កសិករខ្មែរកម្ពុជាក្រោមម្នាក់ កំពុងតែរត់លាក់ខ្លួនដោយសារតែមានភ្នាក់ងារនគរបាលវៀតណាម ក្នុងឯកសណ្ឋានជាស៊ីវិលចំនួន ៤នាក់ បានស្វែងរកចាប់ខ្លួនកាលពីយប់ថ្ងៃទី៩ ខែកញ្ញាថ្មីៗ នេះ ដោយសារតែលោកបានដឹកនាំការទាមទារដីធ្លីពីដូនតា ពីការរឹបអូសរបស់អាជ្ញាធរវៀតណាម និងដោយសារបុរសរូបនេះតែងតែទម្លាយព័ត៌មានអំពីការតវ៉ាដីធ្លី និងការរំលោភសិទ្ធិមនុស្ស របស់អាជ្ញាធរវៀតណាម ឲ្យពិភពខាងក្រៅបានដឹងឮកន្លងមកនេះ។
កសិករខ្មែរកម្ពុជាក្រោមនៅក្នុងឃុំអាងគឺ ស្រុកទិនបៀង ខេត្តអានយ៉ាង ឬខេត្តមាត់ជ្រូក ទឹកដីខ្មែរកម្ពុជាក្រោម ដែលសុំមិនប្រាប់ឈ្មោះ បានថ្លែងប្រាប់វិទ្យុអាស៊ីសេរីតាមទូរស័ព្ទមកថា លោកគ្មានសុវត្ថិភាពទេនាពេលនេះ ៖ «គេថាខ្ញុំហ្នឹងហេតុអីបានជាស្រែកឲ្យអន្តរជាតិដឹងរឿងផ្ទៃក្នុងរបស់វាហ្នឹង។ ខ្ញុំនៅតែស្រែកអ៊ីចឹងមកអំពីខ្ញុំបាត់ដីស្រែចម្ការអស់ហើយ។ អាជ្ញាធរអត់ដោះស្រាយឲ្យខ្ញុំ»។
លោកបានអះអាងថា លោកបានរត់លាក់ខ្លួនកាលពីយប់ថ្ងៃទី៩ ខែកញ្ញាថ្មីៗនេះ នៅគ្រាដែលក្រុមគ្រួសារបានទូរស័ព្ទប្រាប់លោកឲ្យដឹងថា មានក្រុមនគរបាលវៀតណាមក្នុងឯកសណ្ឋានជាស៊ីវិល ចំនួន៤នាក់ បានមកស្វែងរកចាប់ខ្លួននៅផ្ទះ។
វិទ្យុអាស៊ីសេរីបានទាក់ទងតាមរយៈទូរស័ព្ទទៅស្ថានទូតវៀតណាម នៅក្នុងទីក្រុងភ្នំពេញ ប្រទេសកម្ពុជា ដើម្បីសុំការបំភ្លឺថា តើស្ថានភាពរស់នៅរបស់គ្រួសារខ្មែរកម្ពុជាក្រោមនោះ មានសភាពតានតឹងដូចការអះអាង ឬយ៉ាងណា ប៉ុន្តែអ្នកឆ្លើយទូរស័ព្ទបានប្រាប់ថា អ្នកនាំពាក្យមិននៅក្នុងការិយាល័យទេ។
ប្រធានសហគមន៍ខ្មែរកម្ពុជាក្រោម នៅក្នុងប្រទេសកម្ពុជា លោក ថាច់ សេដ្ឋា បានមានប្រសាសន៍ថា ៖ «ខ្ញុំមានការព្រួយបារម្ភយ៉ាងខ្លាំង ពីព្រោះនេះវាជាទម្លាប់របស់កុម្មុយនិស្ត ដែលតាមដានចំពោះអ្នកណាដែលងើបទាមទារតវ៉ាស្អីមួយហ្នឹង គឺជាមុខសញ្ញាដែលគេត្រូវតែតាមដានយ៉ាងដិតដល់។ ហើយនឹងឈានដល់មានការចាប់ខ្លួន។ ហើយខ្ញុំមានការព្រួយបារម្ភមែនទែនចំពោះសុវត្ថិភាពរបស់គាត់»។
កសិករខ្មែរកម្ពុជាក្រោមរូបនេះ បានឲ្យដឹងថា លោកធ្លាប់បានដឹកនាំការតវ៉ាទាមទារដីស្រែពីដូនតាជាច្រើនលើក ចាប់តាំងពីឆ្នាំ២០០៧មក នៅក្នុងទីក្រុងព្រៃនគរ និងទីក្រុងហានណូយ (Hanoi) ប្រទេសវៀតណាម។ ក្រៅពីនេះ លោកតែងតែរិះគន់អាជ្ញាធរវៀតណាម ចំពោះការរំលោភបំពានសិទ្ធិសេរីភាពមកលើគ្រួសារខ្មែរកម្ពុជាក្រោម៕