លោក ឈូក អាង មេបញ្ជាការនៃវរសេនាតូចការពារព្រំដែន៩១១ បានមានប្រសាសន៍ឲ្យដឹងថា នៅព្រឹកថ្ងៃច័ន្ទ ទី២៣ ខែសីហា ឆ្នាំ២០១០ កងកម្លាំងរដ្ឋាភិបាលខ្មែរបានប្រុងជើងការក្នុងការបាញ់ប្រហារទៅលើក្រុមបាតុករអាវលឿងថៃ។ ក្រុមបាតុករអាវលឿងថៃទាំងនោះ បានប្រមូលផ្តុំគ្នាក្នុងទឹកដីខេត្តស្រះកែវថៃ កៀកព្រំដែនខ្មែរ ក្នុងខេត្តបន្ទាយមានជ័យ ក្នុងគោលដៅសម្រុកឆ្លងដែនចូលដីខ្មែរធ្វើបាតុកម្ម ៖ «ក្រុមអាវលឿងមានគោលការឆ្លងព្រំដែនចូលហួសព្រំដែន ព្រោះតំបន់នោះ ព្រំដែនមិនទាន់ច្បាស់លាស់ អ៊ីចឹងគេប្រុងកំណត់ទិសដៅថា ដីគេដល់នេះៗ ស្រេចវាថាខ្លួនវា ទទួលព័ត៌មានអ៊ីចឹងយើងដាក់កម្លាំងការពាររឹងម៉ាំ កាលណាចូលគ្មានអីក្រៅពីកម្ទេចចោលប៉ុណ្ណឹង បទបញ្ជារបស់សម្ដេច លោកបានប្រកាសហើយ យើងមិនឈ្លានពានគេ គេក៏មិនត្រូវឈ្លានពានយើង តែបើគេឈ្លានពានទឹកដីយើងៗ ការពារខ្លួនដែរ»។
ជាមួយគ្នានេះ មេបញ្ជាការកងទាហានឈុតខ្មៅ និងអាជ្ញាធរមូលដ្ឋានថៃ និងកងការពារព្រំដែនរដ្ឋាភិបាលខ្មែរ រួមជាមួយអាជ្ញាធរមូលដ្ឋាន បានបើកកិច្ចជំនួបមួយជាបន្ទាន់ ដើម្បីទប់ស្កាត់ស្ថានការណ៍ខាងលើនេះ។
ការព្យាយាមរបស់ក្រុមបាតុករអាវលឿងថៃទាំងនោះ បានស្ងប់ស្ងាត់ទៅវិញនៅរសៀលថ្ងៃដដែល បន្ទាប់ពីកងទាហានឈុតខ្មៅថៃរាប់រយនាក់បានបណ្ដាក់គ្នាការពារទប់ស្កាត់ នៅតាមខ្សែក្រវាត់ព្រំដែន។
មន្ត្រីខ្មែរបានថ្លែងថា ការប៉ុនប៉ងឆ្លងដែនចូលដីខ្មែរធ្វើបាតុកម្មរបស់ក្រុមអាវលឿងថៃ គឺគ្មានមូលដ្ឋានច្បាស់លាស់ទេ ប៉ុន្តែពួកគេមានគោលដៅបង្កើតភាពចលាចលនៅតាមតំបន់ព្រំដែន។
កងការពារព្រំដែនរដ្ឋាភិបាលខ្មែរបានឲ្យដឹងថា ប្រជាពលរដ្ឋខ្មែរចំនួន៤០នាក់ ដែលឆ្លងដែនទៅធ្វើការក្នុងទឹកដីថៃ ត្រូវបានគេជម្លៀសចេញពីទឹកដីថៃ មកទឹកដីកម្ពុជាបន្ទាប់ពីមានការលុកលុយរបស់ក្រុមបាតុករអាវលឿងថៃ។ ចំណែកច្រករបៀងនានានៅតាមខ្សែក្រវាត់ព្រំដែន ក្នុងខេត្តបន្ទាយមានជ័យ ជាប់ខេត្តស្រះកែវថៃ ក៏ត្រូវបានគេបិតដែរ៕