មានប្រសាសន៍នៅក្នុងពិធីចែកវិញ្ញាបនបត្រនិងសញ្ញាបត្រដល់សមណសិស្ស និស្សិត និងសិស្ស និសិ្សត នៅវិទ្យាស្ថានជាតិអប់រំ នាព្រឹកថ្ងៃទី២៥ ខែមិថុនានេះ លោក ហ៊ុន សែន បានមានប្រសាសន៍ថា កម្ពុជានឹងពង្រឹងសិទ្ធិការពារទឹកដីនៅតាមព្រំដែនតំបន់ក្បែរប្រាសាទព្រះវិហារដែលកំពុងយាយីដោយកងទ័ពថៃនោះ។
លោកនាយករដ្ឋមន្ត្រីបានមានប្រសាសន៍ថា ៖ «ទាក់ទិននឹងហេតុការណ៍ដែលបង្កឡើងដោយភាគីថៃ ហើយថ្នាក់ដឹកនាំកំពូលរបស់ថៃ កម្ពុជា ក្នុងឋានៈខ្ញុំព្រះករុណាខ្ញុំជាប្រមុខនៃអង្គការនីតិប្រតិបត្តិដែលមានភារកិច្ចពេញលេញក្នុងការការពារឯករាជ្យ អធិបតេយ្យកម្ពុជា ខ្ញុំព្រះករុណាខ្ញុំមានសិទ្ធិនឹងបកស្រាយជូនប្រជាពលរដ្ឋ មានសិទ្ធិបញ្ជាកងទ័ពការពារទឹកដី។ តែអ្វីដែលខ្ញុំព្រះករុណាខ្ញុំបញ្ជាក់ហើយបញ្ជាក់ទៀត កម្ពុជាមិនប្រើប្រាស់កម្លាំងយោធាដើម្បីដោះស្រាយបញ្ហាក្នុងទំនាក់ទំនងទ្វេភាគីទេ ជម្រើសដែលនៅសេសសល់ដែលកម្ពុជាត្រូវប្រើកម្លាំងតែក្នុងក្របខ័ណ្ឌមួយ សិទ្ធិការពារខ្លួន ស្វ័យការពារ ពីរ នៅក្នុងទឹកដីរបស់ខ្លួន»។
ការប្រកាសរបស់លោក ហ៊ុន សែន នេះ គឺស្របពេលដែលមានសេចក្តីរាយការណ៍នានាពីប្រភពយោធាដែលថា ថៃបានបង្កើនកម្លាំងទ័ពនៅតំបន់ព្រំដែនក្បែរប្រាសាទព្រះវិហារនោះ។
លោកនាយករដ្ឋមន្រ្តីខ្មែរក៏បានបញ្ជាក់ដែរថា គម្រោងការជួបចរចារបស់មន្រ្តីជាន់ខ្ពស់ថៃដែលគ្រោងនឹងធ្វើឡើងក្នុងចុងសប្តាហ៍នេះក៏គួរតែពិភាក្សាអំពីបញ្ហាជម្លោះយោធានោះដែរជាជាងអំពីបញ្ហាការសើរើដើម្បីដាក់រមណីយដ្ឋានប្រាសាទព្រះវិហារជាបេតិកភណ្ឌពិភពលោកដែលថៃបានស្នើឡើងនោះ។
លោកនាយករដ្ឋមន្រ្តីបានបញ្ជាក់ថា ៖ «ខ្ញុំនៅតែបន្តស្វាគមន៍មិត្តរបស់ខ្ញុំ គឺឧបនាយករដ្ឋមន្រ្តី សុថេប និងរដ្ឋមន្រ្តីការពារជាតិ ប្រាវីត ដែលមកដល់ ហើយបើសិនយល់ថាមិនអាចសម្រេចបំណងទេ រឿងមកមិនមកគឺអាស្រ័យលើឯកឧត្ដមទេ តែជូនសារទៅមុនថាកុំលើកបញ្ហាព្រះវិហារ ហើយបើសិនជាជាប់ព្រះវិហារ លើកតែរឿងដកកងទ័ពថៃទៅបានហើយ រឿងមានតែប៉ុណ្ណឹងទេ»។
ជម្លោះនៃតំបន់ព្រំដែននោះគឺកើតឡើងចាប់តាំងពីថៃបានបញ្ជូនទាហានឈុតខ្មៅរាប់រយនាក់ចូលមកក្នុងទីវត្តខ្មែរ កែវសិក្ខាគិរីស្វរៈ ក្បែរប្រាសាទព្រះវិហារ កាលពីថ្ងៃទី១៥ ខែកក្កដា ឆ្នាំ២០០៨ បន្ទាប់ពីប្រទេសកម្ពុជាបានដាក់ប្រាសាទព្រះវិហារជាបេតិកភណ្ឌពិភពលោកដែលថៃតែងតែប្រឆាំងនោះ។
ជម្លោះព្រំដែនដែលបានអូសបន្លាយជិតមួយឆ្នាំមកហើយនេះក៏បានរាលដាលនៅតំបន់ជាច្រើនទៀត ហើយទោះបីមានការចរចាទ្វេភាគីជាបន្តបន្ទាប់ក៏ដោយក៏មានការវាយប្រយុទ្ធគ្នាជាច្រើនលើកដែលធ្វើឲ្យកងទ័ពប្រទេសទាំងពីរស្លាប់និងរបួសជាច្រើននាក់៕