អ្នកភូមិមួយរួបបាននិយាយថា បន្ទាប់ពីតុលាការដោះលែងអ្នកភូមិពីររួបឲ្យនៅក្រៅឃុំជាបណ្ដោះអាសន្នកាលពីពេលថ្មីៗ នេះមក អាជ្ញាធរខែត្រ-ស្រុក មិនបានរកដំណោះស្រាយជួនអ្នកភូមិឡើយ រីឯត្រាក់ទ័ររបស់ក្រុមហ៊ុន នៅតែបន្តការឈូសឆាយដី ដោយដាក់កងកម្លាំងទាហានប្រមាណ ៣០នាក់ យាមត្រាក់ទ័រ ៖ «ព្រឹមមិញនេះ គេឈូសដល់របងផ្ទះទៀត។ ដល់ប្រជាពលរដ្ឋទៅឃាត់ទៅ គេថាឈូសតម្រង់ព្រំ។ ទម្រង់ព្រំមកបុករបងប្រជាពលរដ្ឋ»។
ស្ត្រីមួយរួបទៀត ដែលត្រាក់ទ័របានឈូសដីមកដល់ក្រោយផ្ទះរបស់គាត់នោះ បានបញ្ជាក់ថា នៅព្រឹកថ្ងៃទី៧ មេសានេះ ត្រាក់ទ័រចំនួនបីគ្រឿង បានឈូសដីប៉ះលើរបងដីរបស់គាត់ ប៉ុន្តែអ្នកភូមិបានលើកគ្នាទៅហាមឃាត់ទាន់។ ស្ត្រីរួបនេះសុំអំពាវទៅអាជ្ញាធរ ក៏ដូចជារដ្ឋាភិបាល ឲ្យជួយដោះស្រាយបញ្ហាជម្លោះដីនេះឲ្យបានឆាប់ បើមិនដូច្នោះទេ អ្នកភូមិនឹងបាត់បង់ដីស្រែជាមិនខាន។
តំណាងក្រុមហ៊ុន ភ្នំពេញ Sugar លោកស្រី ឈាង គឹមស៊ុន បានមានប្រសាសន៍ថា ក្រុមហ៊ុនបានបើកចំហរាល់ថ្ងៃក្នុងការទទួលការដោះស្រាយជាមួយប្រជាពលរដ្ឋ ប៉ុន្តែលោកស្រីបានអះអាងថា រឿងដោះស្រាយថាយ៉ាងណានោះ ភាគីក្រុមហ៊ុនមិនដឹងទេ គឺអាជ្ញាធរខែត្រ មានតួនាទីក្នុងការដោះស្រាយរឿងដីជម្លោះនេះ ៖ «សម្របសម្រួលរៀងរាល់ថ្ងៃហ្នឹង នេះជាកាតព្វកិច្ចរបស់ស្រុកខេត្តឃុំ ក្រុមហ៊ុនគ្រាន់តែចូលរួមតិចតួចទេ»។
អភិបាលស្រុកថ្ពង លោក ទួន សុង ក៏ដូចជាអភិបាលរងខែត្រកំពង់ស្ពឺ លោក ប៉ែន សំបូរ មិនបានធ្វើការអធិប្បាយអំពីករណីនេះទេ។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ លោក សំអាត បានមានប្រសាសន៍ថា ក្រុមហ៊ុន កំពង់ស្ពឺ Sugar គឺបានរំលោភយកដីប្រជាពលរដ្ឋក្នុងការទទួលសិទ្ធិវិនិយោគដីសម្បទានសេដ្ឋកិច្ចពីរដ្ឋាភិបាល ហើយក្រុមហ៊ុនក៏អនុវត្តផ្ទុយពីគោលការណ៍វិនិយោគនោះដែរ ៖ «ក្រុមហ៊ុនសារជាស្របច្បាប់បាន លុះត្រាតែមានកិច្ចសន្យាចុងក្រោយ ប៉ុន្តែឥឡូវយើងឥតទាន់ឃើញទេ ស្ថិតនៅក្នុងការស្រាវជ្រាវ ហើយនឹងបំពេញបែបបទឯកសារផ្សេងៗទៀត។ ផ្ទុយទៅវិញ យើងឃើញក្រុមហ៊ុនចាប់ផ្ដើមវិនិយោគ ធ្វើដូចជាខ្លួនហ្នឹងទទួលភាពពេញលេញ ស្រប់ច្បាប់រួចទៅហើយ។ នេះហើយជាទង្វើខុសផ្លូវច្បាប់»។
កាលថ្ងៃទី២៤ មិនាកន្លងទៅ អ្នកភូមិចំនួនពីរនាក់ត្រូវបានតុលាការខែត្រកំពង់ស្ពឺចាប់ខ្លួន នៅខណៈដែលតុលាការកោះហៅសាកសួរគឺឈ្មោះ យូ ថូ និងឈ្មោះ ឃឹម វុទ្ធី។ អ្នកទាំងពីរត្រូវគេចោទថា ញុះញង់ឲ្យមានអំពើហិង្សា សមគំនិត បង្កអគ្គិភ័យ និងបំផ្លិចបំផ្លាញទ្រព្យសម្បត្តិសាធារណៈ។
កាលពីថ្ងៃទី២៩ លោក យូ ថូ និង លោក ឃឹម វុទ្ធី ត្រូវបានតុលាការដោះលែងឲ្យនៅក្រៅឃុំជាបណ្ដោះអាសន្នវិញ បន្ទាប់ពីអ្នកភូមិប្រមាណ ៦០០នាក់ បានទាមទារឲ្យដោះលែង ដោយបិទផ្លូវជាតិលេខ៤។
ប្រជាពលរដ្ឋបានលើកឡើងទៀតថា បើសិនជាអាជ្ញាធរ ឬក្រុមហ៊ុនមិនរកដំណោះស្រាយឲ្យបានសមស្របទេនោះ ពួកគេនៅតែរារាំងត្រាក់ទ័រក្រុមហ៊ុនមិនឲ្យឈូសឆាយដីរបស់ពួកគាត់នោះទេ។
ទាក់ទងជាមួយបញ្ហាត្រាក់ទ័របន្តឈូសឆាយនេះ លោក អ៊ំ សំអាត ពីអង្គការលីកាដូ បានសំដែងការព្រួយបារម្ភថា ខ្លាចអ្នកភូមិទ្រាំនឹងការឈឺចាប់មិនបាននោះ ហើយប្រើអំពើហិង្សាម្ដងទៀត៕