លោកស្រី មូរ សុខហួរ មានប្រសាសន៍បញ្ជាក់ថា លោកស្រីបានត្រៀមខ្លួនក្នុងការទៅបំភ្លឺជូនតុលាការ ហើយសង្ឃឹមថាតុលាការនឹងធ្វើការស្រាវជ្រាវឲ្យបានល្អិតល្អន់អំពីរឿងនេះ។
លោកស្រី មូរ សុខហួរ បានឲ្យដឹងថា ៖ «ខ្ញុំមានភស្តុតាងគ្រប់គ្រាន់ដែលប្រសាសន៍របស់សម្ដេចនាយកហ្នឹងគឺចង្អុលមកខ្ញុំ»។
លោកស្រី មូរ សុខហួរ បានប្តឹងបានដាក់ពាក្យបណ្តឹងទៅតុលាការក្រុងភ្នំពេញកាលពីថ្ងៃទី២៧ ខែមេសាកន្លងទៅ ប្តឹងលោកនាយករដ្ឋមន្ត្រី ហ៊ុន សែន ពីបទបរិហារកេរ្តិ៍ ដោយទាមទារសំណងជំងឺចិត្តជាប្រាក់៥០០រៀល បន្ទាប់ពីលោកនាយករដ្ឋមន្ត្រីបានមានប្រសាសន៍នៅឯខេត្តកំពតកាលពីថ្ងៃទី៤ មេសា ដោយចំហទាក់ទងនឹងស្រ្តីជើងខ្លាំងម្នាក់ពូកែរករឿងគេ រត់ទៅឱបគេសោះថាគេប្រឡេះឡេវអាវ។
ក្រោយពីលោកស្រី មូរ សុខហួរ បានប្តឹងលោកនាយករដ្ឋមន្រ្តី ហ៊ុន សែន បានប៉ុន្មានថ្ងៃ មេធាវីលោកនាយករដ្ឋមន្តី្រ គឺលោក គី តិច បានប្តឹងលោកស្រី មូរ សុខហួរ ដោយទារជំងឺចិត្ត១០លានរៀល ហើយបន្ថែមពីនោះទៀត លោក គី តិច ក៏បានប្តឹងមេធាវីរបស់លោកស្រីថែមទៀតដោយទាមទារឲ្យគណៈមេធាវីបណ្តេញលោក គង់ សំអុន ចេញពីគណៈមេធាវី ដោយចោទថា លោក គង់ សំអុន បានការពារអ្នកនយោបាយនិងបានធ្វើសន្និសីទកាសែតជាមួយអ្នកនយោបាយនោះគឺរំលោភទៅលើក្រមសីលធម៌មេធាវី។
ការប្តឹងបន្ថែមមកលើមេធាវីលោកស្រី មូរ សុខហួរ អង្គការឃ្លាំមើលសិទ្ធិមេធាវីនៃប្រទេសកាណាដាបានផ្ញើលិខិតជំហមួយជូនទៅប្រធានគណៈមេធាវីកម្ពុជាដោយទទួចសុំឲ្យគណៈមេធាវីប្រកាន់ជំហរការពារឯករាជភាពនិងវិជ្ជាជីវៈស្វយ័តរបស់ខ្លួនក្នុងកិច្ចការបម្រើយុត្តិធម៌។
មកដល់ពេលនេះលោកមេធាវី គង់ សំអុន មិនទាន់ត្រូវគេបណ្តេញចេញពីគណៈមេធាវីនៅឡើយទេ។
អគ្គលេខាធិការនៃគណៈមេធាវីកម្ពុជា លោក សួន វិសាល មានប្រសាសន៍ថា អង្គការឃ្លាំមើលសិទ្ធិមេធាវីនៃប្រទេសកាណាដាដែលបានផ្ញើលិខិតទៅគណៈមេធាវីនោះគឺជាសិទ្ធិសេរីភាពរបស់អង្គការនោះ ប៉ុន្តែការធ្វើការរបស់គណៈមេធាវីគឺផ្អែកលើមូលដ្ឋានច្បាប់។
វិទ្យុអាស៊ីសេរីមិនទាន់អាចទាក់ទងដើម្បីសុំការបំភ្លឺពីអយ្យការសាលាដំបូងក្រុងភ្នំពេញ លោក សុខ ចំរើន បានទេនៅថ្ងៃ៣០នេះ។
មេធាវីលោកស្រី មូរ សុខហួរ គឺលោក គង់ សំអុន មានប្រសាសន៍ថា លោកនឹងទៅបំភ្លឺតាមការអញ្ជើញរបស់តំណងអយ្យការសាលាដំបូងក្រុងភ្នំពេញជាមួយលោកស្រី មូរ សុខហួរ ដែរ។
លោក គង់ សំអុន បានបញ្ជាក់ថា ៖ «ខ្ញុំអត់មានបាននិយាយអីខុស ក្នុងពាក្យបណ្ដឹងរបស់លោកមេធាវី គី តិច ក៏អត់បានចង្អុលបង្ហាញថា មាត្រាណា ប្រការណាដែលខ្ញុំធ្វើខុសដែរ»។
ជុំវិញការប្តឹងផ្តល់របស់លោកស្រី មូរ សុខហួរ កន្លងមកលោកស្រីក៏មានការគំរាមដកអភ័យឯកសិទ្ធិសភាផងដែរ។
ទាក់ទងនឹងការគំរាមកំហែងនេះ កាលពីថ្ងៃទី២៩ មេសា អង្គការក្រៅរដ្ឋាភិបាលចំនួន៩ដែលមានឈ្មោះល្បីនៅកម្ពុជាបានចេញសេចក្តីថ្លែងការណ៍រួមគ្នាមួយថា ការគំរាមដកអភ័យឯកសិទ្ធិសមាជិកសភាគណបក្សសមរង្ស៊ី គឺលោកស្រី មូរ សុខហួរ នោះ ជាការបំភិតបំភ័យ៕