ការបដិសេធរបស់លោក ដេវីដ ស្សាហ្វឺ (David Scheffer) នេះ គឺធ្វើឡើងក្នុងសន្និសីទសារព័ត៌មានមួយ នៅល្ងាចថ្ងៃទី ២៥ មករា ជាការឆ្លើយតបទៅនឹងសម្រង់សម្ដីរបស់អ្នកនាំពាក្យនៃទីស្ដីការគណៈរដ្ឋមន្ត្រីកម្ពុជា គឺលោក ផៃ ស៊ីផាន ដែលលោកថា បានបកស្រាយខុសពីអ្វីដែលកើតមានពិតប្រាកដនៅក្នុងកិច្ចពិភាក្សារវាងលោក និងលោកឧបនាយករដ្ឋមន្ត្រី សុខ អាន កាលពីថ្ងៃទី ២៤ មករា។
លោក ដេវីដ ស្សាហ្វឺ មានប្រសាសន៍ថា ការថ្លែងរបស់លោក ផៃ ស៊ីផាន នៅក្នុងសារព័ត៌មានថា "លោក ដេវីដ ស្សាហ្វឺ បានព្រមព្រៀងជាមួយលោក សុខ អាន ថា ការសម្រេចរបស់ឧត្ដមក្រុមប្រឹក្សានៃអង្គចៅក្រមកម្ពុជា មិនតែងតាំងចៅក្រមអន្តរជាតិ ជាការសម្រេចមិនអាចកែប្រែវិញបានទេ ហើយភាគីទាំងពីរកំពុងធ្វើការរួមគ្នារកដំណោះស្រាយ"។
លោកបញ្ជាក់ថា មិនមានការព្រមព្រៀងដូច្នេះជាមួយលោក សុខ អាន ទេ៖ «បញ្ហានៅលើតុពិតប្រាកដ គឺឧត្ដមក្រុមប្រឹក្សានៃអង្គចៅក្រម បដិសេធការតែងតាំងនោះ។ ចំណុចដែលខ្ញុំលើកឡើង គឺចង់ឱ្យមានការកែប្រែសេចក្ដីសម្រេចនោះឡើងវិញ។ ក៏ប៉ុន្តែ ប្រសិនបើឧត្ដមក្រុមប្រឹក្សានៃអង្គចៅក្រម មិនកែប្រែសេចក្ដីសម្រេចនោះទេ យើងក៏មិនអាចបង្ខំឱ្យឧត្ដមក្រុមប្រឹក្សានៃអង្គចៅក្រមកម្ពុជា តែងតាំងបានដែរ»។
លោកបញ្ជាក់ថា ការកែប្រែសេចក្ដីសម្រេចរបស់ឧត្ដមក្រុមប្រឹក្សានៃអង្គចៅក្រមឡើងវិញ គឺជាការចង់បានរបស់អង្គការសហប្រជាជាតិ ដូចដែលអ្នកនាំពាក្យរបស់អង្គការសហប្រជាជាតិ នៅទីក្រុងញូយ៉ក បានបង្ហាញនៅក្នុងសេចក្ដីប្រកាសព័ត៌មានកាលពីថ្ងៃសុក្រកន្លងទៅ។
អ្នកជំនាញពិសេសរូបនេះថ្លែងទៀតថា ការតែងតាំងរបស់អង្គការសហប្រជាជាតិ គឺមានន័យថា ឧត្ដមក្រុមប្រឹក្សានៃអង្គចៅក្រមអនុវត្តតាម។ លោកបញ្ជាក់ថា លោកបានលើកម្ដងហើយម្ដងទៀតថា ប្រសិនបើ ការខកខានមិនបានតែងតាំងចៅក្រម ឡូរ៉ែន ខាស្ពើរ នេះ គឺជាការរំលោភលើកិច្ចព្រមព្រៀងរវាងរដ្ឋាភិបាលកម្ពុជា និងអង្គការសហប្រជាជាតិ ស្ដីពីការបង្កើតសាលាក្ដីខ្មែរក្រហម។
លោក ដេវីដ ស្សាហ្វឺ៖ «ដោយយល់ឃើញថា យើងជឿលើការបកស្រាយខ្លឹមសារកិច្ចព្រមព្រៀងរបស់យើង ចៅក្រមរូបនេះ មានមានសិទ្ធិអំណាចពេញលេញក្នុងការបំពេញការងារជាចៅក្រមស៊ើបអង្កេតអន្តរជាតិ នៅអង្គជំនុំជម្រះវិសាមញ្ញក្នុងតុលាការកម្ពុជា ដោយមិនចាំបាច់មានការតែងតាំងថែមទៀត ពីឧត្ដមក្រុមប្រឹក្សានៃអង្គចៅក្រមទេ»។
លោក ដេវីដ ថ្លែងថា តាមកិច្ចសហប្រតិបត្តិការ និងអនុស្សរណៈយោគយល់គ្នា គឺអគ្គលេខាធិការអង្គការសហប្រជាជាតិមានឆន្ទានុសិទ្ធិតែងតាំងបុគ្គលណាម្នាក់សម្រាប់តំណែងនេះ ហើយដែលត្រូវគោរពដោយឧត្ដមក្រុមប្រឹក្សានៃអង្គចៅក្រម។ តាមកិច្ចព្រមព្រៀង ការតែងតាំងនេះជាឆន្ទានុសិទ្ធិរបស់អគ្គលេខាធិការអង្គការសហប្រជាជាតិ គឺមិនមែន ឧត្ដមក្រុមប្រឹក្សានៃអង្គចៅក្រមទេ។ សិទ្ធិនេះជាសិទ្ធិក្នុងកិច្ចព្រមព្រៀង និងជាផ្នែកមួយនៃច្បាប់ជាតិ។
ចំណុចទីពីរដែលលោក ដេវីដ ស្សាហ្វឺ លើកឡើងក្នុងសន្និសីទសារព័ត៌មាន គឺលោកសង្ឃឹមថា លោកចៅក្រម ឡូរ៉ង់ កាស្ពែរ អានសើមេត៍ នឹងវិលមកកម្ពុជា ដើម្បីបំពេញការងារលើសំណុំរឿង ០០៣ និង ០០៤ ដែលគួរឱ្យទុកចិត្តមួយ។ ប្រសិនបើមានបញ្ហាកើតឡើងនៅពេលណា លោកនឹងដោះស្រាយនៅពេលនោះ។ ក៏ប៉ុន្តែ លោកនៅមិនទាន់ឃើញមានបញ្ហាណាមួយនៅឡើយទេ៖ «ដូច្នេះ ការសង្ឃឹមទុករបស់ខ្ញុំនៅពេលនេះ គឺថា ការជ្រើសរើសលោក ឡរ៉ែន ខាសស្ពើ អែនស៊ើម៉ែន ឱ្យបំពេញមុខនាទីនេះ ដោយលោកអគ្គលេខាអង្គការសហប្រជាជាតិ នឹងត្រូវបានគោរព ហើយគាត់អាចបំពេញការងាររបស់គាត់បាននៅក្នុងប្រទេសនេះ»។
លោកសង្ឃឹមទៀតថា បញ្ហាចម្រូងចម្រាសនឹងត្រូវគេទុកមួយឡែក ហើយលោក ឡូរ៉ង់ កាស្ពែរ អានសើមេត៍ និងបុគ្គលិករបស់គាត់ ត្រូវបានអនុញ្ញាតឱ្យមានសិទ្ធិចេញចូលធ្វើការងារស៊ើបអង្កេតរបស់គាត់។
លោក ដេវីដ ស្សាហ្វឺ បញ្ជាក់ថា រហូតមកដល់ពេលនេះ លោកមិនទាន់ឃើញមានសំណើសុំជាលាយលាយលក្ខណ៍អក្សរណាមួយ ដែលស្នើសុំឱ្យមានការតែងតាំងមនុស្សផ្សេងជំនួសលោក ឡូរ៉ង់ កាស្ពែរ អានសើមេត៍ នៅឡើយទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។