ស្ត្រីម្នាក់ជាតំណាងពលរដ្ឋ ៣១គ្រួសារ ក្នុងឃុំជីខក្រោម ខេត្តកោះកុង ដែលពាក់ព័ន្ធបញ្ហាដីធ្លី បានចូលខ្លួនទៅបំភ្លឺពីបទព្រហ្មទណ្ឌ តាមដីកាកោះដោយព្រះរាជអាជ្ញាសាលាដំបូងខេត្តកោះកុង តាមពាក្យប្ដឹងរបស់បុរសជាឈ្មួញម្នាក់ ដែលជាដើមចោទ។
អ្នកស្រី ផាវ ញ៉ើង រស់នៅភូមិព្រែកជីក ឃុំជីខក្រោម ជាតំណាងប្រជាពលរដ្ឋ ៣១គ្រួសារ បានឲ្យដឹងនៅថ្ងៃច័ន្ទ ទី១០ ខែឧសភា ថា អ្នកស្រីបានចូលខ្លួនទៅបំភ្លឺតាមដីកាកោះហៅ របស់តុលាការខេត្តជាលើកទី២ ក្នុងសំណុំរឿងលេខ៦៥ ចុះថ្ងៃទី១ ខែមេសា ឆ្នាំ២០១០ ពីបទព្រហ្មទណ្ឌ ដែលធ្វើការសាកសួរដោយព្រះរាជអាជ្ញា តុប ឈុនហេង ដែលមានឈ្មោះ ហេង ហុយ ជាដើមបណ្ដឹង។
អ្នកស្រីបន្តថា អស់រយៈពេលជិត ២ម៉ោង នៃការសាកសួរ អ្នកស្រីបានបង្ហាញឯកសារ និងលិខិតបញ្ជាក់ការរស់នៅរបស់ប្រជាពលរដ្ឋពីអាជ្ញាធរឃុំ និងសាលក្រមស្ថាពរ ដែលចេញដោយតុលាការកំពូល សម្រេចប្រគល់ដី នៅឯភូមិឈូក ឃុំជីខលើ ប្រគល់ឲ្យលោក ហេង ហុយ ពុំមានពាក់ព័ន្ធដីពួកគាត់កំពុងរស់នៅនេះឡើយ។ ក៏ប៉ុន្តែបែរជាលោក ហេង ហុយ ប្ដឹងពួកគាត់នៅឃុំជីខក្រោមទៅវិញ។
អ្នកស្រី ផាវ ញ៉ើង មានប្រសាសន៍ ៖ «ដីពួកខ្ញុំមានលិខិតបញ្ជាក់ តែដីមេឃុំជីខក្រោមទេ អត់ដែលមានមេឃុំជីខលើបញ្ជាក់ឲ្យពួកខ្ញុំរស់នៅហ្នឹងទេ ហើយគាត់ចោទថា ខ្ញុំរស់នៅឃុំជីខលើ ខ្ញុំអត់សុខចិត្តទេ។ខ្ញុំបានបង្ហាញពីសាលក្រមស្ថាពរសម្រេចឲ្យដីភូមិឈូក ឲ្យទៅជីខលើ ឲ្យទៅគាត់ទាំងអស់ ហើយនិងការសួរឆ្លើយរបស់ខ្ញុំ គឺមានឯកសារទាក់ទងតែឃុំជីខក្រោមទេ»
។
ព្រះរាជអាជ្ញាអមតុលាការខេត្តកោះកុង លោក តុប ឈុនហេង បានបដិសេធមិនធ្វើអត្ថាធិប្បាយឡើយ ជុំវិញការកោះហៅតំណាងប្រជាពលរដ្ឋ ពីបទព្រហ្មទណ្ឌនោះ។
ស្ត្រីអ្នកភូមិជីខក្រោមម្នាក់ ក្នុងចំណោមអ្នកភូមិប្រមាណជា ២០នាក់ ដែលបានទៅតាមមើល គាំទ្រតំណាងរបស់ខ្លួន ឈ្មោះ ឈឹម ឈាវ ដែលទៅរង់ចាំនៅមុខតុលាការបានអះអាងថា ប្រជាពលរដ្ឋមកមុខតុលាការ ដើម្បីគាំទ្រ និងធ្វើជាសាក្សី ជាមួយគ្នានោះ ពួកគាត់ក៏មានការព្រួយបារម្ភ ខ្លាចមានការឃាត់ខ្លួនតំណាងរបស់គាត់ដែរ។
ទាក់ទងបញ្ហានេះ អ្នកស្រី នី សោភណ្ឌនារី មេធាវីនៃមជ្ឈមណ្ឌលអប់រំច្បាប់ សម្រាប់សហគមន៍ មានប្រសាសន៍ថា កូនក្ដីរបស់អ្នកស្រី បានចូលខ្លួនទៅបំភ្លឺតាមបទចោទ ពីបទព្រហ្មទណ្ឌ ដែលដើមចោទ គឺលោក ហេង ហ៊ុយ បានប្ដឹងកូនក្ដីរបស់គាត់ថា បានសាងសង់ផ្ទះលើដីកម្មសិទ្ធិរបស់គេ។ ក៏ប៉ុន្តែកូនក្ដីរបស់អ្នកស្រី បានជួសជុលផ្ទះនៅលើសសរចាស់ ស្ថិតនៅក្នុងឃុំជីខក្រោម ពុំមែនជាទីតាំង ដែលសាលក្រមស្ថាពររបស់តុលាការកំពូល ដែលសម្រេចប្រគល់ឲ្យលោក ហេង ហុយ នៅឯឃុំជីខលើនោះទេ។
អ្នកភូមិចំនួន ៣១គ្រួសារ នៅភូមិព្រែកជីក ឃុំជីខក្រោម កាលពីថ្ងៃទី០៤ ខែឧសភា បាននាំគ្នាដាក់ពាក្យប្ដឹងបុរស ជាឈ្មួញពីរនាក់ គឺលោក ហេង ហ៊ុយ និងលោក សុខ ហុង ទៅតុលាការខេត្ត ដោយស្នើសុំកាន់កាប់ និងគ្រប់គ្រងដីជាង ១០០ហិកតារនោះវិញ ដោយសារតែលោក ហេង ហ៊ុយ និងលោក សុខ ហុង ប្ដឹងគ្នាដណ្ដើមដីរបស់អ្នកភូមិទៅវិញទៅមក ដល់តុលាការកំពូល។ ហើយនៅថ្ងៃទី២៧ ខែតុលា ឆ្នាំ២០០៩ ព្រះរាជអាជ្ញាខេត្តកោះកុង បានមកប្រកាសសាលក្រមស្ថាពរ ដែលចេញដោយតុលាការកំពូល ប្រគល់ដីរបស់អ្នកភូមិ ឲ្យអ្នកទាំងពីរនោះ។ ប៉ុន្តែប្រជាពលរដ្ឋបានបដិសេធ មិនឲ្យមានការវាស់វែង ដោយសារតែសាលក្រមស្ថាពរនោះជាន់ដីពួកគេ។ តុលាការកំពូលក៏បានចេញលិខិតជូនដំណឹងឲ្យប្រជាពលរដ្ឋដាក់ពាក្យបណ្ដឹង ទៅតុលាការខេត្ត ដើម្បីឲ្យធ្វើការដោះស្រាយបញ្ហានេះឡើងវិញ ក៏ប៉ុន្តែនៅពុំទាន់មានការដោះស្រាយនៅឡើយទេ៕