សកម្មជនគណបក្សប្រឆាំងសមរង្ស៊ី នៅក្នុងខេត្តព្រៃវែង បានឲ្យដឹងនៅថ្ងៃទី១២ ខែធ្នូនេះថា គ្រួសារប្រជាពលរដ្ឋខ្មែរមួយចំនួននៅតាមបណ្ដោយព្រំដែនកម្ពុជា-វៀតណាម បានបញ្ចាំដីស្រែ និងលក់ដីស្រែរបស់គាត់ ដើម្បីដោះបំណុល ដែលជំពាក់វៀតណាម លើថ្លៃជី ថ្លៃប្រេង និងថ្លៃថ្នាំសម្លាប់សត្វល្អិតជាដើម។
ក្រុមប្រជាពលរដ្ឋខ្មែរបានឲ្យដឹងថា បើសិនណាមិនមានលទ្ធភាពសងបំណុលនោះទេ ម្ចាស់បំណុលជាជនជាតិវៀតណាម គេនឹងរឹបអូសយកដីស្រែទាំងនោះទៅតាមកិច្ចសន្យា។
ដីស្រែដែលត្រូវបានដាក់បញ្ចាំ និងលក់នោះ មានចំនួនរវាង ១ហិកតារ ទៅ២ហិកតារ ក្នុងគ្រួសារនីមួយៗ។
ប្រធានចលនាយុវជនគណបក្សប្រឆាំងសមរង្ស៊ី នៅក្នុងខេត្តព្រៃវែង លោក អ៊ុន សំអឿន អាយុ២៩ឆ្នាំ បានមានប្រសាសន៍ប្រាប់វិទ្យុអាស៊ីសេរី នៅថ្ងៃអាទិត្យនេះថា ភាគច្រើននៃគ្រួសារទាំងនោះ កំពុងតែព្យាយាមខ្ចីបុលពីធនាគារឈ្មោះ អម្រឹត និងធនាគារឈ្មោះ ក្រេឌិត ដើម្បីយកទៅសងបំណុលដែលជំពាក់វៀតណាម ៖ "អ៊ីចឹងសុំសំណូមពរដល់រាជរដ្ឋាភិបាល មេត្តាជួយពិនិត្យឡើងវិញ ដល់នូវគោលនយោបាយរបស់រាជរដ្ឋាភិបាល ថាកាត់បន្ថយភាពក្រីក្រ"។
ប្រជាពលរដ្ឋរស់នៅខេត្តព្រៃវែង ជាប់និងព្រំដែនកម្ពុជាភាគច្រើនបានធ្វើចំណាកស្រុកទៅក្រុងប៉ោយប៉ែត ខេត្តបន្ទាយមានជ័យ និងចូលក្នុងប្រទេសថៃ ដើម្បីស្វែងរកប្រាក់កម្រៃចិញ្ចឹមជីវិត និងដោះបំណុល។
កសិករម្នាក់ សុំមិនប្រាប់ឈ្មោះ អាយុ៣១ឆ្នាំ នៅក្នុងភូមិឥដ្ឋ ឃុំឫស្សីស្រុក ស្រុកពាមជរ ខេត្តព្រៃវែង ជាប់ព្រំដែនកម្ពុជា-វៀតណាម បានថ្លែងថា ជីវភាពរស់នៅមានសភាពក្រីក្រលំបាក ហើយបានជំពាក់បំណុលវន្តក ៖ "នៅតែដីភូមិតិច ខ្លាចគេមករឹបអូសយកដីភូមិទៀតមិនដឹង។ យើអត់មានអ្វីសងគេ។ គេមកប្ដឹងភូមិ ប្ដឹងឃុំឲ្យរកលុយសង់គេ បើគ្មានលុយសង់គេ គេយកដី។ កសិករយួន"។
ទាក់ទងនិងបញ្ហានេះ ប្រធានគណៈកម្មការកិច្ចការងារព្រំដែនរបស់រដ្ឋាភិបាលកម្ពុជា លោក វ៉ា កឹមហុង បានមានប្រសាសន៍ថា លោកមិនទាន់បានដឹងរឿងនេះទេ ៖ "ខ្ញុំអត់បានទទួលដំណឹងទេ។ បើថា បញ្ចាំនោះ អេស៊ី អម្រឹត និង ក្រេឌិត អាហ្នឹងមាន"។
មេធាវី និងអ្នកច្បាប់នៅក្នុងប្រទេសកម្ពុជា លោក ជូង ជូងី បានមានប្រសាសន៍ថា ជនបរទេសមិនមានសិទ្ធិកាន់កាប់កម្មសិទ្ធិនៅក្នុងប្រទេសកម្ពុជាទេ ៖ "សួរខាងខេត្ត ប្រហែលដឹងជាង ឬអាជ្ញាធរដែនដី ខ្ញុំមិនបានក្ដាប់សំណុំរឿងហ្នឹងបានទេ។ មិនដឹងការពិតប៉ុណ្ណា អ្វីជាកុងត្រាគេ"។
មេដឹកនាំប្រទេសកម្ពុជា លោក ហ៊ុន សែន និងមេដឹកនាំប្រទេសវៀតណាម លោក ង្វៀន តាន់យ៉ុង ជានាយករដ្ឋមន្ត្រី បានឯកភាពគ្នាកាលពីថ្ងៃទី១៥ ខែវិច្ឆិកា កន្លងទៅនេះនៅក្នុងទីក្រុងភ្នំពេញថា ប្រទេសទាំងពីរនឹងពន្លឿនការបោះបង្គោលព្រំដែនឲ្យចប់សព្វគ្រប់ នៅដំណាច់ឆ្នាំ២០១២ ខាងមុខ។
កម្ពុជា និងវៀតណាមបានបោះបង្គោលព្រំដែនតាំងពីឆ្នាំ២០០៦ មក បានចំនួន២០៩ បង្គោលហើយ នៅក្នុងចំណោមបង្គោលសរុប៣៧៥បង្គោល ដែលមានព្រំដែនជាប់ជាមួយគ្នាចំនួន ១.២២៨គីឡូម៉ែត្រ៕