ការស្វែងរកការគាំទ្រនេះ គឺដើម្បីបោះឆ្នោតឲ្យបេក្ខជនសមាជិកព្រឹទ្ធសភារបស់គណបក្សសមរង្ស៊ី ជាតំណាងឲ្យសភាជាតិកម្ពុជា។
លោក កឹម សុខា បានមានប្រសាសន៍ថា តំណាងរាស្ត្រពីររូបពីគណបក្សសិទ្ធិមនុស្ស និងរូបលោកផ្ទាល់ បានសម្រេចបោះឆ្នោតគាំទ្របេក្ខជនជាសមាជិកព្រឹទ្ធសភាមកពីគណបក្សសមរង្ស៊ី ៖ "ខ្ញុំគ្មានការកៀងគោពីគណបក្សសមរង្ស៊ីទេ។ សមាជិកតំណាងរាស្ត្រគណបក្សសិទ្ធិមនុស្សគិតថាយើងគ្មានបេក្ខភាពឈរឈ្មោះបោះឆ្នោតព្រឹទ្ធសភាទេ។ យើងបានគិតគ្នាថា បោះឆ្នោតឲ្យគណបក្សណា? តំណាងរាស្ត្រគណបក្សសិទ្ធិមនុស្សគ្រោងបោះឆ្នោតឲ្យគណបក្សសមរង្ស៊ី យ៉ាងហោចណាស់វាគ្រាន់បើជាងបោះឆ្នោតឲ្យគណបក្សប្រជាជនកម្ពុជា"។
គណៈកម្មាធិការជាតិរៀបចំការបោះឆ្នោតបានកំណត់យកថ្ងៃទី២៩ មករា ឆ្នាំ២០១២ សម្រាប់ធ្វើការបោះឆ្នោតព្រឹទ្ធសភា។ ព្រឹទ្ធសភាមានអាសនៈចំនួន៦១។ សមាជិកព្រឹទ្ធសភាចំនួនពីររូបនឹងត្រូវតែងតាំងដោយព្រះមហាក្សត្រ និងពីររូបផ្សេងទៀតនឹងត្រូវបោះឆ្នោតជ្រើសរើសដោយសមាជិករដ្ឋសភា។ ចំណែកបេក្ខជនចំនួន៥៧ ផ្សេងទៀត នឹងត្រូវជ្រើសរើសដោយក្រុមប្រឹក្សាឃុំសង្កាត់។
ការបោះឆ្នោតព្រឹទ្ធសភាសម្រាប់នីតិកាលទី៣ មានគណបក្សតែពីរប៉ុណ្ណោះនឹងចូលរួម គឺគណបក្សសមរង្ស៊ី និងគណបក្សប្រជាជនកម្ពុជា។ គណបក្សប្រជាជនកម្ពុជាត្រូវបានជ្រើសរើសលំដាប់លេខរៀងទី១ ក្នុងសន្លឹកឆ្នោតព្រឹទ្ធសភា ចំណែកគណបក្សសមរង្ស៊ីនៅលេខរៀងទី២៕