សេចក្តីថ្លែងដូច្នេះ ធ្វើឡើងនៅក្នុងសន្និសីទមួយរវាងលោកស្រី មូរ សុខហួរ ជាមួយក្រុមនិស្សិត កសិករ និងបណ្តាញស្ត្រីជាច្រើននាក់ ក្នុងការប្រកាសនូវលទ្ធផលសាច់ប្រាក់សរុបប្រមាណ ១៣,៨លានរៀល សម្រាប់ជួយលោកស្រី មូរ សុខហួរ ដើម្បីឲ្យលោកស្រីផ្តល់ឲ្យតុលាការដែលកំពុងទាមទារឲ្យលោកស្រីបង់ប្រាក់ពិន័យសងជំងឺចិត្តលោកនាយករដ្ឋមន្ត្រី ហ៊ុន សែន។
លោកស្រី មូរ សុខហួរ បានបញ្ជាក់នៅក្នុងពិធីនោះដោយក្តីរំភើបថា លោកស្រីនឹងប្រើថវិកានេះសម្រាប់គាំទ្រដល់ស្ត្រីរងគ្រោះទាំងឡាយប្រយុទ្ធនឹងវិស័យច្បាប់នៅកម្ពុជា។
លោកស្រី មូរ សុខហួរ ថ្លែងដូច្នេះ ៖ «គឺខ្ញុំមិនមកយកមួយកាក់មួយសេនមកប្រើជាប្រាក់ពិន័យសម្រាប់មកបង់ឲ្យខ្ញុំរួចខ្លួនទេ អត់ជាដាច់ខាត ខ្ញុំនឹងមិនយកមកប្រើដើម្បីជាផលប្រយោជន៍ខ្ញុំជាដាច់ខាត ហើយថវិកានេះគឺសម្រាប់ទុកជាសេវាមេធាវីជូនដល់ស្រ្តីដែលរងគ្រោះនឹងអំពើអយុត្តិធម៌ទាំងឡាយ»។
ទឹកប្រាក់នោះត្រូវបានគេប្រមូលចេញពីស្រទាប់និស្សិត សិស្ស កម្មករ កសិករ ស្ត្រីរកស៊ីផ្លូវភេទ និងស្រ្តីអ្នកលក់ស្រាបៀជាដើម ចំនួន ៤.១៤១នាក់ ដែលពួកគេមានការឈឺឆ្អាលចំពោះលោកស្រី មូរ សុខហួរ ហើយគេកំពុងតែប្រមូលបន្តទៅទៀតមិនទាន់បញ្ឈប់នៅឡើយទេ។
ក្រុមកសិករ និងនិស្សិតដែលបានចូលរួមនៅក្នុងជំនួបនោះ បានថ្លែងកោតសរសើរទៅដល់ជំហរលោកស្រី មូរ សុខហួរ ដែលហ៊ានតតាំងរឿងក្ដីក្ដាំជាមួយលោកនាយករដ្ឋមន្ត្រី ហ៊ុន សែន ដូច្នេះ ៖ «រូបខ្ញុំ និងរូបក្មេងស្រកក្រោយទាំងអស់ គួរឈឺចាប់ ដែលពិន័យមករំលោភសិទ្ធិមកលើនារីហ្នឹង ហើយឲ្យបង់ប្រាក់ គឺខ្ញុំដាច់ខាតមិនឲ្យបង់ទេ។ វីរស្ត្រីដែលមានភាពក្លាហាន តស៊ូដើម្បីសិទ្ធិសេរីភាពមិនដែលឃើញទេ»។
លោកស្រី មូរ សុខហួរ ត្រូវបានតុលាការសម្រេចឲ្យលោកស្រីចាញ់ក្តីលោកនាយករដ្ឋមន្ត្រីក្នុងបទបរិហារកេរ្តិ៍ ដោយតម្រូវឲ្យលោកស្រីបង់ប្រាក់សរុបជាង ១៦លានរៀល សម្រាប់ជាការពិន័យ និងជាការសងជំងឺចិត្តលោក ហ៊ុន សែន ក្រោយពីមានជម្លោះពាក្យសម្តីជាមួយលោក ហ៊ុន សែន កន្លងមក។
កាលពីសប្តាហ៍មុន ចៅក្រមតុលាការក្រុងភ្នំពេញ បានស្នើឲ្យរដ្ឋសភាកាត់ប្រាក់ខែលោកស្រី មូរ សុខហួរ ចំនួនជាង ៤លានរៀលក្នុងមួយខែ ដើម្បីបង្ខំឲ្យលោកស្រីសងជំងឺចិត្តលោកនាយករដ្ឋមន្ត្រី។
លោក ជាម យៀប សមាជិកគណៈកម្មាធិការអចិន្ត្រិយ៍នៃរដ្ឋសភា បានអះអាងថា លោកនៅមិនទាន់ឃើញមានលិខិតស្នើសុំនោះនៅឡើយទេ។ លោកបញ្ជាក់ទៀតថា គេនឹងកោះប្រជុំដើមខែក្រោយនេះ ដើម្បីសម្រេចកាត់ប្រាក់ខែលោកស្រី មូរ សុខហួរ បើទោះបីជាលោកស្រីមិនឲ្យកាត់ក៏ដោយ។
លោក ជាម យៀប មានប្រសាសន៍ដូច្នេះ ៖ «នេះជាសិទ្ធិរបស់តុលាការ ហើយរដ្ឋសភាចាំបាច់ត្រូវធ្វើតាមសំណើរបស់តុលាការ ព្រោះអីនេះត្រូវធ្វើម៉េចឲ្យស្របទៅតាមសាលដីកា ឬសាលក្រមរបស់តុលាការ»។
លោកស្រី មូរ សុខហួរ មានប្រាក់ខែចំនួន ៨លានរៀលក្នុងមួយខែ។ ប្រភពពីរដ្ឋសភាអះអាងថា គេអាចកាត់ប្រាក់ខែគាត់ចំនួន ៧០% ក្នុងមួយខែតាមការបញ្ជារបស់តុលាការ៕