ព្រះសង្ឃខ្មែរកម្ពុជាក្រោម ចំនួនពីរអង្គ គង់នៅវត្តមួយ នាខេត្តព្រះត្រពាំង មានថេរៈដីកាថា បន្ទាប់ពីបានវិលពីចូលរួមពិធីបុណ្យរំលឹកខួបទី៦១ឆ្នាំ ថ្ងៃបាត់បង់ទឹកដីខ្មែរកម្ពុជាក្រោម នាទីក្រុងភ្នំពេញ នៅពេលវិលទៅកម្ពុជាក្រោមវិញ ត្រូវអាជ្ញាធរវៀតណាមដាក់កម្លាំងឃ្លាំមើល និងបានសួរពីដំណើររឿងជាច្រើន។
ព្រះសង្ឃ ព្រះនាម ជា រិទ្ធី ស្ថិតក្នុងចំណោមព្រះសង្ឃពីរអង្គ គង់នៅវត្តមួយក្នុងខេត្តព្រះត្រពាំង មានសង្ឃដីកាឲ្យវិទ្យុអាស៊ីសេរីដឹងកាលពីថ្ងៃទី១៩ ខែមិថុនាថា បន្ទាប់ពីព្រះអង្គ និងព្រះសង្ឃមួយអង្គផ្សេងទៀត និមន្តវិលត្រឡប់ពីទីក្រុងភ្នំពេញ ត្រូវបានអាជ្ញាធរវៀតណាមគំរាម និងតាមឃ្លាំមើលជាប្រចាំ ៖ «ទៅយួនហ្នឹងគេសាកសួរ។ សួរអំពីធ្វើខួបខ្មែរកម្ពុជាក្រោមបាត់បង់ទឹកដី។ សាកសួរអំពីថា ទៅវត្តណាខ្លះ ហើយមានចូលទីប្រជុំអីអ៊ីចឹងទេ»។
នៅក្នុងពិធីរំលឹកខួបលើកទី៦១ឆ្នាំ ថ្ងៃបាត់បង់ទឹកដីកម្ពុជាក្រោម កាលពីថ្ងៃទី៤ ខែមិថុនា លោក ថាច់ សេដ្ឋា ប្រធានសមាគមខ្មែរកម្ពុជាក្រោម មានប្រសាសន៍ថា ពលរដ្ឋខ្មែរក្រោម ជាពិសេសព្រះសង្ឃ នៅពេលធ្វើដំណើរ ឬនិមន្តមកកាន់ប្រទេសកម្ពុជាម្ដងៗ គឺអាជ្ញាធរវៀតណាម តែងធ្វើទុក្ខបុកម្នេញ និងដាក់កម្លាំងតាមដានពីសកម្មភាពជាប្រចាំ។
លោក តាំង សារៈ ប្រធានសាខាសហព័ន្ធខ្មែរកម្ពុជាពិភពលោក ប្រចាំកម្ពុជា មានប្រសាសន៍ឲ្យវិទ្យុអាស៊ីសេរីដឹងនៅថ្ងៃទី២០ ខែមិថុនាថា ប្រសិនបើប្រទេសវៀតណាម ដែលគិតថា មានមិត្តភាពល្អជាមួយកម្ពុជា លោកសូមស្នើឲ្យអាជ្ញាធរវៀតណាម កុំគាបសង្កត់ ឬបំបិទសិទ្ធិសេរីភាពពលរដ្ឋ ឬព្រះសង្ឃខ្មែរក្រោមបន្តទៀត។
លោក យន់ ថារ៉ូ សមាជិកសភាគណបក្សសមរង្ស៊ី និងជាប្រធានមជ្ឈមណ្ឌលខ្មែរកម្ពុជាក្រោម បានអំពាវនាវដល់អាជ្ញាធរវៀតណាម សូមឲ្យបញ្ឈប់សកម្មភាពគំរាមកំហែង បំបិទសិទ្ធិសេរីភាពដើរហើរ ឬសិទ្ធិបញ្ចេញមតិ មកលើពលរដ្ឋ និងព្រះសង្ឃខ្មែរក្រោមបន្តទៀត។
វិទ្យុអាស៊ីសេរី មិនអាចសុំការបំភ្លឺពីមន្ត្រីស្ថានទូតវៀតណាម ជុំវិញការចោទប្រកាន់នេះបានទេ នៅថ្ងៃទី២០ ខែមិថុនានេះ។
ទឹកដីខ្មែរកម្ពុជាក្រោម ដែលបច្ចុប្បន្នស្ថិតក្រោមការគ្រប់គ្រង់របស់ប្រទេសវៀតណាម ត្រូវបានអាណានិគមនិយមបារាំង កាត់ប្រគល់ដោយខុសច្បាប់ ទៅឲ្យប្រទេសវៀតណាមគ្រប់គ្រង នៅថ្ងៃទី៤ ខែមិថុនា ឆ្នាំ១៩៤៩ ទាំងមិនមានការយល់ព្រមពីពលរដ្ឋម្ចាស់ប្រទេស ដែលគិតត្រឹមថ្ងៃទី៤ ខែមិថុនា ឆ្នាំ២០១០ កន្លងទៅ មានរយៈពេល ៦១ឆ្នាំគត់៕