ស្រ្តីម្នាក់ឈ្មោះ ចេង ហ៊ន បានមានប្រសាសន៍កាលពីព្រឹកថ្ងៃច័ន្ទ ទី២៣ ខែមីនា ថា ប្តីរបស់គាត់ឈ្មោះ លួន វិញ បានរងរបួសដោយគ្រាប់កាំភ្លើងយ៉ាងធ្ងន់ធ្ងរកំពុងសម្រាកព្យាបាលនៅមន្ទីរពេទ្យខេត្តសៀមរាប ហើយគាត់កំពុងដាក់ពាក្យប្តឹងឲ្យអាជ្ញាធរស្រុកជីក្រែង ទទួលខុសត្រូវនិងសងជាប្រាក់ចំនួន ៥.០០០ដុល្លារអាមេរិកដល់អ្នករងរបួសម្នាក់ៗដោយគ្រួសារអ្នករងរបួសទាំងនោះ បានមកពឹងពាក់សមាគមការពារសិទ្ធិមនុស្ស អាដហុក ខេត្តសៀមរាប ជួយរៀបចំពាក្យបណ្តឹងប្រឆាំងការបាញ់រះដោយសមត្ថកិច្ចនោះ ៖ «ប្ដីខ្ញុំត្រូវ ២គ្រាប់ ត្រូវធ្ងន់ បែកក្បាលជង្គង់អស់។ ទាមទារឲ្យបង់ ៥.០០០[ដុល្លារ]»។
ការសម្រេចដាក់ពាក្យបណ្តឹងរបស់គ្រួសារអ្នករងរបួស បានធ្វើឡើងក្រោយមួយថ្ងៃ បន្ទាប់ពីសមត្ថកិច្ចចម្រុះមានប៉ូលិស ប៉េអឹម និងទាហាន បានបាញ់រះទៅលើក្រុមប្រជាពលរដ្ឋឃុំជីក្រែង ដែលបានលើកគ្នារាប់រយនាក់ទៅដេកតវ៉ានៅទំនប់៧៨សួង ដោយសារទំនាស់ដីស្រែប្រាំងបណ្តាលឲ្យរងរបួសបុរសអ្នកភូមិចំនួន៤នាក់និងចាប់ខ្លួនជាង ៤០នាក់ កាលពីព្រឹកថ្ងៃទី២២ ខែមីនា។
ព្រះរាជអាជ្ញាអមសាលាដំបូងខេត្តសៀមរាប លោក ទី សុវិនថាល់ បានបដិសេធចោលចំពោះការបង្រ្កាបដោយប្រើអាវុធនោះថា មិនមែនជាការដឹកនាំរបស់លោកទេ ដោយលោកគ្រាន់តែទៅកាន់កន្លែងកើតហេតុតាមការស្នើសុំពីអភិបាលស្រុកជីក្រែងនិងអធិការនគរបាលឲ្យចូលរួមទៅពិនិត្យកន្លែងកើតហេតុប៉ុណ្ណោះ តែលោកទៅមិនទាន់ដល់កន្លែងនោះផងនៅចម្ងាយជាង ៣គីឡូម៉ែត្រទៀត ក៏ទទួលបានព័ត៌មាននៃការបាញ់រះទៅហើយ។
ទោះយ៉ាងណា លោក ទី សុវិនថាល់ បានបន្ថែមថា លោកនឹងឲ្យសមត្ថកិច្ចកសាងសំណុំរឿងដើម្បីរកមុខនិងចាត់ការផ្លូវច្បាប់ចំពោះកងកម្លាំងដៃដល់ក្នុងការបាញ់រះនោះ ប៉ុន្តែលោកគំរាមថា នឹងប្តឹងកាសែតនិងវិទ្យុអាស៊ីសេរីដែលបានផ្សាយថា លោកជាអ្នកដឹកនាំការបង្រ្កាបនោះ។
លោក ទី សុវិនថាល់ មានប្រសាសន៍ដូច្នេះថា ៖ «បើរកឃើញថាខ្ញុំបានទៅដល់កន្លែងកើតហេតុ ហើយខ្ញុំបានបញ្ជាខុសច្បាប់ ខ្ញុំសុខចិត្តចូលគុក»។
អភិបាលខេត្តសៀមរាបលោក ស៊ូ ភិរិន្ទ បានមានប្រសាសន៍ថា ទំនាស់ដីស្រែប្រាំងជាង ៩០ហិកតាររវាងប្រជាពលរដ្ឋឃុំជីក្រែងនិងប្រជាពលរដ្ឋឃុំអន្លង់សំណរ គឺខេត្តបានខិតខំប្រឹងប្រែងដោះស្រាយជាច្រើនលើកច្រើនសាជាយូរមកហើយ ហើយលោកមានការសោកស្តាយចំពោះហេតុកាណ៍បាញ់រះមកលើប្រជាពលរដ្ឋអ្នកតវ៉ាបណ្តាលឲ្យរងរបួសនោះ ដោយខេត្តសុខចិត្តទទួលចេញថ្លៃព្យាបាលអ្នករបួសទាំងអស់និងនៅតែបន្តស្វែងរកដំណោះស្រាយបញ្ហានោះឲ្យប្រសើរឡើងឡើងវិញ ៖ «ព្យាបាល លុយហ្នឹងខេត្តចេញឲ្យ គ្នាក្រីក្រ»។
កាលពីរសៀលថ្ងៃទី២៣ ខែមីនា មន្ត្រីខេត្តមួយក្រុមដែលដឹកនាំដោយអភិបាលខេត្តផ្ទាល់បានចុះទៅពិនិត្យកន្លែងកើតហេតុនិងសិក្សាដីទំនាស់ដើម្បីរៀបចំបែងចែកជាថ្មី។
តាមព័ត៌មានចុងក្រោយរហូតមកដល់ល្ងាចថ្ងៃច័ន្ទ ឲ្យដឹងថា មានប្រជាពលរដ្ឋមួយចំនួនបានបាត់ខ្លួននៅឡើយ បន្ទាប់ពីការបាញ់រះជាច្រើនរយគ្រាប់ពីសមត្ថកិច្ច ហើយចំណែកមនុស្សជាង ៤០នាក់ដែលសមត្ថកិច្ចបានចាប់ខ្លួនត្រូវបានដោះលែងឲ្យត្រឡប់ទៅផ្ទះវិញជាង ៣០នាក់៕