លោក ជូង ជូងី ជាមេធាវីរបស់លោក ហង្ស ចក្រា បានមានប្រសាសន៍នៅក្រៅតុលាការសាលាឧទ្ធរណ៍ ក្រោយពីការប្រកាសសាលដីកានោះថា លោកមិនទទួលស្គាល់ការសម្រេចនេះទេ ៖ «ពីព្រោះទី១ អត់មានកើតកោលាហល កើតចេញពីការផ្សាយព័ត៌មាន។ ការតម្កល់សាលក្រមរបស់សាលាឧទ្ធរណ៍នេះ គឺមិនត្រឹមត្រូវទេ»។
សវនាការរបស់តុលាការសាលាឧទ្ធរណ៍នេះ បានធ្វើទ្បើងក្រោមអធិបតីភាពរបស់ចៅក្រម ៣នាក់ និងមានវត្តមានលោក សួង ចាន់ថន ជាមេធាវីរបស់រដ្ឋាភិបាលកម្ពុជាជាដើមចោទ លោក ហង្ស ចក្រា ជាចុងចោទ និងមេធាវីរបស់លោក គឺលោក ជូង ជូងី មានព្រះរាជអាជ្ញា សកម្មជនអង្គការសិទ្ធិមនុស្សជាតិនិងអន្តរជាតិ តំណាងស្ថានទូតអាមេរិកនៅកម្ពុជា និងតំណាងរាស្រ្តគណបក្សសមរង្ស៊ីមួយចំនួន បានចូលរួមតាមដានសវនាការជាច្រើននាក់នៅពេញបន្ទប់សវនាការនោះ។
លោក សេង ស៊ីវុត្ថា ជាចៅក្រមជម្រះក្តី នៅក្នុងចំណោមចៅក្រមប្រឹក្សាចំនួន២រូបទៀត បានអានសាលដីកាដូច្នេះថា តុលាការសាលាឧទ្ធរណ៍សម្រេចតម្កល់សាលក្រមផ្តន្ទាទោសរបស់តុលាការសាលាដំបូងរាជធានីភ្នំពេញ ចាត់ទុកជាបានការ។ ហើយតុលាការសាលាឧទ្ធរណ៍បង្គាប់ឲ្យបន្តឃុំខ្លួនលោក ហង្ស ចក្រា ជាបន្តទៀត។
លោក ហង្ស ចក្រា ត្រូវបានក្រុមឆ្មាំគុកព្រៃស បានដាក់ខ្នោះដៃនាំខ្លួនទៅចូលរថយន្ត ដឹកទៅឃុំខ្លួននៅក្នុងព្រៃសវិញ នៅមុនពេលការប្រកាសសាលដីកាខាងលើនេះ ក្រោយពីលោកបានធ្វើសំណូមពរជាចុងក្រោយនៅក្នុងសវនាការនោះថា លោកសុំទោសចំពោះការផ្សាយកន្លងមក និងសុំឲ្យតុលាការលើកលែងការចោទប្រកាន់និងដោះលែងឲ្យមានសេរីភាពវិញដើម្បីជួបជុំគ្រួសារ។
លោក សួង ចាន់ថន ជាមេធាវីរបស់រដ្ឋាភិបាលកម្ពុជាដែលជាដើមបណ្ដឹង បានមានប្រសាសន៍ថា លោកពេញចិត្តចំពោះការសម្រេចខាងលើនេះ ៖ «ខ្ញុំដើមបណ្ដឹង ខ្ញុំយល់ថា យើងអាចទទួលយកបាន»។
ផ្ទុយទៅវិញ លោក អំ សំអាត ជាប្រធានផែ្នកស៊ើបអង្កេតនៃអង្គការសិទ្ធិមនុស្ស លីកាដូ ដែលបានតាមដានសំណុំរឿងក្តីនេះកន្លងមក បានថែ្លងថា លោកមានការសោកស្តាយ ៖ «ការសម្រេចរបៀបនេះគឺជាការមួយដែលបំបាក់ស្មារតី ឬក៏សិទ្ធិសេរីភាពក្នុងការបញ្ចេញមតិ»។
លោក សុន ឆ័យ តំណាងរាស្ត្រគណបក្សសមរង្ស៊ី ដែលបានទៅតាមដានសវនាការនោះដែរ បានមានប្រសាសន៍អត្ថាធិប្បាយថា ៖ «អ្វីដែលជាការសម្រេចរបស់តុលាការ គឺបានបង្ហាញពីជំហររបស់គណបក្សកាន់អំណាចក្នុងការផ្ដន្ទាទោសអ្នកដែលហ៊ានមានយោបល់រិះគន់ដល់រដ្ឋាភិបាល»។
លោក ហង្ស ចក្រា អាយុ ៥៥ឆ្នាំ មានឈ្មោះក្រៅថា ជ័យ ឧត្តម ជាចាងហ្វាងកាសែត«ខែ្មរម្ចាស់ស្រុក» ត្រូវបានតុលាការសាលាដំបូងរាជធានីភ្នំពេញ បានផ្តន្ទាទោសឲ្យជាប់គុក១២ខែ និងផាកពិន័យជាប្រាក់ចំនួន ៩លានរៀល កាលពីថៃ្ងទី២៦ ខែមិថុនា កន្លងទៅនេះ ក្រោមបទផ្សាយព័ត៌មានមិនពិត ក្រោយពីកាសែតរបស់លោកបានចេញផ្សាយព័ត៌មានមួយចំនួន ក្រោមចំណងជើងថា លោកនាយករដ្ឋមន្រ្តី ហ៊ុន សែន បានបំបែកសម្បុកមន្រ្តីពុករលួយនិងមន្រ្តីអាក្រក់នៅជុំវិញលោក សុខ អាន៕