នៅក្នុងលិខិតជូនដំណឹងមួយរបស់ក្រសួងព័ត៌មាន ដាក់ជូននាយកស្ថានីយវិទ្យុសំបុកឃ្មុំ នៅថ្ងៃទី៧ មេសា បានសរសេរថា ក្នុងរយៈពេលថ្មីៗនេះ ក្រសួងបានសង្កេតឃើញថា ស្ថានីយនេះបានជួលម៉ោងផ្សាយទៅឲ្យវិទ្យុខ្មែរប៉ុស្តិ៍ AM 9960 KHz ដែលបានធ្វើការចាក់ផ្សាយឡើងវិញនូវកម្មវិធីចាប់ពីម៉ោង ១០ ដល់ម៉ោង ១១ព្រឹក ដែលបានបំពានលើប្រកាសលេខ ៥៥០ ជាការណែនាំរបស់ក្រសួងព័ត៌មាន។
ប្រធាននាយកដ្ឋានសោតទស្សន៍នៃអគ្គនាយកដ្ឋានព័ត៌មាន និងសោតទស្សន៍ លោក សាន ពុទ្ធារី បានបញ្ជាក់បន្ថែមចំពោះការចេញលិខិតឲ្យបិទការផ្សាយកម្មវិធី ៖ «គោលការណ៍ណែនាំក្នុងអាជ្ញាប័ណ្ណ បានបញ្ជាក់ថា រាល់ការជួលម៉ោងផ្សាយត្រូវមានការអនុញ្ញាតពីក្រសួងព័ត៌មាន»។
មន្ត្រីរដ្ឋបាលនៃស្ថានីយវិទ្យុសំបុកឃ្មុំ FM 105 MHz លោក ឡេង គីរី បានឲ្យដឹងថា ស្ថានីយវិទ្យុសំបុកឃ្មុំនៅពេលនេះ នៅពុំទាន់សម្រេចយ៉ាងណានោះទេ បញ្ហានេះកំពុងស្ថិតនៅក្នុងការពិចារណា និងជជែកពិភាក្សាគ្នា។
លោកបន្តថា ៖ «ខាងក្រសួងព័ត៌មានគេមកគំរាមខាងវិទ្យុសំបុកឃ្មុំថា គេឲ្យបិទ បញ្ឈប់ការផ្សាយវិទ្យុខ្មែរប៉ុស្តិ៍នេះ។ បើសិនជាខាងវិទ្យុសំបុកឃ្មុំហ៊ានផ្សាយវិទ្យុខ្មែរប៉ុស្តិ៍នេះបន្តទៀត គេនឹងដកអាជ្ញាប័ណ្ណពីក្រសួងព័ត៌មាន គឺបញ្ឈប់ការផ្សាយវិទ្យុសំបុកឃ្មុំទាំងស្រុង»។
ទាក់ទងបញ្ហានេះដែរ អ្នកតំណាងមជ្ឈមណ្ឌលព័ត៌មានខ្មែរប៉ុស្តិ៍ លោក អ៊ិត សុខា បានឆ្លើយតបចំពោះសេចក្ដីប្រកាសរបស់ក្រសួងព័ត៌មានថា ការប្រកាសឲ្យបញ្ឈប់ការផ្សាយរបស់វិទ្យុខ្មែរប៉ុស្តិ៍នេះ ដូចជាទាន់ហន់ពេក ក្នុងពេលដែលលោកបានបំពេញបែបបទផ្លូវច្បាប់រួចរាល់ហើយនោះ។
លោក អ៊ិត សុខា បន្ថែមដូច្នេះ ៖ «ខាងខ្មែរប៉ុស្តិ៍គ្រាន់តែកើតចម្ងល់ ហេតុអីបានជាការចេញលិខិតមកនោះអត់មានការណែនាំ? បើវិទ្យុខ្មែរប៉ុស្តិ៍នោះផ្សាយក្នុងអត្ថន័យអី មានការណែនាំឲ្យមានការកែតម្រូវឡើងវិញ វាជាការមួយស្របតាមសង្គមប្រជាធិបតេយ្យ ស្របតាមច្បាប់សារព័ត៌មានផង បើបិទដោយមិនមានការជូនដំណឹងអ៊ីចឹងគួរឲ្យសោកស្ដាយ»។
ប្រភពដដែលបានឲ្យដឹងថា វិទ្យុខ្មែរប៉ុស្តិ៍នេះ គេបានផ្សាយតាមរយៈប្រព័ន្ធអ៊ិនធឺណិត ប្រមាណ ២ឆ្នាំមកហើយ ក៏ប៉ុន្តែទើបបានជួលម៉ោងផ្សាយពីស្ថានីយវិទ្យុសំបុកឃ្មុំ FM 105 MHz បានជិត ១សប្ដាហ៍នេះប៉ុណ្ណោះ។ ក្នុងកម្មវិធីផ្សាយរបស់វិទ្យុនេះ មានដូចជា ព័ត៌មានក្នុងស្រុក បទវិភាគ បញ្ហាសង្គម ផ្ដោតលើការអភិវឌ្ឍ និងផលប្រយោជន៍របស់ពលរដ្ឋ ព្រមទាំងការកាប់បំផ្លាញព្រៃឈើជាដើម៕