នគរបាលបានចាប់ឃាត់ខ្លួនបុរសម្នាក់ ពីបទសង្ស័យថា បានយកគ្រាប់មីនទៅដាក់បង្កប់ក្រោមដី ជិតទីកន្លែងដែលលោកនាយករដ្ឋមន្ត្រី ហ៊ុន សែន គ្រោងនឹងចុះទៅសម្ពោធបើកការដ្ឋានសាងសង់ផ្លូវជាតិលេខ៥៩ ពីខេត្តបន្ទាយមានជ័យ ទៅខេត្តប៉ៃលិន នៅថ្ងៃទី១៥ ខែកុម្ភៈ ឆ្នាំ២០១១។
ស្នងការរងនគរបាលខេត្តបន្ទាយមានជ័យ លោក ចាន់ កុសល់ បានមានប្រសាសន៍នៅថ្ងៃច័ន្ទ ទី១៤ ខែកុម្ភៈ ថាកាលពីវេលាម៉ោង ៦ល្ងាច ថ្ងៃអាទិត្យ ទី១៣ ខែកុម្ភៈ ជនសង្ស័យបានយកមីន ១គ្រាប់ ទៅដាក់បង្កប់ក្រោមដី ដែលមានចម្ងាយជិត ១ពាន់ម៉ែត្រ ពីទីកន្លែងរោងសម្ពោធបើកការដ្ឋានសាងសង់ផ្លូវជាតិលេខ៥៩ នៅក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ៖ «ឥឡូវរឿងហ្នឹង រឿងពិតហើយ ប៉ុន្តែកិច្ចការទាំងអស់ហ្នឹង យើងបានសហការគ្នាជាមួយស៊ីម៉ាក សហការជាមួយព្រះរាជអាជ្ញា ត្រង់គាត់សួរទៅវាមានបញ្ហាអី វាមានបញ្ហាអីពាក់ព័ន្ធនិងបទល្មើស ស្រេចតែខាងតុលាការគេចាត់ការបន្ត»។
មន្ត្រីសាលាខេត្តបន្ទាយមានជ័យបានឲ្យដឹងថា លោកនាយករដ្ឋមន្ត្រី ហ៊ុន សែន នឹងធ្វើដំណើរចុះទៅសម្ពោធបើកការដ្ឋានសាងសង់ផ្លូវជាតិលេខ៥៩ ពីខេត្តបន្ទាយមានជ័យ ទៅខេត្តប៉ៃលិន នៅថ្ងៃអង្គារ ទី១៥ ខែកុម្ភៈ ឆ្នាំ២០១១ ដែលរោងពិធីសម្ពោធនោះ ត្រូវគេរៀបចំឡើងនៅក្នុងសង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។
ការដាក់បង្កប់គ្រាប់មីនក្រោមដី គឺបានធ្វើឡើងមុនពេលពីរថ្ងៃ នៃការធ្វើដំណើររបស់លោកនាយករដ្ឋមន្ត្រី ហ៊ុន សែន។ ទោះយ៉ាងណា ក្រុមអាជ្ញាធរនៅមិនទាន់បានបញ្ជាក់ពីឈ្មោះជនសង្ស័យ មិនទាន់ធ្វើការសន្និដ្ឋានបែបណាឡើយ គ្រាន់តែបញ្ជាក់ថា នឹងកសាងសំណុំរឿងបញ្ជូនទៅឲ្យតុលាការចាត់ការតាមនីតិវិធី។
ប្រភពព័ត៌មានបានឲ្យដឹងថា គ្រាប់មីនដែលជនសង្ស័យបានប្រើប្រាស់ក្នុងការលួចយកទៅដាក់បង្កប់នោះ គឺជាប្រភេទគ្រាប់មីនឆ្នៃ ហើយជនសង្ស័យទំនងមានការជាប់ពាក់ព័ន្ធទៅនិងការស៊ីឈ្នួលគេឲ្យដាក់មីននេះ។ ប៉ុន្តែមេបញ្ជាការរងកងរាជអាវុធហត្ថខេត្តបន្ទាយមានជ័យ លោក ឱ បូរិន បានមានប្រសាសន៍ថា ករណីខាងនេះ មិនជាប់ពាក់ព័ន្ធទៅនិងអំពើភេរវកម្មទេ ៖ «បើយើងមើលតាមភូមិសាស្ត្រ វាដាក់វាមិនមែនទៅដាក់អ៊ីចឹងទេ យើងមិនអាចនិយាយអ៊ីចឹងបានទេ អានេះខ្ញុំបានចុះទៅកន្លែងកើតហេតុ គឺអត់មានទេ អត់មានហេតុផលហ្នឹងកើតឡើងទេ»។
ព្រះរាជអាជ្ញារងតុលាការខេត្តបន្ទាយមានជ័យ លោក តន់ សីហ:តេជ: បានមានប្រសាសន៍ថា ជនសង្ស័យនៅមិនទាន់បានបញ្ជូនមកឲ្យតុលាការទេ។ លោកបន្តថា តុលាការបានចាត់ឲ្យព្រះរាជអាជ្ញារងម្នាក់ទៀត ចុះពិនិត្យករណីនេះ ៖ «អត់ទាន់បានបញ្ជូនមកទេ ហើយរឿងនេះ ខ្ញុំបានចាត់ព្រះរាជអាជ្ញារងម្នាក់ ហើយតាមមើលទៅ គ្រាប់មីនហ្នឹងវានៅក្នុងទឹកស្រះ ហើយគ្នាលើកយកមកដាក់លើគោក អត់បានរាយការណ៍ទៅខាងរដ្ឋអំណាច»។
ទោះយ៉ាងណា លោក តន់ សីហ:តេជ: នៅមិនទាន់ធ្វើការសន្និដ្ឋានបែបណាឡើយ ជុំវិញករណីជនសង្ស័យខាងលើនេះ ប៉ុន្តែលោកអះអាងថា តុលាការនឹងធ្វើការសាកសួរតាមនីតិវិធីជាមុនសិន ទើបធ្វើការសន្និដ្ឋានបាន៕