ការបដិសេធនេះ ក្រោយពីសភាព្រហ្មទណ្ឌនៃសាលាឧទ្ធរណ៍ បើកសវនាការរយៈពេលជាង ២ម៉ោងនោះ ដោយមានការចូលរួមតាមដានពីមន្ត្រីមកពីស្ថានទូតសហរដ្ឋអាមេរិក ស្ថានទូតបារាំង អង្គការសហប្រជាជាតិ និងសកម្មជនអង្គការសិទ្ធិមនុស្សជាតិ និងអន្តរជាតិមួយចំនួនទៀត។
ប្រធានសភាព្រហ្មទណ្ឌនៃសាលាឧទ្ធរណ៍លោក ឃុន លាងម៉េង នៅថ្ងៃទី១៤ ខែធ្នូ បានប្រកាសបន្តឃុំខ្លួនលោក ម៉ម សូណង់ដូ ប្រធានវិទ្យុសម្បុកឃ្មុំ និងជាប្រធានសមាគមអ្នកប្រជាធិបតេយ្យនៅក្នុងគុកព្រៃសបន្តទៀត។
ការបដិសេធនេះ គឺសំអាងថា ដើម្បីរក្សាសន្តិសុខសង្គម និងសណ្ដាប់ធ្នាប់សាធារណៈនៅកម្ពុជា ដូច្នេះសាលាឧទ្ធរណ៍មិនដោះលែងតាមសំណើនោះទេ។ សាលាឧទ្ធរណ៍សម្រេចរក្សាការឃុំខ្លួនដដែល ប៉ុន្តែតុលាការបើកផ្លូវឲ្យប្ដឹងទាស់ទៅតុលាការកំពូលទៀត។
នៅមុនការប្រកាសសាលដីកានេះ លោក ម៉ម សូណង់ដូ អាយុ ៧២ឆ្នាំ ក្នុងសំលៀកបំពាក់អាវពណ៌ផ្ទៃមេឃ ខោខ្មៅ និងពាក់ក្រវ៉ាត់ក បានមានប្រសាសន៍ទៅកាន់ចៅក្រមស៊ើបសួរលោក ឃុន លាងម៉េង ថា លោកសុំនៅក្រៅឃុំបណ្ដោះអាសន្ន ដោយលោកបានសន្យាថាមិនរត់គេចខ្លួនទេ ពីព្រោះលោកចង់បង្ហាញអំពីភាពបរិសុទ្ធ និងភាពគ្មានទោសពៃរ៍របស់លោក។ លោកបានបន្តទៀតថា លោកមានសុខភាពចុះខ្សោយ និងស្រកទម្ងន់១គីឡូក្រាមក្នុងមួយខែៗ។ លោកចង់បន្តជួយអ្នកក្រីក្របន្តទៀត។
ក្រោយពីការប្រកាសសាលដីកានេះ ភរិយារបស់លោក ម៉ម សូណង់ដូ អ្នកស្រី ឌិន ផាណារ៉ា បានមានប្រសាសន៍ប្រាប់អ្នកកាសែតថា អ្នកស្រី និងស្វាមី ព្រមទាំងមេធាវី បានសម្រេចប្ដឹងទាស់សាលដីកានេះទៅតុលាការកំពូលទៀត នៅថ្ងៃទី១៤ ខែធ្នូ៖ «ខ្ញុំនៅតែមានសង្ឃឹម និងជឿជាក់លើតុលាការថាលោកនឹងរកយុត្តិធម៌ លោកនឹងជួយដោះស្រាយឲ្យយ៉ាងល្អ ខ្ញុំនៅតែសង្ឃឹមដដែល»។
ជាមួយគ្នានេះ មេធាវីរបស់លោក ម៉ម សូណង់ដូ គឺលោក ស សូវាន បានមានប្រសាសន៍ថា លោកបន្តការពារក្តីនេះនៅតុលាការកំពូលទៀត៖ «ដូច្នេះគេបើកឲ្យកូនក្តីខ្ញុំឲ្យមានលទ្ធភាពប្ដឹងសាទុក្ខទៅតុលាការកំពូល។ ឥឡូវ ខ្ញុំប្ដឹងនៅថ្ងៃនេះភ្លាមទៅតុលាការកំពូលឲ្យជម្រះឡើងវិញ»។
ជុំវិញសំណុំរឿងនេះ ប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ បានមានប្រសាសន៍ថា ករណីរបស់លោក ម៉ម សូណង់ដូ គឺជារឿងនយោបាយ៖ «ការចាប់លោក ម៉ម សូណង់ដូ គឺជារឿងនយោបាយ ការដោះលែងឲ្យលោក ម៉ម សូណង់ដូ ឲ្យមានសេរីភាព ឬមួយក៏អត់ គឺជាការសម្រេចចិត្តនយោបាយ។ នៅក្នុងសវនាការ សាលាដំបូងក្រុងភ្នំពេញ គឺអត់មានភស្តុតាងអីមួយណាក្នុងការទម្លាក់បន្ទុកទៅលើលោក ម៉ម សូណង់ដូ ឲ្យគាត់ជាប់ពន្ធនាគារទេ»។
ប្រធានវិទ្យុសម្បុកឃ្មុំ និងជាប្រធានសមាគមអ្នកប្រជាធិបតេយ្យ លោក ម៉ម សូណង់ដូ ត្រូវបានសមត្ថកិច្ចនគរបាលជាតិបានចាប់ខ្លួននៅថ្ងៃទី១៥ ខែកក្កដា ឆ្នាំ២០១២។ ក្រោយមក សាលាដំបូងក្រុងភ្នំពេញ បានកាត់ទោសលោកជាប់គុក ២០ឆ្នាំ និងផាកពិន័យចំនួន ១០លានរៀល ស្មើនឹង ២.៥០០ដុល្លារអាមេរិក ក្រោមបទញុះញង់ឲ្យមានការប្រឆាំងមន្ត្រីរាជការសាធារណៈ និងបទធ្វើអបគមន៍នៅភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ នៅចន្លោះខែមីនា ខែមេសា និងខែឧសភា ឆ្នាំ២០១២ កន្លងទៅនេះ។
នៅក្នុងអំឡុងទស្សនកិច្ចនៅកម្ពុជា កាលពីខែវិច្ឆិកា កន្លងទៅនេះ ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) បានលើកយកករណីលោក ម៉ម សូណង់ដូ មកពិភាក្សាជាមួយលោកនាយករដ្ឋមន្ត្រី ហ៊ុន សែន ដោយលោកបានសម្ដែងការព្រួយបារម្ភអំពីស្ថានការណ៍រំលោភសិទ្ធិមនុស្សនៅកម្ពុជា ប៉ុន្តែលោក ហ៊ុន សែន បានបញ្ជាក់ថា នៅកម្ពុជា គ្មានអ្នកទោសនយោបាយទេ ប៉ុន្តែមានអ្នកនយោបាយដែលមានទោស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។