ក្នុងញត្តិមានចំណងជើងថា បញ្ឈប់ការគាបសង្កត់លើសិទ្ធិបញ្ចេញមតិនៅកម្ពុជា ផ្ញើទៅកាន់លោក ប៉ារ៉ាក់ អូបាម៉ា (Barack Obama) កាលពីថ្ងៃព្រហស្បតិ៍ ទី១០ ខែមិថុនានេះ លោកស្រី មូរ សុខហួរ ជាបេក្ខភាពរង្វាន់ណូបែលសន្តិភាព បានសរសេរថា ការសម្រេចចិត្តរបស់តុលាការកំពូលជាការសម្រេចចិត្តនយោបាយ សំដៅគាបសង្កត់ចំពោះមេដឹកនាំគណបក្សប្រឆាំង។
តុលាការកំពូលកាលពីថ្ងៃពុធ ទី២ ខែមិថុនានេះ បានតម្កល់ការសម្រេចរបស់សាលាដំបូងរាជធានីភ្នំពេញ និងសាលាឧទ្ធរណ៍ ផាកពិន័យលោកស្រី មូរ សុខហួរ ជាទឹកប្រាក់ចំនួន ១៦លាន ៥សែនរៀល ពីបទបរិហារកេរ្តិ៍លោកនាយករដ្ឋមន្ត្រី ហ៊ុន សែន។
លោកស្រីបានបន្ថែមនៅក្នុងញត្តិនេះថា សហរដ្ឋអាមេរិកបានផ្ដល់ជំនួយប្រមាណជាង ៦០លានដុល្លារ ទៅឲ្យប្រទេសកម្ពុជានៅឆ្នាំ២០០៩ ដើម្បីកំណែទម្រង់ផ្នែកប្រជាធិបតេយ្យ និងអភិបាលកិច្ចល្អ ដូច្នេះសហរដ្ឋអាមេរិកមានការទទួលខុលត្រូវ ដើម្បីប្រកាសមិនយល់ព្រមចំពោះការសម្រេចចិត្តរបស់តុលាការនេះ ដែលជាការគំរាមកំហែងមួយចំពោះសេរីភាពបញ្ចេញមតិ និងសិទ្ធិទទួលបានប្រព័ន្ធយុត្តិធម៌ដែលមានភាពត្រឹមត្រូវ និងភាពស្មើភាពគ្នាចំពោះមុខច្បាប់។
នៅថ្ងៃសុក្រ ទី១១ ខែមិថុនានេះ មានអ្នកចុះហត្ថលេខាទូទាំងពិភពលោកចំនួន ៣៣៥រូប គាំទ្រឲ្យប្រធានាធិបតីសហរដ្ឋអាមេរិកថ្កោលទោសរដ្ឋាភិបាលលោក ហ៊ុន សែន។
លោក គី តិច ជាមេធាវីរបស់លោក ហ៊ុន សែន មានប្រសាសន៍កាលពីថ្ងៃសុក្រ ទី១១ ខែមិថុនានេះ ថា តុលាការកំពូលបានផ្ញើសាលក្រមស្ថាពររបស់ខ្លួន ទៅកាន់សាលាដំបូងរាជធានីភ្នំពេញ នៅថ្ងៃសុក្រនេះ ដើម្បីអនុវត្តការផាកពិន័យនេះ។
លោកបន្ថែមថា លោកមិនទាន់ដឹងនៅឡើយទេថា នៅពេលណាទើបតុលាការក្រុងភ្នំពេញនឹងបង្គាប់ឲ្យលោកស្រី មូរ សុខហួរ បង់ប្រាក់ពិន័យនេះ។ លោក គី តិច ធ្លាប់បានព្រមានលោកស្រី មូរ សុខហួរ ថា លោកស្រីនឹងអាចជាប់ពន្ធនាគារប្រហែល ៦ខែ ប្រសិនបើលោកស្រីមិនបង់ការផាកពិន័យ។
លោកស្រី មូរ សុខហួរ នៅតែប្រកាន់ជំហរថា លោកស្រីនឹងមិនបង់ប្រាក់ពិន័យនេះទេ ហើយត្រៀមខ្លួនចូលពន្ធនាគារ ប្រសិនបើមានការចាប់ខ្លួន។
លោក ហ៊ុន សែន បានដាក់បណ្ដឹងប្រឆាំងនឹងលោកស្រី មូរ សុខហួរ ក្រោយពេលដែលលោកស្រីបានដាក់ពាក្យបណ្ដឹងបរិហារកេរ្តិ៍ប្រឆាំងនឹងលោក ហ៊ុន សែន ចំពោះការប្រមាថរបស់លោក ធ្វើឡើងនៅខេត្តកំពត ថាលោកស្រីជាស្ត្រីជើងខ្លាំង៕