លោកនាយករដ្ឋមន្ត្រី ហ៊ុន សែន បានទទួលយកសំណើរបស់បេសកជនអង្គការយូណេស្កូ (UNESCO ) លោក កូអ៊ី ជីរ៉ូ ម៉ាស៊ូអ៊ូរ៉ា នៅថ្ងៃទី២៨ ខែកុម្ភៈ ដើម្បីបើកកិច្ចចរចាទ្វេភាគី រវាងលោករដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក សុខ អាន ជាមួយសមភាគីថៃ គឺរដ្ឋមន្ត្រីទទួលបន្ទុកផ្នែកបេតិកភណ្ឌ ផ្ដោតលើការដោះស្រាយបញ្ហាជម្លោះប្រាសាទព្រះវិហារ។
ការព្រមព្រៀងទទួលយកសំណើនេះ បានធ្វើឡើងនៅក្នុងជំនួបទ្វេភាគី រវាងលោកនាយករដ្ឋមន្ត្រី ហ៊ុន សែន លោក សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា ជាមួយបេសកជនរបស់អង្គការយូណេស្កូ លោក កូអ៊ីជីរ៉ូ ម៉ាស៊ូអ៊ូរ៉ា នៅឯវិមានសន្តិភាព នៅក្នុងទីក្រុងភ្នំពេញ នៅថ្ងៃទី២៨ ខែកុម្ភៈ។
រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា លោក សុខ អាន បានមានប្រសាសន៍ប្រាប់អ្នកកាសែតក្រោយពីជំនួបនោះថា ការជួបនោះ គឺមានភាគីយូណេស្កូជាសាក្សី ៖ "អ៊ីចឹងយើងជួបគ្នាតាមរបៀបដែលមានផ្លែផ្កា មិនមែនយើងជួបគ្នាដើម្បីឲ្យគេប្រើប្រាស់ក្នុងការអនុវត្តនយោបាយបិទទ្វា ថាខ្ញុំជួបជាមួយកម្ពុជា អ៊ីចឹងអ្នកឯងចាំបាច់មកធ្វើអ្វីទៀត? មិនមែនជួបក្នុងរបៀបហ្នឹងទេ។ គឺអាចជួបគ្នានៅទីស្នាក់ការយូណេស្កូ ដោយមានអ្នកដឹកនាំដែលមានទម្ងន់។ អ្នកដឹកនាំយូណេស្កូចូលរួម"។
លោកបានបញ្ជាក់ថា គេនៅមិនទាន់បានកំណត់កាលបរិច្ឆេទជាក់លាក់នៅឡើយទេ សម្រាប់ការជួបចរចានោះ ប៉ុន្តែនិងអាចមានការជួបចរចាគ្នា នៅមុនកិច្ចប្រជុំត្រៀមមួយ នៅខែឧសភាខាងមុខនេះ នៅក្នុងទីក្រុងប៉ារីស ប្រទេសបារាំង។
កម្ពុជាកំពុងតែត្រៀមខ្លួនចូលរួមនៅក្នុងកិច្ចប្រជុំប្រចាំឆ្នាំ នៃគណៈកម្មាធិការបេតិកភណ្ឌពិភពលោក នៅក្នុងប្រទេសបារ៉ែន (Bahrain) នៅខែមិថុនា ឆ្នាំ២០១១ ខាងមុខនេះ។
កន្លងមកគេសង្កេតឃើញថា ភាគីថៃតែងតែប្រតិកម្មទាមទារឲ្យអង្គការយូណេស្កូដកប្រាសាទព្រះវិហារចេញពីបញ្ជីបេតិកភណ្ឌពិភពលោក និងបានជំទាស់ផែនការចាត់ចែងរបស់កម្ពុជា នៅជុំវិញប្រាសាទព្រះវិហារ។
អ្នកវិភាគនយោបាយនៅក្នុងប្រទេសកម្ពុជា លោក បណ្ឌិត សុខ ទូច បានមានប្រសាសន៍ថា ៖ "ទោះបីជានៅចំណុចណាក៏ដោយ ឲ្យតែមានអ្នកទី៣ ធ្វើជាសាក្សី រាល់ការចរចានៃប្រទេសទាំង២។ វាជាចំណុចល្អមួយ ប៉ុន្តែគ្រាន់តែការចរចានេះមិនទាន់បានដាក់លក្ខខ័ណ្ឌថា ទៅលើបុព្វហេតុអី"។
មន្ត្រីអ្នកនាំពាក្យរបស់ទីស្ដីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍កាលពីថ្ងៃទី២ ខែកុម្ភៈថា កម្ពុជាមិនមានការប្រែប្រួលទេ ក្នុងការដាក់ផែនការចាត់ចែងពីរឿងប្រាសាទព្រះវិហារនេះ នៅក្នុងកិច្ចប្រជុំនៅក្នុងប្រទេសបារ៉ែន នៅខែមិថុនាខាងមុខនេះ៕