ក្រុមមេធាវីការពារក្តីមកពីអង្គការក្រៅរដ្ឋាភិបាលចំនួនពីរបានទាមទារឲ្យមានការបញ្ឈប់ការរំខាននិងដាក់គំនៀបពីសំណាក់អាជ្ញាធរមូលដ្ឋានឃុំប៉ាតេ ស្រុកអូរយ៉ាដាវ ខេត្តរតនគិរី ទៅលើក្រុមមេធាវីនិងអ្នកភូមិគងយុ នៅក្នុងជម្លោះដីដ៏រ៉ាំរ៉ៃមួយពាក់ព័ន្ធទៅនឹងអ្នកស្រី គាត កុលណី ភរិយារដ្ឋលេខាធិការក្រសួងរៀបចំដែនដីនគរូបនីយកម្មនិងសំណង់ គឺលោក ឆាន់ សាផាន់។
នៅក្នុងបទសម្ភាសន៍តាមទូរស័ព្ទជាមួយវិទ្យុអាស៊ីសេរីនៅថ្ងៃសុក្រ ទី១ ខែមករា ឆ្នាំ២០១០ មន្ត្រីគម្រោងនៃមជ្ឈមណ្ឌលអប់រំច្បាប់សម្រាប់សហគមន៍ លោក ម៉ន វុទ្ធី មានប្រសាសន៍ថា មេភូមិនិងមេឃុំប៉ាតេបានរំលោភសិទ្ធិរបស់ក្រុមមេធាវីដែលកំពុងដំណើរកិច្ចការពារក្តីអ្នកភូមិតាមផ្លូវតុលាការ។
លោក ម៉ន វុទ្ធី បានឲ្យដឹងថា ៖ «ក្រុមមេភូមិហ្នឹងព្យាយាមអុកឡុកពួកខ្ញុំមិនឲ្យនិយាយជាមួយកូនក្ដី ហើយលោកមេឃុំហ្នឹងគាត់ថា មកហ្នឹងត្រូវតែឲ្យព័ត៌មានគាត់ដឹង»។
មេធាវីនៃអង្គការក្រៅរដ្ឋាភិបាលទាំងពីរ គឺមេធាវីនៃអង្គការជំនួយផ្នែកច្បាប់នៃកម្ពុជាចំនួនម្នាក់ និងមេធាវីនៃមជ្ឈមណ្ឌលអប់រំច្បាប់សម្រាប់សហគមន៍ ៤នាក់។ ក្រុមមេធាវីទាំង ៥នាក់នេះបានទទួលការពារក្តីឲ្យអ្នកភូមិគងយុជាង ៦០គ្រួសារដែលមានជម្លោះដីធ្លីចំនួន ៥០០ហិកតាជាមួយអ្នកស្រី គាត កុលណី តាំងពីឆ្នាំ២០០៤មក។
មេឃុំប៉ាតេ លោក សេវ ញ៉ាន មានប្រសាសន៍ឆ្លើយតបចំពោះសេចក្តីចោទប្រកាន់វិញថា លោកបំពេញតួនាទីក្នុងនាមជាអាជ្ញាធរមូលដ្ឋានតាមសំណូមពររបស់មេភូមិនិងអ្នកភូមិ ៖ «ប្រជាពលរដ្ឋគេចង់ដកពាក្យបណ្ដឹងទៅបិទសិទ្ធិគេម៉េចបាន»។
អ្នកភូមិគងយុនិយាយថា មេភូមិនិងមេឃុំចលនាឲ្យអ្នកភូមិទទួលយកប្រាក់ ៤០០ដុល្លារក្នុងមួយគ្រួសារ ឬសាលារៀនរួមមួយខ្នង ៣បន្ទប់ ឬទទួលយកកូនកៅស៊ូសម្រាប់ដាំមួយគ្រួសារមួយហិកតា បើអ្នកភូមិណាយល់ព្រមដកពាក្យបណ្តឹងអ្នកស្រី គាត កុលណី ចេញពីតុលាការ។
តំណាងអ្នកភូមិ លោក រម៉ាម ហ្វីល មានប្រសាសន៍ថា អ្នកភូមិភាគច្រើនមិនពេញចិត្តដែលឋិតក្រោមគំនាបខាងលើពីមន្ត្រីអាជ្ញាធរមូលដ្ឋានឲ្យអ្នកភូមិទទួលអំណោយបន្ថែម និងការរារាំងមេធាវីអ្នកភូមិនោះទេ ៖ «ទៅបង្ខំមាត់ យូរៗម្ដងៗ និយាយឲ្យយើងផ្ដិតមេដៃ»។
មន្ត្រីផ្នែកអង្កេតមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ ដែលបានឃ្លាំមើលករណីនេះជាច្រើនឆ្នាំរហូតមក មានប្រសាសន៍ថា ការចលនាឲ្យអ្នកភូមិទទួលប្រាក់ ហើយប្រគល់ដីគឺជាការបំពានទៅលើច្បាប់ភូមិបាលទាក់ទិនដីធ្លីសហគមន៍ជនជាតិដើមភាគតិច។
លោក ឈឹម សាវុធ បានបញ្ជាក់ថា ៖ «តាមផ្លូវច្បាប់វិញ បើទោះជាអ្នកភូមិព្រម ក៏បុគ្គលម្ខាងទៀតអត់មានសិទ្ធិទៅកាន់កាប់លើដីទ្រព្យសម្បត្តិរបស់រដ្ឋ»។
អ្នកភូមិគងយុបានប្តឹងចោទប្រកាន់អ្នកស្រី គាត កុលណី និងអាជ្ញាធរមូលដ្ឋានពីបទឃុបឃិតគ្នាឆបោក ក្លែងឯកសារលក់ដូរដីអ្នកភូមិតាំងពីឆ្នាំ២០០៤មក និងប្តឹងបដិសេធកិច្ចសន្យាទិញលក់ដីដែលធ្វើឡើងដោយអាជ្ញាធរមូលដ្ឋាន និងប្តឹងអ្នកស្រី គាត កុលណី ពីបទរំលោភយកដីបំផ្លាញផលដំណាំ។ ក៏ប៉ុន្តែតុលាការខេត្តបានបដិសេធមិនចាត់ការរឿងចោទពីករណីឆបោកនិងក្លែងឯកសារ។ ចំណែកការប្តឹងបដិសេចកិច្ចសន្យានិងរឿងបំផ្លាញទ្រព្យសម្បតិ្តអ្នកភូមិកំពុងឋិតនៅក្នុងចំណាត់ការរបស់តុលាការនៅឡើយ៕