តំណាងសហគមន៍ និងប្រជាពលរដ្ឋនៅភូមិសំពៅលូន ឃុំជាំតាម៉ៅ ស្រុកមេមត់ ខេត្តកំពង់ចាម បានសំណូមពរឲ្យអាជ្ញាធរជួយអន្តរាគមន៍ឲ្យម្ចាស់អាជីវកម្មធ្វើរ៉ែខុសច្បាប់ដឹកកាកសំណល់ដែលសល់ក្បែរប្រឡាយចេញ ដោយថាកាកសំណល់នោះមានជាតិពុល ហើយហូរចូលស្រែប្រជាពលរដ្ឋ។
លោក ត្រឹង ឡាវី តំណាងសហគមន៍បានផ្ដល់សម្ភាសន៍កាលពីថ្ងៃទី២០ វិច្ឆិកាថាប្រជាពលរដ្ឋបានសំណូមពរឲ្យលោកជួយស្នើទៅអាជ្ញាធរ ឲ្យជួយអន្តរាគមន៍ជំរុញឲ្យមានការដឹកដីកាកសំណល់ជាតិរ៉ែចេញបន្ទាប់ ពីព្រោះមានភ្លៀងម្ដងៗ កាកសំណល់នោះហូរចូលទៅក្នុងប្រឡាយ ធ្វើឲ្យរាក់ និងប៉ះពាល់ដល់ស្រូវសន្ទូងលាស់មិនរួច ៖ «ភ្លៀងធំថ្ងៃមុនឃើញងាប់ត្រី បារម្ភចង់ឲ្យគេដឹកកាកសំណល់ចេញផុតពីហ្នឹង»។
លោក ទុំ យ៉ម កសិករបានលើកឡើងថា បើមិនដឹកចេញទេ គួររកវិធីផ្សេងដើម្បីជួយប្រជាពលរដ្ឋ ៖ «រកស្អីទប់ស្កាត់កុំឲ្យហូរចូលប្រឡាយបាន ហើយចាក់ស៊ីម៉ង់បិទទប់តែម្ដងទៅ»។
លោក សួន ឌី នាយកមន្ទីរឧស្សាហកម្ម រ៉ែ និងឋាមពល បានបញ្ជាក់ជូនថា កាកសំណល់នេះសល់តាំងពីមុនមិនទាន់មានការឃុំគ្រង បើសិនជាប្រជាពលរដ្ឋលោកទាមទារឲ្យម្ចាស់អាជីវកម្មដឹកចេញដូចជាពិបាកដោះស្រាយ ៖ «បើសិនបងប្អូនប្រជាពលរដ្ឋទាមទារឲ្យពួកហ្នឹងវាធ្វើ វាដូចយើងពិបាកដោះស្រាយ ព្រោះពួកហ្នឹងដែលទៅធ្វើលើទីតាំងពីមុនមក សំខាន់បំផុតយើងទប់ស្កាត់កុំឲ្យធ្វើបន្តទៀត គឺបានដាក់វិធានការច្បាស់លាស់ហើយក្នុងករណីមិនរៀងចាលទេ នឹងកសាងបែបបទទៅតុលាការ ហើយសំខាន់ទាមទារការសិក្សាច្បាស់លាស់ណាស់»។
លោក ភោគ សាវុធ នាយករងមន្ទីរបរិស្ថានខេត្ត ក្នុងចំណោមគណៈកម្មការពិនិត្យដែលទទួលភារៈពិនិត្យជាតិពុលនៅក្នុងកាកសំណល់នោះ បានបញ្ជាក់ថាលទ្ធផលនឹងបង្ហាញបន្ទាប់ពីបុណ្យអុំទូកហើយ។
អាជីវកម្មលើដីរ៉ែមាសខុសច្បាប់នេះ ត្រូវបានអាជ្ញាធរខេត្តចេញលិខិតឲ្យបិទជាស្ថាពរ កាលពីថ្ងៃទី៩ ខែកញ្ញា បន្ទាប់ពីប្រជាពលរដ្ឋ ៣៥គ្រួសារបានផ្ដិតមេដៃប្ដឹងចោទប្រកាន់ថា បានធ្វើឲ្យមានផលប៉ះពាល់ដល់ដំណាំកសិកម្ម និងជីវចម្រុះ៕