អ្នកភូមិអូរពន្លៅ ឃុំអមលាំង ស្រុងថ្ពង ខែត្រកំពង់ស្ពឺ បានថ្លែងឲ្យដឹងនៅថ្ងៃអាទិត្យ ទី៩ ឧសភា ថា គ្រឿងចក្ររបស់ក្រុមហ៊ុនភ្នំពេញស៊ូហ្គើរ ជាច្រើនគ្រឿង បានឈូសឆាយដីភូមិ និងឈូសអស់ផ្ទះអ្នកភូមិ ១ខ្នង ក្រោយពីបានឈូសដីស្រែរបស់ពួកគាត់កាលពីពេលថ្មីៗនេះ។
អ្នកភូមិមួយរួប ឈ្មោះ យឹម សៀងហយ បាននិយាយថា គ្រឿងចក្រក្រុមហ៊ុន បានចាប់ផ្ដើមឈូសដីភូមិ កាលពីថ្ងៃទី៨ ឧសភា ប៉ះពាល់លើដីភូមិរបស់ប្រជាពលរដ្ឋជាង ១០គ្រួសារ ក្នុងនោះបានឈូសជាប់ផ្ទះអ្នកភូមិ ១ខ្នង បើទោះបីជាអ្នកភូមិបានទៅទប់ស្កាត់មិនឲ្យឈូសឆាយយ៉ាងណាក៏ដោយ ក៏គេមិនព្រមឈប់ដែរ ព្រោះមានកងកម្លាំងការពារគ្រឿងចក្រ ប្រមាណ ១០០នាក់។
គាត់មានប្រសាសន៍បន្តថា ៖ «ឥឡូវមកដល់ផ្ទះមីងខ្ញុំទៀតហើយ តែគេមិនទាន់ឈូសដល់ នេះ នៅសល់ ២០ម៉ែត្រ ពីផ្ទះទៅឈូសជិតដល់ហើយ គេឈូសម្សិលមិញ តែគេមិនដាក់ទាហានច្រើន តែថ្ងៃហ្នឹង គេដាក់ទាហានច្រើន»។
ស្ត្រីឈ្មោះ ខៀវ សុភី បានបញ្ជាក់ថា កាលពីខែមេសាកន្លងទៅ ប្រជាពលរដ្ឋ និងភាគីក្រុមហ៊ុន បានទៅធ្វើកិច្ចសន្យានិងគ្នា នៅសាលាឃុំអមលាំង ដោយក្រុមហ៊ុនបានកំណត់ទុកដីភូមិ ឲ្យប្រជាពលរដ្ឋ បណ្ដោយ ២០០ម៉ែត្រ ពីខាងក្រោយផ្ទះ មិនធ្វើការឈូសឆាយនោះទេ ប៉ុន្តែនៅពេលនេះ គ្រឿងចក្ររបស់ក្រុមហ៊ុន បានធ្វើការឈូសឆាយដីភូមិរបស់ពួកគាត់ទៅវិញ។
លោកមានប្រសាសន៍បន្តថា ៖ «កាលពីកាត់កន្ទុយក្រោយថា ទុកឲ្យគ្នា ២០០ហ្នឹង ឥឡូវហ្នឹង មកឈូសអា២០០ហ្នឹងទៀត»។
តំណាងក្រុមហ៊ុនភ្នំពេញស៊ូហ្គើរ លោកស្រី សៀង គឹមស៊ុន បានបដិសេធថា គ្រឿងចក្ររបស់ក្រុមហ៊ុន មិនបានឈូសឆាយដីភូមិរបស់ប្រជាពលរដ្ឋទេ គឺឈូសឆាយដីព្រៃ ដែលជាដីរបស់ក្រុមហ៊ុន។ លោកស្រី សៀង គឹមស៊ុន បានអះអាងថា បញ្ហាជម្លោះដីធ្លីកន្លងមក រវាងប្រជាពលរដ្ឋ និងក្រុមហ៊ុននោះ ក្រុមហ៊ុនបានដោះស្រាយរួចអស់ហើយ ដោយមានការដោះដូរដី និងផ្ដល់សំណងជួនប្រជាពលរដ្ឋ ក្នុងមួយហិកតារ ២៥០ដុល្លារ។
លោកស្រីមានប្រសាសន៍ថា ៖ «ចំណែកគាត់ឥតមាននៅហ្នឹងទេ ត្រង់ហ្នឹងសុទ្ធតែដីព្រៃទាំងអស់ទេអូន ម្ចាស់កម្មសិទ្ធិគេបានផ្ទេរឲ្យខ្ញុំ»។
លោកស្រី សៀង គឹមស៊ុន បានបន្តថា ក្រុមហ៊ុនភ្នំពេញស៊ូហ្គើរ ទៅវិនិយោគនៅក្នុងឃុំអមលាំង បានផ្ដល់ការងារឲ្យប្រជាពលរដ្ឋធ្វើទៅវិញទេ ដែលបច្ចុប្បន្នក្រុមហ៊ុនបានយកអ្នកភូមិឲ្យធ្វើការបានជាង ១០០នាក់ ហើយក្រុមហ៊ុនត្រូវការកម្មករប្រមាណ ២ម៉ឺននាក់ទៀត ដើម្បីឲ្យចូលធ្វើការផងដែរ។
ទោះបីជាមានការអះអាងពីលោកស្រី សៀង គឹមស៊ុន យ៉ាងនេះក្ដី លោក អំ សំអាត មន្ត្រីស៊ើបអង្កេតជាន់ខ្ពស់ នៃអង្គការសិទ្ធិមនុស្សលីកាដូ បានឲ្យដឹងថា ក្រុមហ៊ុនភ្នំពេញស៊ូហ្គើរ កំពុងរំលោភយកដីស្រែ និងដីភូមិរបស់ប្រជាពលរដ្ឋ ពីព្រោះក្រុមហ៊ុនមិនបានចុះវាស់វែងដីឲ្យបានច្បាស់លាស់ទេ។
លោកបន្តថា ៖ «ប៉ុន្តែគាត់គ្មានលទ្ធភាពទៅជួលត្រាក់ទ័រ ទៅឈូសដូចក្រុមហ៊ុនអ៊ីចឹង អ៊ីចឹងគាត់ធ្វើម្ដងបន្តិចៗ ទៅជួនកាលកន្លែងខ្លះគាត់មិនបានធ្វើ ព្រៃវាដុះវិញអ៊ីចឹងទៅ ហើយក្រុមហ៊ុនថា កន្លែងហ្នឹងជាដីរបស់រដ្ឋ»។
ក្រុមហ៊ុនភ្នំពេញស៊ូហ្គើរ ទទួលដីសម្បទានសេដ្ឋកិច្ចចំនួន ៩៩ឆ្នាំ ពីរដ្ឋាភិបាល កាលពីខែកុម្ភៈ ឆ្នាំ២០១០ ដើម្បីវិនិយោគដាំដើមអំពៅ ធ្វើស្ករសលើផ្ទៃដីទំហំ ៩០៥២ហិកតារ។ ប៉ុន្តែការផ្ដល់សិទ្ធិវិនិយោគពីរដ្ឋាភិបាលនោះ រដ្ឋាភិបាលបានកំណត់ឲ្យក្រុមហ៊ុនសហការជាមួយអាជ្ញាធរមូលដ្ឋាន និងក្រសួងកសិកម្ម ចុះសិក្សាលំអិតអំពីផលប៉ះពាល់ និងកាត់ចេញនូវដីទាំងឡាយ ដែលប៉ះពាល់ផលប្រយោជន៍ប្រជាពលរដ្ឋ។
លោក អំ សំអាត បានបញ្ជាក់ថា ក្រុមហ៊ុនមិនបានចុះសិក្សា និងបង្ហាញឯកសារណាមួយច្បាស់លាស់ អំពីផលប៉ះពាល់នោះទេ ផ្ទុយទៅវិញ ក្រុមហ៊ុនបានចុះចាប់ផ្ដើមឈូសឆាយដី ហើយប៉ះពាល់លើដីស្រែដីចម្ការ និងដីភូមិរបស់ប្រជាពលរដ្ឋមួយចំនួន ក្នុងឃុំអមលាំង ដែលអូសបន្លាយអស់រយៈពេលជាច្រើនខែមក តែពុំទាន់មានដំណោះស្រាយណាមួយសមរម្យ ជួនប្រជាពលរដ្ឋនៅឡើយទេ៕