បុរសឈ្មោះ រាជ សីមា ដែលអះអាងថាជាតំណាងប្រជាពលរដ្ឋទាំង ១០៨គ្រួសារនោះ រៀបរាប់ប្រាប់វិទ្យុអាស៊ីសេរីនៅព្រឹកថ្ងៃទី២៦ ធ្នូ ថា ក្រុមហ៊ុន KDC បានយកគ្រឿងចក្រមកឈូសឆាយលើដីរបស់ប្រជាពលរដ្ឋ។ លោកថា ដីទំហំ ១៨៤ហិកតានេះប្រជាពលរដ្ឋបានកាន់កាប់តាំងពីឆ្នាំ១៩៩៧មក។
គាត់បន្តថា ប្រជាពលរដ្ឋកំពុងប្តឹងតវ៉ា តែក្រុមហ៊ុនបែរជាបំពានច្បាប់ដោយយកគ្រឿងចក្រមកធ្វើសកម្មភាពឈូសឆាយដោយមិនរង់ចាំដំណោះស្រាយ ៖ «រឿងនេះនៅក្ដីក្ដាំគ្នាជាមួយប្រជាជននៅឡើយ។ មិនទាន់កាត់ឲ្យទៅក្រុមហ៊ុនឬក៏មិនទាន់កាត់ឲ្យមកប្រជាជនផង ក្រុមហ៊ុនយកអាអិចមកឈូសបំពាន។ ប្រជាជនមួយៗអត់បាយ អត់អី! ពិបាកផង អីផង! ខ្លះទៅស៊ីឈ្នួលគេនៅឯស្រុកឆ្ងាយ អត់មានអីហូប!»។
ស្ត្រីឈ្មោះ កែវ សុខា បន្ថែម ៖ «នាងខ្ញុំសំណូមពរឲ្យរាជរដ្ឋាភិបាលឲ្យបញ្ឈប់ការឈូសឆាយហ្នឹងសិនទៅ។ ចង់ឲ្យរាជរដ្ឋាភិបាលដោះស្រាយដោយយុត្តិធម៌សិន សឹមភាគីម្ខាងធ្វើ!»។
ដីទំហំ ១៨៤ហិកតានៅភូមិឡពាងស្ថិតក្នុងតំបន់ដីដែលកំពុងមានជម្លោះរវាងក្រុមហ៊ុន KDC ជាមួយប្រជាពលរដ្ឋជាង ១០០គ្រួសារ បានអូសបន្លាយជាច្រើនឆ្នាំកន្លងមកហើយ។ អ្នកស្រុកបានចោទថា ក្រុមហ៊ុនបានទិញដីនោះនៅក្នុងតំបន់មួយចំនួន ប៉ុន្តែបែរជាព័ទ្ធយកដោយទាំងដីរបស់អ្នកភូមិជាច្រើនរយគ្រួសារដែលមិនបានលក់។ ជម្លោះនេះបណ្តាលឲ្យអ្នកភូមិជាច្រើននាក់ត្រូវបានគេចាប់ដាក់គុក ហើយមកដល់ពេលនេះមានអ្នកភូមិខ្លះទៀតត្រូវជាប់បណ្តឹង។
អ្នកស្រុកបាននិយាយថា នៅពេលពួកគេតវ៉ា អាជ្ញាធរបែរជាចោទថា ពួកគេញុះញង់គ្នាធើ្វបាតុកម្ម ប៉ុន្តែបណ្តឹងអ្នកភូមិដាក់ឲ្យដោះស្រាយបែរជាមិនដោះស្រាយទៅវិញ។
តំណាងក្រុមហ៊ុន KDC គឺលោក ថៃ ហ៊ី មិនព្រមឆ្លើយចំពោះសំណួររបស់វិទ្យុអាស៊ីសេរីទេ នៅព្រឹកថ្ងៃទី២៦ ធ្នូនេះ។ លោកមានប្រសាសន៍យ៉ាងខ្លីថា ៖ «រឿងហ្នឹងខ្ញុំអត់ដឹងទេ រវល់ណាស់ រវល់ប្រជុំ!»។
មេឃុំតាជេស គឺលោក ឌី ឌឿន មានប្រសាសន៍ថា លោកពុំបានដឹងអំពីការតវ៉ារបស់ប្រជាពលរដ្ឋទេ។
មន្ត្រីសម្របសម្រួលសមាគមការពារសិទ្ធិមនុស្ស អាដហុក ប្រចាំខេត្តកំពង់ឆ្នាំង គឺលោក សំ ចាន់គា បានចាត់ទុកសកម្មភាពឈូសឆាយដីរបស់ក្រុមហ៊ុន KDC ថាជាទង្វើរំលោភច្បាប់។
លោក សំ ចាន់គា បានបញ្ជាក់ថា ៖ «អ្វីដែលក្រុមហ៊ុនធ្វើនេះបំពានទៅហើយ ពីព្រោះតុលាការមិនទាន់សម្រេចដកអង្គសេចក្ដីនៅឡើយទេ អ៊ីចឹងហើយក្រុមហ៊ុនគួរតែត្រូវផ្អាករង់ចាំការសម្រេចដោយអង្គសេចក្ដីសិន»។
អ្នករងគ្រោះក្នុងរឿងនេះបាននិយាយថា គណបក្សប្រជាជនកម្ពុជានៅតំបន់នោះ កាលពីអំឡុងពេលឃោសនារកសំឡេងឆ្នោតបានសន្យាថា នឹងដោះស្រាយជូនប្រជាជន ប៉ុន្តែក្រោយបោះឆ្នោតរួចបញ្ហានេះនៅដដែល៕