ការរំឭកឡើងវិញអំពីអតីតសមមិត្តរបស់គាត់ គឺលោក ហេង សំរិន បានធ្វើឡើងក្នុងពេលគាត់ឆ្លើយតបសំណួររបស់លោកមេធាវីអន្តរជាតិរបស់គាត់ គឺលោក មីឃៀល ផេស្តមែន (Michiel Pestman) នៅពេលដែលសួរអំពីប្រវត្តិតស៊ូរបស់គាត់ និងអំពីទំនាក់ទំនងជាមួយវៀតណាម។
សំឡេង៖ «ហេង សំរិន ហ្នឹងគាត់ក្រទេ រកតែក្របីឃ្វាលផង។ មានតែខោខ្លីមួយ។ ក៏ប៉ុន្តែ គាត់ល្អណាស់ គុណធម៌ សីលធម៌គាត់ ហើយក្លាហានតស៊ូប្ដូរផ្ដាច់ ស៊ូលំបាកវេទនា។ ក្រោយមកទៀត គាត់បានធ្វើជាមេទ័ព ក្រោយរំដោះ។ ដូច្នោះគឺថា ជីវិតខ្ញុំ ហើយនិងលោក ហេង សំរិន ហ្នឹងជាប់គ្នាណាស់»។
ជនជាប់ចោទ នួន ជា បានជម្រាបអង្គជំនុំជម្រះថា លោក ហេង សំរិន បច្ចុប្បន្នជាប្រធានរដ្ឋសភា គឺជាអ្នកនាំគាត់ពីភ្នំពេញទៅជួបតំណាងបក្សកុម្មុយនិស្តវៀតណាម គឺលោក ង្វៀន វ៉ាន់លិញ នៅពេលដែលគាត់ចេញពីបក្សកុម្មុយនិស្តនៅប្រទេសថៃ ចូលមកតស៊ូនៅប្រទេសកម្ពុជា។
ក្រៅពីលោក ហេង សំរិន ជនជាប់ចោទ នួន ជា ក៏បានរំឭកដល់សិស្សរួមថ្នាក់របស់គាត់មួយរូបទៀតដែរ គឺលោក ជា ស៊ីម ដែលបច្ចុប្បន្នជាប្រធានព្រឹទ្ធសភាសព្វថ្ងៃនេះ។
សំឡេង៖ «ជា ស៊ីម ហ្នឹងក៏ធ្លាប់រៀនជាមួយខ្ញុំដែរ។ កាលណោះគាត់ធ្វើគណៈស្រុកត្បូងឃ្មុំ។ គាត់ក៏ក្រដែរ អ្នកស្រែកណ្ដាល។ ប៉ុន្តែពេលខ្លះខ្វះខាតក៏ខ្ចីបុលគេទៅ។ ក្រោយមកទៀត ខ្ញុំក៏មិនដឹងថាគាត់ធ្វើអីទេក្រោយរំដោះ ហើយក៏មិនដែលបានជួបគ្នា»។
ជនជាប់ចោទ នួន ជា ប្រាប់អង្គជំនុំជម្រះទៀតថា ជីវិតរបស់គាត់ចាប់តាំងពីទសវត្សឆ្នាំ ១៩៥០ រហូតមកទល់ពេលនេះ គឺតស៊ូរហូត ហើយពេលវេលាភាគច្រើនមិនគ្នានឹងបក្សកុម្មុយនិស្តវៀតណាមទេ។ ចំណុចដែលមិនត្រូវគ្នានេះ គឺព្រោះតែបក្សកុម្មុយនិស្តកម្ពុជាមិនព្រមនៅក្រោមបង្គាប់របស់បក្សកុម្មុយនិស្តវៀតណាម។
ទោះជាដូច្នេះក្ដី ជនជាប់ចោទ នួន ជា បានសរសើរអំពីកម្មាភិបាលវៀតណាមឈ្មោះ ង្វៀន វ៉ាន់លិញ ដែរ ថាជាមនុស្សស្រួលទាក់ទងដើម្បីដោះស្រាយបញ្ហារវាងបក្សកុម្មុយនិស្តកម្ពុជា និងវៀតណាម។
សំឡេង៖ «ពិតមែនតែមាគ៌ានយោបាយវៀតណាមរួមមានមាគ៌ាឈ្លានពានវាតទីលេបទឹកដីបំបាត់ពូជសាសន៍ ក៏ប៉ុន្តែ ង្វៀន វ៉ាន់លិញ ជាបុគ្គលអាចសន្ទនាជាមួយគ្នាបាន។ មានកិច្ចការអីគាត់មិនច្រឡោតតោតតូងដូច ហ្វាម ហ៊ុង ទេ។ បើ ហ្វាម ហ៊ុង ផ្សេង។ អាហ្នឹងនិយាយខុសបន្តិចមុខក្រហម»។
ជនជាប់ចោទ នួន ជា និយាយថា រវាងវៀតណាម និងកម្ពុជាមានភាពចម្រុះទាំងមិត្តផង និងសត្រូវផង។ មិត្តគឺគាត់និយាយថា វៀតណាមរួមវាយអាមេរិកដូចគ្នា តែវៀតណាមមានមហិច្ឆតាឈ្លានពានវាតទីលេបទឹកដីកម្ពុជា ជារហូតមក។
សំឡេង៖ «វៀតណាមឃោរឃៅជាងអាមេរិកទៅទៀត ព្រោះគេវ៉ៃចូលទៅចាត់តាំងរដ្ឋអំណាចអីនៅក្នុងព្រៃរបស់ខ្មែរ។ ឯអាមេរិកគ្រាន់តែទម្លាក់គ្រាប់បែកទេ។ អាមេរិកអត់ចូលមកទេ។ វៀតណាមចូលមកទាំងមនុស្សតែម្ដង។ ហើយសព្វថ្ងៃនេះលោកទាំងអស់គ្នាឃើញស្រាប់ហើយ។ ខ្ញុំនិយាយនេះ មិនមែនកុហកទេ។ និយាយការពិតតែម្ដង ព្រោះតុលាការនេះត្រូវការការពិត យុត្តិធម៌ ដែលមានប្រយោជន៍សម្រាប់យុវជនជំនាន់ក្រោយ»។
ការរំឭកដល់ប្រវត្តិត្រង់នេះ ជនជាប់ចោទត្រូវបានប្រធានចៅក្រមជំនុំជម្រះ លោក និល ណុន បញ្ឈប់ និងពន្យល់ថា វាហួសអង្គហេតុកំណត់ធ្វើសវនាការ។
សំឡេង៖ «លោក នួន ជា អត្ថាធិប្បាយតបសំណួរ គឺត្រឹមកម្រិតនៃបរិបទប្រវត្តិបក្សកុម្មុយនិស្តកម្ពុជា ដូចមានចែងនៅក្នុងបណ្ដាកថាខណ្ឌទាំងឡាយ ដែលមាននៅក្នុងដីកាដំណោះស្រាយពីខាងដើម គឺនិយាយត្រឹមបរិបទប្រវត្តិបក្សកុម្មុយនិស្តកម្ពុជាប៉ុណ្ណោះ»។
សវនាការសួរចម្លើយជនជាប់ចោទ នៅមិនទាន់បញ្ចប់នៅឡើយទេ ក៏ប៉ុន្តែដោយសារតែសុខភាពចុះខ្សោយ សវនាការបានផ្អាកមុនម៉ោងនៅពេលព្រឹក។
នៅថ្ងៃពុធទី ១ កុម្ភៈក្នុងសប្ដាហ៍នេះ សាលាដំបូងគ្រោងផ្ដល់ឱកាសសហព្រះរាជអាជ្ញា និងសហមេធាវីដើមបណ្ដឹងរដ្ឋប្បវេណីសួរដេញដោល និងស្ដាប់សក្ខីកម្មរបស់ប្រធានមជ្ឈមណ្ឌលឯកសារកម្ពុជា គឺលោក ឆាំង យុ។ លោកត្រូវបានកោះឱ្យមកថ្លែងបញ្ជាក់លើរាល់ឯកសារភស្តុតាងនានា ដែលមានមន្ទិលដោយភាគីជនជាប់ចោទ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។