លោក ម៉ម សូណង់ដូ ដែលជាប្រធានសមាគមន៍អ្នកប្រជាធិបតេយ្យដែរនោះ ហើយត្រូវប្រមុខរដ្ឋាភិបាលប្រកាសតាមចាប់ខ្លួនកន្លងមក នៅអាកាសយានដ្ឋានអន្តរជាតិភ្នំពេញ ត្រូវបានទទួលស្វាគមន៍ពីសមាជិកនៃសមាគមន៍របស់លោក និងអង្គការមួយចំនួនទៀត ដែលមានចំនួនសរុបទាំងអស់ជិត ៣០០នាក់។
នៅឯអាកាសយានដ្ឋាននោះ លោក ម៉ម សូណង់ដូ ដែលគ្មានត្រូវអាជ្ញាធររារាំង បានអំពាវនាវឲ្យសមាជិកសមាគមន៍អ្នកប្រជាធិបតេយ្យកុំឲ្យមានភ័យខ្លាចអ្វីទាំងអស់ ហើយបន្តសកម្មភាពរបស់សមាគមជាបន្តទៀត។
ប្រធានវិទ្យុសំបុកឃ្មុំ និងជាប្រធានសមាគមន៍អ្នកប្រជាធិបតេយ្យ លោក សូណង់ដូ អះអាងនៅចំពោះមុខអ្នកសារព័ត៌មាន និងសមាជិកសមាគមន៍អ្នកប្រជាធិបតេយ្យថា លោកមិនមានការភ័យខ្លាចអ្វីទាំងអស់ចំពោះដំណឹងដែលថារដ្ឋាភិបាលគ្រោងនឹងចាប់ខ្លួនលោក។
លោកមានប្រសាសន៍បន្ថែមថា លោកពុំបានត្រៀមខ្លួនសម្រាប់ការបកស្រាយអ្វីទាំងអស់ក្នុងការឆ្លើយតបនឹងការចោទប្រកាន់របស់រដ្ឋាភិបាល ពីព្រោះលោកពុំបានឃើញពាក្យបណ្ដឹងណាមួយ ពីមន្ត្រីរដ្ឋាភិបាល ចំពោះរូបលោកនោះឡើយ។ លោកបានត្រឹមតែលឺគេនិយាយថា លោកនឹងត្រូវអាជ្ញាធរចាប់ ពេលមកដល់ទីក្រុងភ្នំពេញ។
លោក ម៉ម សូណង់ដូ បន្តថា អ្វីដែលលោកមិនបានប្រព្រឹត្ត លោកមិនខ្លាចនឹងប្រឈមនោះឡើយ។ ដូច្នេះ លោកសុំអំពាវនាវសមាជិកសមាគមន៍អ្នកប្រជាធិបតេយ្យទាំងអស់កុំមានការភ័យខ្លាច សុំឲ្យបន្តនូវសកម្មភាពរបស់ខ្លួនជាបន្តទៀត ដើម្បីជំរុញឲ្យប្រជាជនមានសិទ្ធិសេរី និងមានអត្តសញ្ញាណប័ណ្ណបញ្ជាក់សញ្ជាតិខ្មែរគ្រប់គ្នា។ ឆ្លើយនឹងសំនួរថា បើសិនមានអ្នកសារភាពដែលមកពីក្រុមលោក ប៊ុន រដ្ឋា ដើម្បីទម្លាក់កំហុសលើរូបលោក តើលោកធ្វើយ៉ាងណា? លោក ម៉ម សូណង់ដូ ឆ្លើយថា វាមិនមែនជាការងាយស្រួលនោះទេ ក្នុងការទម្លាក់កំហុសទៅលើអ្នកណាម្នាក់ វាចាំបាច់ត្រូវការភស្តុតាង និងបង្ហាញហេតុផលឲ្យបានច្បាស់លាស់ដល់សាធារណជន ពុំនោះទេ ការចោទប្រកាន់នោះនឹងត្រូវគេរិះគន់។
ទាក់ទងនឹងការវិលត្រឡប់វិញនេះ មន្ត្រីសមាគមន៍ការពារសិទ្ធិមនុស្ស លីកាដូ (Licadho) លោក អំ សំអាត កោតសរសើរចំពោះសេចក្ដីក្លាហានរបស់លោក ម៉ម សូណង់ដូ ដែលហ៊ានមកតទល់ចំពោះការចោទប្រកាន់ ដើម្បីបញ្ជាក់ថា លោកមិនបានប្រព្រឹត្តដូចការចោទប្រកាន់នោះទេ។ លោក អំ សំអាត អះអាងបន្តថា តាមការលើកឡើងរបស់លោក ម៉ម សូណង់ដូ បញ្ជាក់ថា លោកមិនបានធ្វើអ្វីផ្ទុយទៅនឹងច្បាប់ ដូចពាក្យចចាមអារ៉ាមដែលចោទប្រកាន់មកលើរូបលោកនោះឡើយ។
នៅក្នុងឱកាសជួបជាមួយនិស្សិតស្ម័គ្រចិត្តជាង ១០០០នាក់ នៅក្រុងភ្នំពេញ នៅថ្ងៃទី២៦ មិថុនា លោកនាយករដ្ឋមន្ត្រី ហ៊ុន សែន បានប្រកាសដោយមិនបញ្ចេញឈ្មោះថា លោកនឹងបញ្ជាឲ្យមានការចាប់ខ្លួនប្រធានសមាគមន៍អ្នកប្រជាធិបតេយ្យ ដោយចោទពីបទប៉ុនប៉ងបង្កើតតំបន់អបគមន៍ នាភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ។ ពិតមែនតែលោកនាយករដ្ឋមន្ត្រី ហ៊ុន សែន មិនបានបញ្ចេញឈ្មោះប្រធានសមាគមន៍នោះក៏ដោយ តែជននោះត្រូវគេស្គាល់ថា គឺលោក ម៉ម សូណង់ដូ នោះឯង។
ទោះជាយ៉ាងណាក៏ដោយ ថ្មីៗនេះមន្ត្រីនាំពាក្យរដ្ឋាភិបាលកម្ពុជា លោក ផៃ ស៊ីផាន បានប្រាប់វិទ្យុអាស៊ីសេរី ថា រដ្ឋាភិបាលមិនមានគំរោងចាប់ខ្លួនលោក ម៉ម សូណង់ដូ ទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។