លោក ហ៊ុន សែន នាយករដ្ឋមន្ត្រីប្រទេសកម្ពុជា បានព្រមាន និងដាក់បទបញ្ជាទៅមន្ត្រីក្រោមឱវាទដែលកន្លងមកបានប្រើរថយន្តស៊ីរ៉ែនបើកនាំមុខរថយន្តរបស់ខ្លួន ឲ្យបញ្ឈប់ជាបន្ទាន់ ព្រោះចាប់ពីពេលនេះតទៅ អ្នកមានសិទ្ធិប្រើរថយន្តស៊ីរ៉ែននាំមុខមានតែថ្នាក់ដឹកនាំកំពូលៗ និងព្រះមហាក្សត្រ ព្រះមហាវីរក្សត្រ សរុបចំនួន ៥រូបប៉ុណ្ណោះ។
លោកនាយករដ្ឋមន្ត្រីបានសង្កត់ធ្ងន់ថា រថយន្តស៊ីរ៉ែនដែលគេប្រើប្រាស់ ឬបើកបរតាមផ្លូវសាធារណៈកន្លងមក គឺបានរំខានដល់ពលរដ្ឋ និងបង្កគ្រោះថ្នាក់ដល់អាយុជីវិតអ្នកធ្វើដំណើរតាមផ្លូវជាច្រើនករណី។
លោក ហ៊ុន សែន មានប្រសាសន៍បន្ថែមដូច្នេះ ៖ «អាបើកស៊ីរ៉ែនស្នូរងែងៗ ហ្នឹង រំខានកូនសិស្សរៀន រំខានការសម្រាកថ្ងៃ។ ចាំបើកធ្វើអីរួចហើយកុំលឿនពេក។ ខ្ញុំគិតថា បើមិនអ៊ីចឹងទេកំណត់តែម្ដង ទុកបួនព្រះអង្គ និងបីនាក់។ បើនៅតែមិនស្ដាប់ទេ ចេញអនុក្រឹត្យមួយហាមឃាត់តែម្ដង។ ថ្វាយទៅព្រះមហាក្សត្រ ជូនទៅប្រធានរដ្ឋសភា ទៅប្រធានព្រឹទ្ធសភា និងនាយករដ្ឋមន្ត្រី»។
លោកនាយករដ្ឋមន្ត្រីបានថ្លែងដូច្នេះ នៅក្នុងពិធីបើកការដ្ឋានស្ថាបនាស្ពានឆ្លងកាត់ទន្លេមេគង្គក្រោម ត្រង់ទីប្រជុំអ្នកលឿង កាលពីថ្ងៃទី១២ ខែកុម្ភៈ តភ្ជាប់ផ្លូវជាតិលេខ១ ពីខេត្តកណ្ដាល ទៅខេត្តព្រែវែង និងស្វាយរៀង ជាជំនួយឥតសំណងរបស់រាជរដ្ឋាភិបាលជប៉ុន។
សេចក្ដីប្រកាសនេះត្រូវបានសាធារណជនភាគច្រើនអបអរសាទរយ៉ាងខ្លាំង។
បុរសឈ្មោះ ភាព សុរិយា រស់នៅទីក្រុងភ្នំពេញ បានថ្លែងថា បើបទបញ្ជាកាត់បន្ថយរថយន្តស៊ីរ៉ែន របស់លោក ហ៊ុន សែន មានប្រសិទ្ធភាព លោកគាំទ្រពេញទំហឹង។ ព្រោះគ្រោះថ្នាក់ដែលបង្កឡើងពីរថយន្តស៊ីរ៉ែនបើកបរក្នុងល្បឿនលឿនទាំងនេះ បានបង្កគ្រោះថ្នាក់ដល់អាយុជីវិតពលរដ្ឋធ្វើដំណើរតាមផ្លូវស្ទើរមិនលោះពេលនោះទេ។
ពលរដ្ឋឈ្មោះ ភាព សុរិយា មានប្រសាសន៍ ៖ «ត្រឹមថ្នាក់ឧត្ដមសេនីយ៍ផ្កាយ១ ផ្កាយ២ អីមានប្រើស៊ីរ៉ែន ប្រើអីដែរ។ បើមានសិទ្ធិប្រើត្រឹម ៥នាក់ ដូចនាយករដ្ឋមន្ត្រីលើកឡើង ខ្ញុំគាំទ្រ។ ប្រើស៊ីរ៉ែនហ្នឹងធ្វើឲ្យស្ទះចរាចរណ៍ ស្ទះប្រជាពលរដ្ឋធ្វើដំណើរតាមផ្លូវ ហើយបណ្ដាលឲ្យមានគ្រោះថ្នាក់ជាយថាហេតុ»។
លោកវេជ្ជបណ្ឌិតមួយរូបទៀត នៅរាជធានីភ្នំពេញ ស្នើមិនបញ្ចេញឈ្មោះបានថ្លែងសាទរចំពោះបទបញ្ជានេះដែរ។ លោកឲ្យដឹងថា កន្លងមកគ្រោះថ្នាក់ និងការរំខានកើតចេញពីភាពអនាធិបតេយ្យនៃរថយន្តស៊ីរ៉ែន គឺបានបង្កគ្រោះថ្នាក់ដល់ពលរដ្ឋធ្វើដំណើរតាមផ្លូវជាច្រើនករណី និងបានរំខានដល់អ្នកជំងឺកំពុងសម្រាកព្យាបាលនៅតាមមន្ទីរពេទ្យមួយចំនួន ៖ «វាប៉ះពាល់ដល់អ្នកជំងឺសម្រាកព្យាបាលនៅមន្ទីរពេទ្យ ជំងឺធ្ងន់ៗ អ៊ីចឹងដែរ»។
ទោះយ៉ាងនេះក្ដី មន្ត្រីបក្សប្រឆាំង និងប្រជាពលរដ្ឋមួយចំនួនមានជំនឿថា បទបញ្ជានេះមិនអាចមានប្រសិទ្ធភាពបានយូរអង្វែងនោះទេ ព្រោះកន្លងគេសង្កេតឃើញថា បទបញ្ជារបស់លោកនាយករដ្ឋមន្ត្រី ហ៊ុន សែន ពុំសូវមានអ្នកអនុវត្តតាម។
លោក កឹម សុខា ប្រធានគណបក្សសិទ្ធិមនុស្ស បានថ្លែងថា លោកនៅតែមិនមានជំនឿថា បទបញ្ជាលោក ហ៊ុន សែន មានប្រសិទ្ធភាពទេ ព្រោះតាមការកត់សម្គាល់របស់លោក កន្លងមក បទបញ្ជាទាំងឡាយរបស់ប្រមុខដឹកនាំខ្មែររូបនេះ មន្ត្រីថ្នាក់ក្រោមមិនបានយកទៅអនុវត្តតាមនោះឡើយ។
លោក កឹម សុខា បន្ថែម ៖ «បានតែ១ឆាវដំបូង ដូចជាការទប់ស្កាត់ព្រៃឈើ ដូចជាបញ្ហាកុងត្រូលជជុះ គឺថាគាត់និយាយចោល អ្នកក្រោមមិនអនុវត្តដដែល ហើយគាត់មិនដែលបានផ្ដន្ទាទោសគ្នាគាត់ផងហ្នឹង។ ដូច្នេះខ្ញុំមិនសូវជាមានជំនឿប៉ុន្មានទេ នូវស្អីដែលគាត់និយាយហ្នឹង។ បើសិនជាធ្វើការងារនេះបាន គឺជាការល្អ ព្រោះជាការរំខានដល់ប្រជាពលរដ្ឋយើងច្រើនណាស់។ ស៊ីរ៉ែនសូម្បីរដ្ឋសភាជិះឡានម្នាក់ឯងទៅដើរលេងអុក ឬទៅវៃកាទេសោះ ខ្លះក៏ដាក់ស៊ីរ៉ែនដែរ»។
យ៉ាងណាក៏ដោយ លោកនាយករដ្ឋមន្ត្រី ហ៊ុន សែន បានសង្កត់ធ្ងន់ថា បទបញ្ជាកាត់បន្ថយរថយន្តស៊ីរ៉ែន ដែលបានដាក់ចេញនេះ ប្រសិនមានអ្នកល្មើសមិនគោរពតាមបទបញ្ជា លោកនឹងជំរុញឲ្យក្រសួងមហាផ្ទៃរៀបចំអនុក្រឹត្យថ្មីមួយ ដើម្បីបញ្ឈប់ និងដាក់ទោសដល់មន្ត្រីណាដែលល្មើសនឹងបទបញ្ជានេះឲ្យបានជាដាច់ខាត៕