើការប្រកាសជាផ្លូវការនូវតំបន់ ដែលត្រូវហ៊ុំព័ទ្ធ និងគ្រប់គ្រង។ ដោយឡែកក្រុមបសុពេទ្យនៃមន្ទីរកសិកម្មខេត្តកំពង់ឆ្នាំង កំពុងចុះទៅបាញ់ថ្នាំសម្លាប់មេរោគនៅក្នុងភូមិ ដែលកុមារីរងគ្រោះរស់នៅ។
លោក ង៉ាន ណានី៖ «យើងបានយកវត្ថុវិភាគទៅវិទ្យាស្ថាន ដើម្បីពិសោធន៍ហើយ។ ប្រសិនបើមានសញ្ញាវិជ្ជមានទើបយើងធ្វើការប្រកាស។ ប៉ុន្តែ ទន្ទឹមគ្នានេះ យើងកំពុងធ្វើវិធានការតាមបែបជំនាញពេទ្យសត្វ ដោយការបាញ់ថ្នាំការពារ និងឃាត់រាល់ការចល័តសត្វជាបណ្ដោះអាសន្នសិន»។
នេះជាករណីអ្នកឆ្លងមេរោគគ្រុនផ្តាសាយបក្សី (H5N1) ទី២ ហើយ សម្រាប់ដើមឆ្នាំ ២០១២ នៅប្រទេសកម្ពុជា។ កាលពីខែមករាកន្លងទៅ គេបានរកឃើញកុមារអាយុ ៣ ឆ្នាំម្នាក់ នៅខេត្តបន្ទាយមានជ័យ ក៏បានឆ្លងជំងឺនេះដែរ។
តាមសេចក្ដីប្រកាសព័ត៌មានរួមមួយ រវាងក្រសួងសុខាភិបាលកម្ពុជា និងអង្គការសុខភាពពិភពលោក (WHO) បានបង្ហាញថា ចាប់តាំងពីឆ្នាំ ២០០៣ រហូតមកទល់បច្ចុប្បន្ននេះ ជំងឺគ្រុនផ្ដាសាយបក្សី (H5N1) នៅទូទាំងពិភពលោក បានកើតឡើងចំនួន ៥៧៧ ករណី។ ក្នុងនោះ មាន ៣៤០ ករណី ជនរងគ្រោះបានស្លាប់។ ដោយឡែក នៅប្រទេសកម្ពុជា គិតមកដល់ពេលនេះ មានអ្នកឆ្លងមេរោគគ្រុនផ្ដាសាយបក្សី (H5N1) ចំនួន ២០ ករណីហើយ។ ក្នុងនោះអ្នកជំងឺ ១៨ ករណី បានស្លាប់។
លោកប្រធានមន្ទីរសុខាភិបាលបានឲ្យដឹងទៀតថា នៅក្នុងភូមិដែលកុមារីរងគ្រោះរស់នៅ មានសត្វមាន់ឈឺ ហើយក្រុមគ្រួសាររបស់នាងបានសម្លាប់មាន់មួយក្បាលធ្វើម្ហូប។ ៣ ឬ៤ ថ្ងៃក្រោយមក កុមារីរងគ្រោះបានចាប់ផ្ដើមឈឺ។
ប្រធានមន្ទីរកសិកម្មខេត្តកំពង់ឆ្នាំង លោក ង៉ាន ណានី បានឲ្យដឹងនៅថ្ងៃទី៣១ ខែមីនា ឆ្នាំ២០១២ ថា មន្ទីរពិសោធន៍នៃក្រសួងសុខាភិបាល មន្ត្រីនៃមន្ទីរសុខាភិបាលខេត្តកំពង់ឆ្នាំង ព្រមទាំងមន្ត្រីនៃមន្ទីរកសិកម្មខេត្ត បានចុះទៅពិនិត្យដល់លំនៅឋានកុមារីរងគ្រោះ និងបានចុះទៅធ្វើការផ្សព្វផ្សាយដល់ប្រជាពលរដ្ឋនៅទីនោះ ពីអនាម័យនៃការរស់នៅ និងវិធានការការពារការឆ្លងជំងឺនេះ។
ដោយឡែក ក្រុមបសុពេទ្យនៃមន្ទីរកសិកម្មខេត្តកំពង់ឆ្នាំង ក៏បានចុះទៅបាញ់ថ្នាំសម្លាប់មេរោគនៅក្នុងភូមិ ដែលកុមារីរងគ្រោះរស់នៅដែរ។
គិតមកដល់ពេលនេះ នៅទូទាំងប្រទេសកម្ពុជា មានអ្នកឆ្លងមេរោគផ្ដាសាយបក្សី H5N1 ចំនួន ២០ នាក់ហើយ។ ក្នុងនោះមាន ១៨ នាក់បានស្លាប់៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។