លោក នូ សីហា ជាតំណាងប្រជាពលរដ្ឋសហគមន៍ស្រុកចិត្តបុរី ខេត្តក្រចេះ។ លោកបានឲ្យដឹងនៅថ្ងៃទី២៨ ខែមករា ថា សកម្មភាពដឹកជញ្ជូនឈើប្រណិតតាមរថយន្តនៅពេលយប់ កំពុងចរាចរណ៍ក្នុងខេត្តក្រចេះ ហើយសកម្មភាពទាំងនោះមិនទាន់ឃើញសមត្ថកិច្ចបង្ក្រាបនោះទេ។
លោកអះអាងថា សកម្មភាពដឹកជញ្ជូនឈើប្រណិត ឈ្មួញបានដឹកឆ្លងកាត់ប៉ុស្តិ៍មន្ត្រីជំនាញរដ្ឋបាលព្រៃឈើ ឆ្លងកាត់ប៉ុស្តិ៍ប៉ូលិស ឬកងរាជអាវុធហត្ថខេត្តក្រចេះ ជាដើម ពិសេសក្រោយថ្ងៃបុណ្យចូលឆ្នាំចិន វៀតណាម បានបញ្ចប់។
ពលរដ្ឋរូបនេះបានចោទមន្ត្រីជំនាញពីគ្រប់ស្ថាប័ននៃខេត្តក្រចេះ ថា បានទទួលសំណូកលុយកាក់ប្រចាំខែពីឈ្មួញ ទើបបទល្មើសព្រៃឈើអាចធ្វើសកម្មភាពទៅបាន។ លោកថា ឈ្មួញដឹកជញ្ជូនឈើប្រណិតដែលធ្វើសកម្មភាពនាមូលដ្ឋាននេះ គឺភាគច្រើនសុទ្ធតែជាមន្ត្រីមានឥទ្ធិពលក្នុងស្ថាប័នយោធា ប៉ូលិស និងស្ថាប័នកងរាជអាវុធហត្ថក្នុងខេត្តនេះ។
លោក នូ សីហា បន្ថែម៖ «របៀបដូចថា មន្ត្រីប៉ូលិស ឬទាហាននៅក្នុងអង្គភាព មន្ទីរ ដើរយកលុយពីរថយន្តដឹកឈើ។ តែបើសមត្ថកិច្ចជំនាញដូចជាខាងរដ្ឋបាលព្រៃឈើ ឬប៉េអឹមប្រចាំការនៅតាមប៉ុស្តិ៍ ប្រហែលជាឈ្មួញបង់ខែឲ្យហើយ។ ពួកនេះមិនឆ្វេចឆ្វាចដេញចាប់ឡានទេ ឡានដឹកឈើបរប្រុយៗ ហើយថ្នាក់លើ ថ្នាក់ចៅហ្វាយខេត្ត ឬថ្នាក់ស្នងការជាដើម នាំគ្នាបំផ្លាញទ្រព្យសម្បត្តិជាតិអស់រលីង។ អ្នកក្រនៅតែក្រ អ្នកមាននៅតែមានដដែល»។
តំណាងពលរដ្ឋស្រុកចិត្តបុរី បានបញ្ជាក់ថា សកម្មភាពដឹកជញ្ជូនឈើប្រណិតឆ្លងកាត់ខេត្តក្រចេះ មានចំនួនច្រើនឡើងៗ ក្រោយថ្ងៃបុណ្យចូលឆ្នាំចិនរួច។ រថយន្តដឹកឈើទាំងនោះ ភាគច្រើនជាប្រភេទរថយន្តសេរីទំនើបៗ។
តំណាងពលរដ្ឋបានស្នើទៅលោកនាយករដ្ឋមន្ត្រី ហ៊ុន សែន ឲ្យពិនិត្យបទបញ្ជាលុបបំបាត់បទល្មើសព្រៃឈើសាឡើងវិញ ព្រោះបទបញ្ជានេះ មន្ត្រីក្រោមឱវាទអនុវត្តមិនទាន់មានប្រសិទ្ធភាពទេ។
ទាក់ទងបញ្ហានេះ លោក សូយ សារិទ្ធ ជានាយខណ្ឌរដ្ឋបាលព្រៃឈើខេត្តក្រចេះ ធ្លាប់បានអះអាងថា មន្ត្រីជំនាញរបស់លោកមានផែនការច្បាស់លាស់ ដើម្បីបង្ក្រាបបទល្មើសព្រៃឈើ ដែលធ្វើសកម្មភាពឆ្លងកាត់ខេត្តក្រចេះ។ លោកថា វិធានការបង្ក្រាបមន្ត្រីជំនាញកំពុងជំរុញសកម្មភាពមិនធ្វេសប្រហែសទេ។
បទល្មើសព្រៃឈើនេះដែរ លោក ខាំ ភឿន ជាអភិបាលខេត្តក្រចេះ បញ្ជាក់ថា មន្ត្រីជំនាញកំពុងជំរុញសកម្មភាពបង្ក្រាបបទល្មើសឈើ ដោយយកចិត្តទុកដាក់បំផុត។ ព្រោះថា បទបញ្ជាលុបបំបាត់បទល្មើសព្រៃឈើដែលប្រមុខដឹកនាំ បានដាក់ចេញសមត្ថកិច្ចត្រូវអនុវត្តឲ្យមានប្រសិទ្ធភាព។
លោក ខាំ ភឿន បន្ថែម៖ «កម្លាំងសមត្ថកិច្ចកំពុងតែប្រតិបត្តិការលើបញ្ហាបទល្មើសព្រៃឈើនេះ ហើយយើងតែងចាប់បានឈើដែលឈ្មួញលាក់ទុកបម្រុងនាំចេញ គឺកំពុងប្រមូលមកទុកនៅក្នុងផ្នែករដ្ឋបាលព្រៃឈើ ឬសង្កាត់រដ្ឋបាលព្រៃឈើដែលនៅជិត។ កំពុងប្រតិបត្តិរាល់ថ្ងៃ ពិសេសខាងផ្នែករដ្ឋបាលព្រៃឈើក្រចេះ»។
យ៉ាងណាក៏ដោយ មន្ត្រីមកពីគណបក្សប្រឆាំងនៅកម្ពុជា មានគណបក្ស សម រង្ស៊ី និងគណបក្សសិទ្ធិមនុស្សគ្មានជំនឿថា បទបញ្ជាបង្ក្រាបបទល្មើសព្រៃឈើរបស់នាយករដ្ឋមន្ត្រីខ្មែរ អាចមានមន្ត្រីក្រោមឱវាទរបស់លោកអនុវត្តតាមឲ្យមានប្រសិទ្ធភាពទេ។ ព្រោះបទបញ្ជារបស់លោកដែលបានដាក់ចេញកន្លងមក មានតែនៅលើក្រដាស ឬបបូរមាត់ទេ តែការអនុវត្តមិនទាន់មានប្រសិទ្ធភាព។
ទោះជាបែបនេះក្តី លោកនាយករដ្ឋមន្ត្រី ហ៊ុន សែន លោកធ្លាប់ព្រមានធ្វើឃាតខ្លួនឯង បើរាល់បទបញ្ជារបស់លោកដែលបានដាក់ចេញ ហើយអនុវត្តមិនមានប្រសិទ្ធភាព ឬមិនអនុវត្តបាននោះ។
លោក ហ៊ុន សែន មានប្រសាសន៍ដូច្នេះ៖ «បើមិនគោរព ក៏សូមសាក បើមិនដកយកព្រៃបិទរោងចក្រទេ ខ្ញុំហ៊ានកាត់កខ្ញុំចោល ព្រោះនេះជាសម្ដីនាយករដ្ឋមន្ត្រី។ ខ្ញុំសុខចិត្តចំណាយអីក៏ចំណាយទៅ តែរឿងចាញ់ដោយការនិយាយជាមួយប្រជាពលរដ្ឋ ហើយមិនបានធ្វើនេះ គឺខ្ញុំមិនព្រមចាញ់ទេ ខ្ញុំត្រូវតែធ្វើឲ្យបានដែរ។ បើធ្វើអ្វីមួយហើយ ហ៊ុន សែន ហ៊ាននិយាយ គឺហ៊ានធ្វើ»។
ទោះយ៉ាងណា ពលរដ្ឋបានអះអាងថា បទល្មើសព្រៃឈើដែលធ្វើសកម្មភាពនាមូលដ្ឋានខេត្តក្រចេះ សមត្ថកិច្ចជំនាញគ្រប់ផ្នែកក្នុងខេត្តនេះ មិនពិបាកបង្ក្រាបទេ ឲ្យតែមានឆន្ទៈពិតប្រាកដ ព្រោះឈ្មួញបានសកម្មភាពដឹកជញ្ជូនឈើប្រណិតឆ្លងកាត់ប៉ុស្តិ៍ត្រួតពិនិត្យ របស់ជំនាញរាល់យប់ ហើយមន្ត្រីជំនាញក៏បានស្គាល់អត្តសញ្ញាណឈ្មួញឈើប្រណិតទាំងនោះអស់ដែរ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។