ជំនួយថវិកាលើកនេះ គឺជាជំនួយបន្ថែមលើថវិកាចំនួន ១,៦លានដុល្លារ ដែលផ្ដល់កាលពីដើមឆ្នាំ២០១២ ដើម្បីជួយបំពេញកង្វះខាតរបស់សាលាក្ដីនេះ។
ជំនួយថវិកាជិត ១,៥លានដុល្លាររបស់រដ្ឋាភិបាលអូស្ត្រាលីលើកនេះ គឺជាជំនួយស្របពេលដែលសាលាក្ដីខ្មែរក្រហម កំពុងប្រឈមមុខនឹងវិបត្តិខ្វះថវិកាសម្រាប់ប្រតិបត្តិការការងាររបស់ខ្លួនបន្តរហូតដល់ចុងឆ្នាំ២០១២ នេះ។
មន្ត្រីទំនាក់ទំនងផ្នែកច្បាប់របស់សាលាក្ដីខ្មែរក្រហម លោក ឡាស អូលសិន (Lars Olsen) ថ្លែងថា នេះជាជំនួយដ៏សប្បុរសរបស់រដ្ឋាភិបាលអូស្ត្រាលី។ ក៏ប៉ុន្តែចំនួននេះ នៅតែមិនទាន់គ្រប់គ្រាន់នៅឡើយ៖ «ជំនួយនេះ ជួយយើងក្នុងពេលមានវិបត្តិ ក៏ប៉ុន្តែយើងនៅតែត្រូវការថវិកាបន្ថែមទៀត ដើម្បីឱ្យដំណើរការទៅរហូតដល់ចុងឆ្នាំ។ ឆ្នាំនេះយើងត្រូវការ ៤លាន»។
កាលពីថ្ងៃអង្គារ ទី២៨ សីហា សាស្ត្រាចារ្យច្បាប់នៃសកលវិទ្យាល័យ ណតវ៉េស្ទើន (Northwestern University) ដែលជាអ្នកជំនាញពិសេសរបស់អគ្គលេខាធិការ អ.ស.ប សម្រាប់សាលាក្ដីខ្មែរក្រហម គឺបណ្ឌិត ដេវិដ ស្ហេហ្វ៊ើ (David Scheffer) ក៏បានសរសេរក្នុងអត្ថបទកាសែតអាមេរិកាំង ឈ្មោះ ឌឹ ញីវយ៉ក ថែមស៍ (The New York Times) ឱ្យដឹងអំពីវិបត្តិនេះដែរ។
បណ្ឌិត ដេវិដ ស្ហេហ្វ៊ើ សរសេរថា សាលាក្ដីខ្មែរក្រហមកំពុងខ្វះថវិកាយ៉ាងតិច ៤លានដុល្លារ ជាចាំបាច់សម្រាប់ការចំណាយក្នុងខែវិច្ឆិកា និងខែធ្នូ ឆ្នាំនេះ។ ដោយសារតែខ្វះថវិកា សាលាក្ដីខ្មែរក្រហមបានផ្អាករើសបុគ្គលិកកាលពីខែកក្កដា កន្លងទៅ។
មន្ត្រីទំនាក់ទំនងផ្នែកច្បាប់ លោក ឡាស អូលសិន ថ្លែងបន្តថា ស្របពេលដែលកំពុងមានវិបត្តិថវិកាសម្រាប់ឆ្នាំ ២០១២ គម្រោងថវិកាចំណាយសម្រាប់ឆ្នាំ ២០១៣ ក៏នៅមិនទាន់បានអនុម័តប្រាកដប្រជាដែរ។ លោកបានឱ្យដឹងពីគម្រោងថវិកាដែលសាលាក្ដីខ្មែរក្រហមដាក់ទៅសុំម្ចាស់ជំនួយ គឺប្រមាណ ៤០លានដុល្លារ។ ក៏ប៉ុន្តែចំនួននេះអាចនឹងត្រូវកាត់បន្ថយ។
នៅពេលដែលខាងភាគីសហប្រជាជាតិខ្វះថវិកា មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ត្រា ថ្លែងថា ខាងភាគីកម្ពុជា ក៏កំពុងខ្វះថវិកាសម្រាប់ចុងឆ្នាំ ដូចគ្នាដែរ៖ «គម្រោងថវិការបស់យើង ដែលគ្រោងសម្រាប់ឆ្នាំ២០១២ គឺយើងត្រូវចំណាយថវិកាចំនួន ១០,២លានដុល្លារ។ ក៏ប៉ុន្តែ ថវិកាដែលយើងប្រមូលបាន និងទទួលការសន្យាផ្ដល់ជំនួយពីម្ចាស់ជំនួយហ្នឹង គឺបានប្រមាណតែ ៩លានដុល្លារតែប៉ុណ្ណោះ គឺភាគីជាតិនៃសាលាក្ដីខ្មែរក្រហមនៅខ្វះថវិកាចំនួន ១លានដុល្លារទៀត សម្រាប់ដំណើរការឱ្យចប់ចុងចប់ដើមនៅក្នុងឆ្នាំ២០១២ នេះ»។
បណ្ឌិត ដេវិដ ស្ហេហ្វ៊ើ អធិប្បាយថា លោកបានយល់ច្បាស់អំពីមូលហេតុមួយចំនួន ដែលរដ្ឋាភិបាលផ្ដល់ជំនួយអាក់ខានមិនបានជួយនោះ គឺដោយសារឱនភាពសេដ្ឋកិច្ច វិបត្តិហិរញ្ញវត្ថុ ហើយចំពោះករណីជប៉ុន គឺដោយសារដីរញ្ជួយកាលពីឆ្នាំ២០១១។
ទន្ទឹមគ្នានោះ ប្រទេសម្ចាស់ជំនួយក៏មានការអស់ទឹកចិត្តក្នុងការផ្ដល់ថវិកា ដោយសារតែដំណើរការជំនុំជម្រះមានភាពយឺតយ៉ាវ អូសបន្លាយពេលវេលាពីមួយឆ្នាំទៅមួយឆ្នាំ ហើយនិងការជ្រៀតជ្រែករបស់រដ្ឋាភិបាលកម្ពុជា ទៅក្នុងកិច្ចការសាលាក្ដីខ្មែរក្រហមផងដែរ។
ទាក់ទងនឹងបញ្ហានេះ មន្ត្រីនាំពាក្យសាលាក្ដីខ្មែរក្រហម លោក នេត្រ ភក្ត្រា ឆ្លើយតបថា នេះគ្រាន់តែជាការមើលឃើញរបស់អ្នកខាងក្រៅ ប៉ុន្តែភាគីនានាកំពុងខិតខំដោះស្រាយបញ្ហានីតិវិធីរបស់ខ្លួន ដើម្បីពន្លឿនការជំនុំជម្រះឱ្យមានប្រសិទ្ធភាពហើយ។
លោក នេត្រ ភក្ត្រា៖ «ភាគីទាំងអស់នៅក្នុងតុលាការបានខិតខំប្រឹងប្រែងបំពេញការងារទាំងអស់នេះ ដើម្បីឱ្យទាន់ពេលវេលា ពីព្រោះថា បច្ចុប្បន្ននេះតុលាការកំពុងតែរត់ប្រណាំងនឹងបញ្ហាថវិកា និងជរាភាពរបស់ជនជាប់ចោទ ដែលភាគីទាំងអស់មានការព្រួយបារម្ភ។ ដូច្នេះហើយបានជាយើងខិតខំប្រឹងប្រែងបំពេញការងារទាំងនេះ ដោយមិនមានការឈប់សម្រាក ឬមួយការពន្យារពេលណាមួយនោះទេ»។
ទាក់ទងនឹងការចោទឡើងអំពីការជ្រៀតជ្រែករបស់រដ្ឋាភិបាលកម្ពុជា ក្នុងកិច្ចការសាលាក្ដីខ្មែរក្រហម លោក នេត្រ ភក្ត្រា អះអាងថា មិនមានទេ ហើយសាលាក្ដីនេះអនុវត្តតាមច្បាប់។
ទោះជាមានបញ្ហាខ្វះថវិកាសម្រាប់ចុងឆ្នាំ២០១២ ដូច្នេះក្ដី មន្ត្រីទំនាក់ទំនងផ្នែកច្បាប់របស់សាលាក្ដីខ្មែរក្រហម លោក ឡាស អូលសិន ថ្លែងដោយសង្ឃឹមថា មានប្រទេសម្ចាស់ជំនួយជាច្រើនបានសន្យាផ្ដល់ជំនួយថវិកាសម្រាប់ខែវិច្ឆិកា និងខែធ្នូ ខាងមុខនេះ។
បណ្ឌិត ដេវិដ ស្ហេហ្វ៊ើ សរសេរបន្តថា សាលាក្ដីមួយដែលទំនុកបម្រុងដោយ អ.ស.ប. ដើម្បីរកយុត្តិធម៌ឲ្យជនរងគ្រោះដល់ទៅជិតពីរលាននាក់ មិនគួរគាំងធ្វើការមិនកើតដោយខ្វះថវិកានោះឡើយ។
ពាក់ព័ន្ធនឹងចំណុចនេះដែរ លោក នេត្រ ភក្ត្រា ថ្លែងថា នៅឆ្នាំ២០១៣ ប្រសិនបើសាលាក្ដីខ្មែរក្រហម មិនបានទទួលថវិកាគ្រប់គ្រាន់ទេ បញ្ហានេះនឹងអាចជាឧបសគ្គដល់ការស្វែងរកយុត្តិធម៌ជូនជនរងគ្រោះ។
ទោះជាដូច្នេះក្ដី លោកថ្លែងឱ្យដឹងថា មានប្រទេសមួយចំនួន បានសន្យានឹងផ្ដល់ជំនួយសម្រាប់ឆ្នាំ ២០១៣ ហើយ។ ក៏ប៉ុន្តែចំនួនថវិកាក្នុងការសន្យានោះ នៅមិនទាន់គ្រប់គ្រាន់នៅឡើយទេ។
បណ្ឌិត ដេវិដ ស្ហេហ្វ៊ើ សរសេររំលឹកដែរថា តុលាការឧក្រិដ្ឋកម្មសង្គ្រាមធំៗ ដូចជានៅបាល់កង់ រវ៉ាន់ដា សឺរ៉ាលីអូន កម្ពុជា និងជាតិ ៧ផ្សេងទៀត ដែលតុលាការព្រហ្មទណ្ឌកំពុងស៊ើបអង្កេត បានរងការរិះគន់ថា ចំណាយលុយច្រើនលើការជំនុំជម្រះជនជាប់ចោទមួយចំនួនតូច។
បណ្ឌិត ដេវិដ ស្ហេហ្វ៊ើ កត់សម្គាល់ថា ការចំណាយលើទំហំបទឧក្រិដ្ឋ ថវិកាប្រចាំឆ្នាំនៅតែមានចំនួនតិចគួរឱ្យសម្គាល់ បើប្រៀបធៀបជាមួយការចំណាយនៅតុលាការថ្នាក់ជាតិសម្រាប់រឿងឧក្រិដ្ឋកម្មធម្មតា។
លោក នេត្រ ភក្ត្រា បន្ទរថា សាលាក្ដីខ្មែរក្រហមនៅកម្ពុជា ចាយវាយថវិកាតិចជាងតុលាការឧក្រិដ្ឋកម្មសង្គ្រាមធំៗ មួយចំនួនទៀត។
តើស្ថានភាពសាលាក្ដីខ្មែរក្រហម អាចនឹងគាំងព្រោះតែខ្វះថវិកាទេ នៅឆ្នាំ២០១៣? លោក ឡាស អូលសិន ថ្លែងថា វាជាការលឿនពេកក្នុងការនិយាយថា ស្ថានភាពសាលាក្ដីខ្មែរក្រហមនឹងយ៉ាងណានោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។