សម្ដេច​ឪ​ចារ​ព្រះ​លិខិត​តប​នឹង​ខ្មែរ​នៅ​ក្រៅ​ប្រទេស​ដែល​រិះ​គន់​ព្រះ​អង្គ

អតីត​ព្រះ​មហាក្សត្រ​ខ្មែរ បាន​មាន​ព្រះ​រាជ​បន្ទូល​ក្នុង​ព្រះ​រាជ​លិខិត​មួយ​ចុង​ក្រោយ​នេះ បបួល​ខ្មែរ​នៅ​ក្រៅ​ប្រទេស​ដែល​រិះ​គន់​ព្រះ​អង្គ ឲ្យ​វិល​ចូល​ស្រុក​ដើម្បី​បម្រើ​ជាតិ​និង​ប្រជាជន​ខ្មែរ។

កាល​ពី​ថ្ងៃ​អាទិត្យ​ម្សិល​មិញ​នេះ អតីត​ព្រះ​មហាក្សត្រ​ព្រះ​បាទ នរោត្តម សីហនុ ទ្រង់​បាន​ចារ​លិខិត​ជា​ភាសា​បារាំង ជូន​ដំណឹង​ដល់​ជន​រួម​ជាតិ​ថា មាន​ខ្មែរ​ដែល​រស់​នៅ​ប្រទេស​កាណាដា បារាំង និង​ប្រទេស​ដទៃ​ផ្សេង​ទៀត បាន​សរសេរ​ទៅ​រិះគន់​ព្រះអង្គ​ថា ព្រះអង្គ​ទ្រង់​សព្វ​ព្រះ​ហឫទ័យ​ប្រថាប់​នៅ​តែ​ប្រទេស​ចិន ជា​ជាង​នៅ​កម្ពុជា ដែល​ជា​ប្រទេស​កំណើត​របស់​ព្រះអង្គ ហើយ​ពួក​គេ​បាន​យាង​ព្រះអង្គ​ឲ្យ​ត្រឡប់​ទៅ​ប្រថាប់​នៅ​កម្ពុជា​វិញ។

ព្រះ​បាទ នរោត្តម សីហនុ ទ្រង់​បាន​ចារ​ឲ្យ​ជន​ជាតិ​ខ្មែរ​បាន​ដឹង​ថា ខណៈ​នេះ​ព្រះអង្គ​កំពុង​ទទួល​ការ​ព្យាបាល​ជំងឺ​មហារីក​ដែល​យាយី​ព្រះអង្គ​ជា​លើក​ទី​៣ ហើយ​លើក​នេះ​គឺ​ជា​មហារីក​គ្រាប់​ឈាម​ស ដែល​ចាំបាច់​ត្រូវ​ព្យាបាល​ដោយ​ឱសថ ដោយ​ការ​បន្តក់​ថ្នាំ និង​វិធី​ផ្សេងៗ​ទៀត។

ព្រះអង្គ​ក៏​បាន​ចារ​ដែរ​ថា ព្រះអង្គ​ស្រឡាញ់​គោរព​និង​កោត​សរសើរ​សាធារណរដ្ឋ​ប្រជា​មានិត​ចិន​ដែល​មាន​គុណ​បំណាច់​លើ​ព្រះអង្គ​ដោយ​បាន​ជួយ​ព្យាបាល​ឲ្យ​ព្រះអង្គ​បាន​ជា​សះ​ស្បើយ​ពី​ជំងឺ​មហារីក ២​លើក​មុន​នេះ​ក៏​ពិត​មែន តែ​ព្រះអង្គ​មិន​ដែល​ឈប់​បម្រើ​មាតុ​ប្រទេស​និង​ប្រជាជន​ខ្មែរ​ឡើយ។

ក្រៅ​ពី​នេះ ចំណារ​ជូន​ដំណឹង​របស់​អតីត​ព្រះ​មហាក្សត្រ​ខ្មែរ​ក៏​ត្រូវ​បញ្ចប់​ឡើង​ដោយ​ព្រះ​សំណួរ​ឡង​ទៅ​កាន់​ជន​ជាតិ​ខ្មែរ​ដែល​ទៅ​រស់​នៅ​ប្រទេស​កាណាដា បារាំង។ល។ ថា ហេតុអ្វី​បាន​ជា​ពួកគេ​មិន​ត្រឡប់​មក​រស់​នៅ​ឯ​មាតុ​ប្រទេស​វិញ​ដើម្បី​បម្រើ​ប្រទេស​ជាតិ​និង​ប្រជាជន​ខ្មែរ៕