អាជ្ញាធរស្រុកត្រពាំងប្រាសាទ ខេត្តឧត្តរមានជ័យ ដែលនៅជាប់តំបន់ព្រំដែនខ្មែរ-ថៃ បានឲ្យដឹងថា គេទើបតែបានរកឃើញប្រជាពលរដ្ឋខ្មែរម្នាក់ទៀតដែលរងរបួសបន្ទាប់ពីបាត់ខ្លួននៅក្នុងព្រៃតាមព្រំដែនអស់រយៈពេល ៩ថ្ងៃ ខណៈដែលនាំគ្នាឆ្លងដែនស៊ីឈ្នួលដឹកឈើឲ្យឈ្មួញហើយត្រូវទាហានថៃនៃស្រុកខាន់ថារៈឡាក់ ខេត្តស៊ីសាកេត បាញ់រះបណ្តាលឲ្យស្លាប់ និងរបួសនោះ។
ជំទប់ទី២ ឃុំបាក់អន្លូង ស្រុកត្រពាំងប្រាសាទ លោក ម៉ៅ ម៉ន បានមានប្រសាសន៍កាលពីព្រឹកថ្ងៃពុធ ទី១៦ ខែធ្នូ ថា យុវជនម្នាក់ឈ្មោះ ផល សុខា អាយុ ២១ឆ្នាំ ត្រូវបានក្រុមគ្រួសារតាមរកឃើញនៅក្នុងព្រៃជាប់បន្ទាត់ព្រំដែនខ្មែរ-ថៃ កាលពីថ្ងៃអង្គារ បន្ទាប់ពីបានឆ្លងដែនចូលទឹកដីថៃស៊ីឈ្នួលដឹកឈើគ្រញូងមកឲ្យក្រុមឈ្មួញកាលពីជាង ១០ថ្ងៃមុន ហើយត្រូវកងទាហានថៃបាញ់រះនោះ។ ការរកឃើញអ្នកនៅរស់រានមានជីវិត ដោយសារតែយុវជននោះបានរងរបួសហើយខំលូនគេចខ្លួនមកវិញ។
លោក ម៉ៅ ម៉ន ថ្លែងថា ៖ «គេហៅចំណុចអូរម្លូព្រំប្រទល់ខ្មែរ-ថៃ។ អាហ្នឹង បាញ់ត្រូវបាក់ឆ្អឹងកន្លែងកំភួនជើងឆ្វេង ស្អុយរលួយដង្កូវចុះគ្នាសភាពហត់ហេវស្គមស្គាំង»។
យុវជនឈ្មោះ ផល សុខា នៅភូមិស្រែល្អ ឃុំបាក់អន្លូង បានមានប្រសាសន៍ថា គាត់បានរស់នៅលាក់ខ្លួនក្នុងព្រៃព្រំដែនខ្មែរ-ថៃរយៈពេល ៩ថ្ងៃមកហើយដោយគ្មានអាហារហូបទេ គឺមានតែទឹកអូរសម្រាប់ផឹកប៉ុណ្ណោះ។ ផល សុខា ដែលនៅរស់រានមានជីវិតពីការបាញ់រះដោយកងទាហានថៃបានមានប្រសាសន៍ថា គាត់បានរងរបួសជើងដោយសារកងទាហានថៃបាញ់ហើយបានលូនគេចខ្លួនក្នុងព្រៃរយៈពេល ៩ ថ្ងៃ ទើបតែជួបក្រុមគ្រួសារកាលពីម្សិលមិញ។
ជនរងគ្រោះ ផល សុខា ឲ្យដឹងថា ៖ «ថៃបាញ់ពូ ឃើញអ៊ំត្រូវទៅជួយអ៊ំវាបាញ់ត្រូវបាក់ជើង គេចចូលព្រៃពួនលូនមកផ្ទះវិញខ្ញុំវាតាមផ្លូវ ៩ ថ្ងៃ។ ទើបមកដល់ម្សិលមិញ អត់មានអីហូបផងហូបតែទឹកអូរ»។
អាជ្ញាធរខេត្តឧត្តរមានជ័យថ្លែងថា គេបានខិតខំប្រឹងប្រែងទប់ស្តាត់មិនឲ្យប្រជាពលរដ្ឋខ្មែរឆ្លងដែនទៅរកស៊ីនៅដីថៃដែលកំពុងគ្រោះថ្នាក់នោះ ប៉ុន្តែការហាមឃាត់នៅតែគ្មានប្រសិទ្ធភាព។
ជំនួយការអភិបាលខេត្តឧត្តរមានជ័យ លោក ឈឹម ស៊ីវុធ បានមានប្រសាសន៍ថា អាជ្ញាធរខេត្តបានចេញសេចក្តីជូនដំណឹងតាំងពីពេលមានជម្លោះព្រំដែនរវាងខ្មែរ-ថៃម្ល៉េះ តាមរយៈមេឃុំនិងមេស្រុកឲ្យអប់រំប្រជាពលរដ្ឋកុំឲ្យឆ្លងដែន។ ប៉ុន្តែនៅតែមានជនគិតផលប្រយោជន៍មួយចំនួនជំរុញប្រជាពលរដ្ឋខ្មែរក្រីក្រឲ្យឆ្លងដែនដើម្បីបម្រើផលប្រយោជន៍របស់ពួកគេ។
លោល ឈឹម ស៊ីវុធ បន្តថា ៖ «ទីមួយជីវភាពរបស់គាត់ជាកត្តាចម្បង ទី២ មានជនដែលគិតប្រយោជន៏ផ្ទាល់ខ្លួនខ្លាំងពេកគាត់ជំរុញលើកទឹកចិត្តឲ្យទៅដើម្បីធ្វើផលប្រយោជន៏របស់គាត់ឲ្យកម្រៃតិចតួចទៅប្រជាពលរដ្ឋទាំងនោះណា»។
ជនដែលនៅរស់ជីវិតពីកងទាហានថៃខេត្តស៊ីសាកេតបាញ់រះនោះ បានឲ្យដឹងថា ពួកគេមានគ្នា ១៣នាក់ បានឆ្លងដែនទៅដឹកជញ្ជូនឈើឲ្យឈ្មួញកាលពីថ្ងៃទី៤ ខែធ្នូ ហើយត្រូវទាហានថៃបាញ់រះបណ្តាលឲ្យ ២នាក់ស្លាប់។ អាជ្ញាធរខេត្តឧត្តរមានជ័យបានបង្ហាញថា ចាប់តាំងពីខែកញ្ញា ឆ្នាំ២០០៩ រហូតមកដល់ខែធ្នូនេះ ចំនួនប្រជាពលរដ្ឋខ្មែរដែលទាហានថៃបាញ់ស្លាប់ពេលឆ្លងដែនបានកើនឡើងដល់ ៥នាក់ហើយ៕