ប្រសាសន៍របស់លោកស្រី មូរ សុខហួរ ដែលជាអ្នកតំណាងរាស្ត្រខេត្តកំពត គឺបន្ទាប់ពីទូរទស្សន៍ក្នុងស្រុក CTN បានផ្សាយកាលពីយប់មិញថា មេធាវីរាជរដ្ឋាភិបាលនឹងដាក់ពាក្យប្តឹងលោកស្រីតំណាងរាស្ត្រវិញជាមួយការចោទពីបទបរិហារកេរ្តិ៍។
លោកស្រី មូរ សុខហួរ បានមានប្រសាសន៍ថា លោកស្រីមិនមានក្តីបារម្ភអ្វីទេ បើទោះបីជាបានទទួលព័ត៌មានថា លោកនាយករដ្ឋមន្ត្រី ហ៊ុន សែន បានប្តឹងលោកស្រីវិញនោះក៏ដោយ។
លោកស្រី មូរ សុខហួរ បានបញ្ជាក់ថា ៖ «ខ្ញុំអត់មានត្រូវការអីភិតភ័យទេ ផ្ទុយទៅវិញខ្ញុំចង់ឃើញយុត្តិធម៌ ខ្ញុំដែលទទួលរងគ្រោះ២ដងលើរឿងនេះ រំលោភលើសិទ្ធិខ្ញុំ២ដង។ ទី១ នៅពេលឃោសនាបោះឆ្នោត រឿងរបស់ខ្ញុំនៅឯតុលាការមិនទាន់ចប់ផង ឥឡូវដល់ទី២ ខ្ញុំនៅតែនិយាយដដែល លោក ហ៊ុន សែន ដែលខ្ញុំបានប្ដឹងថាបរិហារកេរ្តិ៍ គឺមានហេតុផលគ្រប់គ្រាន់ទាំងអស់»។
លោកស្រី មូរ សុខហួរ កំពុងតែប្តឹងលោកនាយករដ្ឋមន្ត្រីដោយទារយកជំងឺចិត្តតែប្រាក់ចំនួន៥០០រៀលពីបទចោទលោកនាយករដ្ឋមន្ត្រីខ្មែរថា បានបរិហារកេរ្តិ៍ជុំវិញប្រសាសន៍ថ្លែងមួយដែលបាននិយាយមិនចេញឈ្មោះថា តំណាងរាស្ត្រមួយរូបពេលឃោសនាបោះឆ្នោតដាច់ឡេវអាវខ្លួនឯងសោះ បែរជាចោទគេថា គេមានបំណងប៉ុនប៉ងបៀតបៀនរូបកាយរបស់ខ្លួនទៅវិញ៕