ការសន្យានេះ បានធ្វើឡើងក្នុងជំនួបទ្វេភាគី រវាងលោកនាយករដ្ឋមន្ត្រី ហ៊ុន សែន នៃប្រទេសកម្ពុជា ជាមួយនឹងលោក ហូ ជិនតៅ (Hu Jintao) ប្រធានាធិបតីចិន នៅក្នុងទីក្រុងសៀងហៃ (Shanghai) ប្រទេសចិន នៅពេលដែលលោក ហ៊ុន សែន និងប្រតិភូជាន់ខ្ពស់ នៃរដ្ឋាភិបាលកម្ពុជា បានទៅធ្វើទស្សនកិច្ចរយៈពេល៤ថ្ងៃ ចាប់ពីថ្ងៃទី២៩ ខែមេសា ដល់ថ្ងៃទី២ ខែឧសភានេះ ក្នុងការចូលរួមពិធីតាំងពិព័រណ៍ពិភពលោក នៅក្នុងទីក្រុងសៀងហៃ ប្រទេសចិន។
លោកនាយករដ្ឋមន្ត្រី ហ៊ុន សែន និងប្រតិភូជាន់ខ្ពស់កម្ពុជា បានវិលត្រឡប់មកដល់ប្រទេសកម្ពុជាវិញហើយ នៅព្រឹកថ្ងៃអាទិត្យ ទី២ ខែឧសភានេះ។
លោក ហោ ណាំហុង ជារដ្ឋមន្ត្រីក្រសួងការបរទេសកម្ពុជា និងជាឧបនាយករដ្ឋមន្ត្រី ដែលបានវិលត្រឡប់មកពីប្រទេសចិន នៅថ្ងៃអាទិត្យ ទី២ ខែឧសភា បានមានប្រសាសន៍ នៅក្នុងសន្និសីទកាសែត នៅឯអាកាសយានដ្ឋានអន្តរជាតិភ្នំពេញថា ៖ «បន្តជួយទៀត ពិសេសទាំងខាងវិស័យយោធា ពិសេស ខាងបណ្ដុះបណ្ដាលកងទ័ពយើង។ សាលាបណ្ដុះបណ្ដាលកងទ័ពយើង។ គេនឹងបន្តជួយកម្ពុជាយើង ដើម្បីបន្តអភិវឌ្ឍសេដ្ឋកិច្ចជាតិ។ ឯកឧត្ដម ក៏បានយល់ព្រមទទួលការអញ្ជើញរបស់សម្រេចតេជោ មកធ្វើទស្សនកិច្ចនៅកម្ពុជា នៅក្នុងពេលអនាគតឆាប់ៗនេះ»។
ប្រមុខការទូតកម្ពុជា លោក ហោ ណាំហុង ដដែលបានបន្តថា ជំនួបទ្វេភាគី រវាងលោកនាយករដ្ឋមន្ត្រី ហ៊ុន សែន និងលោកប្រធានាធិបតីចិន លោក ហូ ជិនតៅ បានផ្ដោតលើការពង្រឹងចំណងទាក់ទង វាងកម្ពុជា និងចិន ឲ្យកាន់តែរឹងមាំលើគ្រប់វិស័យ និងការផ្លាស់ប្ដូរទស្សនកិច្ច មេដឹកនាំកំពូល រវាងប្រទេសទាំងពីរ។
ក្រៅពីនេះ ប្រទេសកម្ពុជា និងចិន បានសហការគ្នានៅក្នុងវិស័យប្រឆាំងអំពើភេរវកម្ម និងសហប្រតិបត្តិការគ្នា នៅក្នុងក្របខ័ណ្ឌតំបន់, អន្តរជាតិ និងក្របខ័ណ្ឌ អង្គការសហប្រជាជាតិ។
ការសន្យារបស់មេដឹកនាំចិន ក្នុងការផ្ដល់ជំនួយយោធាចិន មកប្រទេសកម្ពុជាខាងលើនេះ មិនយូរប៉ុន្មាន ក្រោយពីសហរដ្ឋអាមេរិក កាលពីដើមខែមេសាថ្មីៗនេះ បានសម្រេចព្យួរកម្មវិធីជំនួយខ្នាតតូចផ្នែកយោធា មកប្រទេសកម្ពុជា ដូចជារថយន្តយោធា សណ្ដោងរ៉ឺម៉កប្រមាណ ២០០គ្រឿង ដោយសារតែរដ្ឋាភិបាលកម្ពុជា បានចាប់បញ្ជូនជនជាតិភាគតិចចិន អ៊ុយហ្គឺរ (Uighur) ចំនួន២០នាក់ កាលពីខែធ្នូ ឆ្នាំ២០០៩កន្លងទៅ ប្រគល់ឲ្យចិនវិញ នៅគ្រាដែលអ្នកទាំងនោះ រត់មកលាក់ខ្លួន នៅក្នុងប្រទេសកម្ពុជា ដើម្បីស្វែងរកសិទ្ធិជ្រោកកោន ពីអង្គការ UNHCR នៅកម្ពុជា។
លោក យឹម សុវណ្ណ ជាតំណាងរាស្ត្រគណបក្សប្រឆាំង សមរង្ស៊ី និងជាអ្នកនាំពាក្យ បានមានប្រសាសន៍អត្ថាធិប្បាយថា ៖ «វាអាស្រ័យទៅលើរដ្ឋាភិបាលទេ បើសិនជាយើងចេះប្រើប្រាស់ជំនួយហ្នឹង មានប្រសិទ្ធភាពប្រើប្រាស់ជំនួយហ្នឹង ដោយមិនភ្ជាប់ទៅនឹងលក្ខណអ្វីផ្សេងៗ ដែលមិនធ្វើឲ្យខូចប្រយោជន៍នយោបាយ និងសេដ្ឋកិច្ចយើង អាហ្នឹងយើងស្វាគមន៍។ តែបើជំនួយហ្នឹង ធ្វើឲ្យប្រទេសយើង ក្លាយជាប្រទេសធ្លាក់ក្នុងរបបប្រល័យពូជសាសន៍ ដូចជារយៈពេលប៉ុន្មានទសវត្សមុនហ្នឹង ក៏យើងត្រូវការប្រុងប្រយ័ត្នផងដែរ»។
ប្រភពពីប្រមុខការទូតកម្ពុជា បានឲ្យដឹងថា មេដឹកនាំចិនគ្រោងនឹងមកធ្វើទស្សនកិច្ចនៅកម្ពុជា នាពេលខាងមុខឆាប់នេះ តាមសំណើរបស់លោក ហ៊ុន សែន។
ប្រទេសចិន បានផ្លាស់ប្ដូរពាណិជ្ជកម្មជាមួយប្រទេសកម្ពុជា កាលពីឆ្នាំ២០០៩ កន្លងទៅ មានចំនួនទឹកប្រាក់ជាង ៩០០លានដុល្លារអាមេរិក។ តម្លៃវិនិយោគរបស់ប្រទេសចិន នៅក្នុងប្រទេសកម្ពុជា មានចំនួនជាង ១ពាន់លានដុល្លារអាមេរិក ក្នុងវិស័យសាងសង់ទំនប់វារីអគ្គិសនី ច្រើនកន្លែងនៅកម្ពុជា។
ក្រៅពីនេះ ប្រទេសចិន បានផ្ដល់ជំនួយនានា ក្នុងការសាងសង់ស្ពាន និងផ្លូវថ្នល់នៅក្នុងប្រទេសកម្ពុជា នេះបើតាមការអះអាងរបស់មន្ត្រីជាន់ខ្ពស់កម្ពុជា៕