ប្រជាពលរដ្ឋបាននិយាយថា ពួកគាត់បានលើកគ្នាមកទៅតាមការកោះហៅរបស់ក្រុមហ៊ុនដែលថាបានអញ្ជើញមន្ត្រីស្រុកឃុំនិងភូមិដើម្បីធ្វើការចរចាជាមួយគ្នាលើគោលនយោបាយដោះស្រាយសំណងដីធ្លីដែលប៉ះពាល់ក្នុងប្លង់ក្រុមហ៊ុន ប៉ុន្តែពេលមកដល់មិនមានឃើញមន្ត្រីមកដោះស្រាយទេគឺឃើញតែគ្រឿងចក្រឈូសឆាយដីស្រែចម្ការប្រជាពលរដ្ឋទៅវិញ ទើបប្រជាពលរដ្ឋនាំគ្នាព័ទ្ធគ្រឿងចក្រមិនឲ្យធ្វើសកម្មភាព ៖ «នៅខាងមុខដីស្រែខ្ញុំវាឈូសលុបទៀត ខុសនឹងពាក្យសន្យាដែលថាមកចរចា ដល់អ៊ីចឹងទៅពួកខ្ញុំចង់ឲ្យអាត្រាក់នេះថយទៅវិញ ប៉ុន្តែពួកខាង បេស យកអាមេដាក់ប្រជាជនទៀត»។
តាមអ្នកភូមិបានអះអាងថា ខណៈពេលដែលអ្នកភូមិជាច្រើនរយនាក់បានលើកគ្នាហ៊ុមព័ទ្ធគ្រឿងចក្រគឺមានកម្លាំងប៉ូលិសនិងទាហានជាច្រើនបានបញ្ជូនទៅទីនោះ។ ទោះយ៉ាងណាមិនអាចទំនាក់ទំនងសុំការបំភ្លឺបញ្ហានេះពីតំណាងក្រុមហ៊ុន បានយ៉ាគ្រូប Co., Ltd. បានទេ។
ចំណែកអភិបាលរងស្រុកវ៉ារិនដែលបានចុះពិនិត្យបញ្ហាទំនាស់ គឺលោក ឈឹម ឈុន បានមានប្រសាសន៍ថា ការតវ៉ារបស់ប្រជាពលរដ្ឋប្រឆាំងក្រុមហ៊ុននោះគឺបណ្តាលមកពីប្រជាពលដ្ឋខ្លះថាមានដីស្រែចម្ការនៅក្នុងប្លង់ដែលក្រុមហ៊ុនត្រូវឈូសឆាយ ប៉ុន្តែក្រុមហ៊ុនមិនទាន់បានដោះស្រាយសំណងសមរម្យឲ្យពួកគាត់នៅឡើយ។
លោក ឈឹម ឈុន បានមានប្រសាសន៍ថា ៖ «ក្រុមហ៊ុនមិនទាន់ដោះស្រាយ ប្រជាពលរដ្ឋគេទៅផ្អាកគ្រឿងចក្រមិនទាន់ឲ្យឈូសឆាយឯណា។ ខ្ញុំអត់ដឹងគោលការណ៍ផង ពីព្រោះខ្ញុំគ្រាន់តែអាជ្ញាធរជួយសម្របសម្រួលប្រជាពលរដ្ឋតែប៉ុណ្ណឹងឯង»។
អ្នកស៊ើបអង្កេតសមាគមការពារសិទ្ធិ អាដហុក ខេត្តសៀមរាប លោក សួស ណារិន បានមានប្រសាសន៍ថា បញ្ហាដែលអ្នកភូមិនៅតែតវ៉ាមិនស្ងប់ដោយសារតែអាជ្ញាធរឃុំភូមិមិនបានដោះស្រាយគោលនយោបាយដែលក្រុមហ៊ុនបានចេញលុយជាច្រើនម៉ឺនដុល្លាររួចហើយនោះទៅឲ្យប្រជាពលរដ្ឋទេ ហើយម្យ៉ាងទៀតការដោះស្រាយរបស់ក្រុមហ៊ុនទៅលើដីចម្ការមួយហិកតារតម្លៃ២០០ដុល្លារគឺអ្នកភូមិមិនទទួលយកបានឡើយ។
លោក សួស ណារិន បានឲ្យដឹងថា ៖ «មិនស្ងប់ដោយសារប្រជាពលរដ្ឋគាត់ទាមទារចង់តែបានសំណងដីជាលុយហ្នឹងច្រើន មួយហិកតារ៧-៨ពាន់ដុល្លារ ក្រុមហ៊ុនគេមានលទ្ធភាពសងតែ២០០»។
អភិបាលខេត្តសៀមរាប លោក ស៊ូ ភិរិន្ទ បានមានប្រសាសន៍ថា នៅល្ងាចថ្ងៃទី១២ ខែកុម្ភៈ លោកនឹងអញ្ចើញមន្ត្រីស្រុកនិងក្រុមប្រឹក្សាឃុំមកប្រជុំនៅសាលាខេត្តដើម្បីរកមធ្យោបាយដោះស្រាយបញ្ហានោះនិងស្រាវជ្រាវឲ្យប្រាកដថា ទីនោះជាកម្មសិទ្ធិរបស់ប្រជាពលរដ្ឋឬយ៉ាងណា?។
លោក ស៊ូ ភិរិន្ទ បានបញ្ជាក់ថា ៖ «អភិបាលស្រុក... រករឿងពិតប្រាកដវាកម្មសិទ្ធិរបស់រដ្ឋ ឬមួយជាកម្មសិទ្ធិរបស់ប្រជាពលរដ្ឋ»។
សូមរំឭកថា កាលពីចុងខែធ្នូ ឆ្នាំ២០០៨ ក្រុមប្រជាពលរដ្ឋចំនួន៦ភូមិនៅឃុំស្រែណូយបានលើកគ្នាប្រឆាំងក្រុមបានយ៉ាគ្រូប៤ថ្ងៃជាប់ៗគ្នាម្តងមកហើយខណៈដែលរដ្ឋាភិបាលបានផ្តល់ដីសម្បទាន៧០០០ហិកតារទៅឲ្យក្រុមហ៊ុនអភិវឌ្ឍន៍ទីក្រុងរណបទេសចរណ៍និងរក្សាទុកព្រៃធម្មជាតិទីនោះ៕