ការព្រមានរបស់មន្ត្រីខ្មែរ បានធ្វើឡើងដើម្បីឆ្លើយតបទៅនឹងអាជ្ញាធរថៃ ដែលបានហាមឃាត់កសិផលខ្មែរមិនឲ្យនាំចេញទៅកាន់ទីផ្សារប្រទេសថៃ កាលពីពេលថ្មីៗកន្លងមកនេះ។
លោក វ៉ាត ប៉ារ៉ានីន នាយករដ្ឋបាលសាលាខេត្តឧត្តរមានជ័យ បានមានប្រសាសន៍កាលពីរសៀលថ្ងៃសៅរ៍ ទី២៦ ខែមីនា ថា កាលពីថ្ងៃទី២៥ ខែមីនា កន្លងទៅ មន្ត្រីច្រកទ្វារព្រំដែនថៃ នៅជាំសាង៉ាំ បានហាមឃាត់មិនឲ្យទំនិញកសិផលខ្មែរ មានក្រូចឆ្មារ និងដូងទុំ ចេញទៅលក់ក្នុងទីផ្សារថៃ បានទេ។
មន្ត្រីដដែលបានមានប្រសាសន៍ថា ការហាមឃាត់នេះដោយសារតែក្រូចឆ្មារខ្មែរមានរសជាតិឆ្ងាញ់ជាងក្រូចឆ្មារថៃ ហើយការនាំចេញទៅលក់នៅប្រទេសថៃ គឺក្រូចឆ្មារខ្មែរ១ផ្លែមានតម្លៃតែ១បាតកន្លះ (ប្រាក់ថៃ) ប៉ុណ្ណោះ បើប្រៀបធៀបទៅនឹងក្រូចឆ្មារថៃ ១ផ្លែលក់ថ្លៃរហូតដល់ទៅ ៤បាតនោះ ៖ «នេះគឺជាការព្រមាន បើសិនជានៅតែបិទមិនឲ្យភោគផលកសិកម្មកម្ពុជាចូលទៅទេ គឺយើងនឹងមិនឲ្យភោគផលកសិកម្មចូលដូចគ្នា។ នេះគឺជាការព្រមាន មិនមែនជាការបិទតែម្ដងទេ»។
អាជ្ញាធរខ្មែរប្រចាំច្រកទ្វារព្រំដែនជាំសាង៉ាំ បានឲ្យដឹងថា បន្ទាប់ពីការព្រមាននេះ គឺថៃបានមកទាក់ទងសមត្ថកិច្ចខ្មែរប្រចាំច្រកជាំសាង៉ាំ ដោយថា គេសុខចិត្តអនុញ្ញាតឲ្យនាំចេញក្រូចឆ្មាររបស់ខ្មែរទៅលក់ក្នុងប្រទេសថៃ ក៏ប៉ុន្តែគេត្រូវឲ្យបង់ពន្ធចំនួន ៣០%។ ទោះយ៉ាងណាការតម្រូវឲ្យបង់ពន្ធថ្លៃនាំចេញក្រូចឆ្មាររហូតដល់ទៅ ៣០% នោះ ត្រូវមន្ត្រីខ្មែរបដិសេធ។
លោក នេត្រ តារា ប្រធានច្រកទ្វារព្រំដែនជាំសាង៉ាំ ស្រុកអន្លង់វែង បានមានប្រសាសន៍ថា រហូតមកដល់ថ្ងៃទី២៦ ខែមីនានេះ ស្ថានភាពនៃការនាំទំនិញកសិផលចេញចូលរវាងខ្មែរ-ថៃ មានភាពជាធម្មតាវិញហើយ បន្ទាប់ពីថៃ បានហាមឃាត់ទំនិញកសិផលខ្មែរកាលពីថ្ងៃ២៥ ខែមីនា ហើយមន្ត្រីខេត្តឧត្តរមានជ័យ របស់ខ្មែរបានព្រមានមកនោះ។
លោកបន្តថា ៖ «ថ្ងៃនេះយើងធម្មតាហើយ ឯកឧត្ដមគំរាមបិទថ្ងៃនេះនោះ ដោយសារតែវាពាក់ព័ន្ធអារឿងក្រូចឆ្មារយើងអីយើងមិនឲ្យចូល អ៊ីចឹងទៅគាត់សុំចរចាសុំឲ្យចូលឲ្យអីវិញទៅធម្មតាវិញទៅ»។
អាជ្ញាធរខ្មែរនៃខេត្តឧត្តរមានជ័យ បានឲ្យដឹងថា ជាយូរមកហើយរហូតដល់ពេលនេះ គឺខាងថៃទេដែលតែងនាំទំនិញកសិផលជាច្រើនចូលមកលក់នៅកម្ពុជា ដូចជាបន្លែផ្លែឈើសព្វបែបយ៉ាង ដើម្បីបំពេញសេចក្ដីត្រូវការក្នុងតំបន់ ប៉ុន្តែពេលបច្ចុប្បន្ននេះប្រសិនបើថៃ ហាមឃាត់មិនឲ្យនាំចេញកសិផលខ្មែរទៅលក់នៅស្រុកថៃ ហើយខ្មែរបិទមិនឲ្យទំនិញកសិផលថៃ ចូលមកខ្មែរវិញនោះ អ្នកខាតបង់មិនមែនខ្មែរទេ គឺខាងភាគីថៃ ជាអ្នកខាតយ៉ាងច្រើន៕