ស្របពេលដែលលោកស្រីបានចាកចេញពីប្រទេសកម្ពុជានោះ លោកស្រីបានឲ្យជំនួយការរបស់លោកស្រីដាក់ពាក្យប្តឹងទៅតុលាការសាលាឧទ្ធរណ៍នៅថៃ្ងពុធ ទី៥ ខែសីហាផងដែរ ដោយមិនទាន់មានមេធាវីនៅទ្បើយទេ។
នៅមុនការចាកចេញតាមជើងយន្តហោះពាណិជ្ជកម្មពីទីក្រុងភ្នំពេញនៅរសៀលថៃ្ងពុធ ទី៥ ខែសីហា លោកស្រី មូរ សុខហួរ បានមានប្រសាសន៍ប្រាប់វិទ្យុអាស៊ីសេរីថា ការទៅនេះជាកិច្ចការផ្ទាល់ខ្លួន មិនមែនជាការគេចវេសពីផ្លូវតុលាការនោះទេ។
លោកស្រី មូរ សុខហួរ បានបញ្ជាក់ថា ៖ «ខ្ញុំទៅដើម្បីយកកូនខ្ញុំទៅចូលរៀនទេ។ ទៅពីថ្ងៃនេះរហូតដល់ថ្ងៃទី២០ ខែ៩»។
សុខ សេរី ៖ មិនមែនជាការគេចវេស...? មូរ សុខហួរ ៖ អត់ទេ! ផ្ទុយទៅវិញជំនួយការរបស់ខ្ញុំដាក់ពាក្យឧទ្ធរណ៍នៃការកាត់សេចក្ដីខ្ញុំម្សិលមិញហើយ ដូច្នេះសាលាឧទ្ធរណ៍បានកោះហៅខ្ញុំទៅសួររឿងហ្នឹង នៅថ្ងៃទី១៨ ខែ៨ខាងមុខនេះ។ មិននៅ ខ្ញុំបានសុំឲ្យពន្យារពេល។
លោក គី តិច ជាមេធាវីការពារក្តីឲ្យលោកនាយករដ្ឋមន្រ្តី ហ៊ុន សែន បានមានប្រសាសន៍ប្រតិកម្មចំពោះការប្តឹងឧទ្ធរណ៍របស់លោកស្រី មូរ សុខហួរ នោះ ថា ៖ «បើសិនជាគាត់មិនសុខចិត្ត គាត់មានសិទ្ធិប្ដឹងទៅឧទ្ធរណ៍។ គាត់ប្ដឹងឧទ្ធរណ៍ ខ្ញុំត្រូវតែតាមទៅទៀត»។
ទាក់ទងជាមួយករណីលោកស្រី មូរ សុខហួរ នេះ លោក អំ សំអាត ប្រធានផែ្នកស៊ើបអង្កេតនៃអង្គការសិទ្ធិមនុស្សលីកាដូ បានមានប្រសាសន៍ថា ៖ «បេសកកកម្មឯកជនរបស់គាត់ចេញទៅក្រៅនេះគឺមានគម្រោងយូរមកហើយ។ អ៊ីចឹងទេ គាត់ចេញទៅ ប៉ុន្តែចំពោះបញ្ហាផ្លូវច្បាប់ លោកស្រី មូរ សុខហួរ នៅមានសិទ្ធិក្នុងការប្ដឹងឧទ្ធរណ៍។ លោកស្រីក៏អាចរកមេធាវីផ្សេងដើម្បីការពារជូនលោកស្រីជាបន្តទៀតនៅសាលាឧទ្ធរណ៍។ នៅសាលាដំបូងយើងឃើញថា គួរឲ្យសោកស្ដាយដែរ ដោយគ្មានមេធាវីការពារក្ដីតាមផ្លូវច្បាប់ជូនលោកស្រីនៅសាលាដំបូងរាជធានីភ្នំពេញនេះ»។
ការចាកចេញរបស់លោកស្រី មូរ សុខហួរ ពីប្រទេសកម្ពុជា នៅថៃ្ងពុធ ទី៥ ខែសីហា ឆ្នាំ២០០៩នេះ គឺរយៈពេលមួយថៃ្ងតែប៉ុណ្ណោះ ក្រោយពីតុលាការសាលាដំបូងរាជធានីភ្នំពេញបានផ្តន្ទាទោសលោកស្រីក្រោមបទបរិហារកេរ្តិ៍ តាមមាត្រាទី៦៣ថ្មីនៃច្បាប់ព្រហ្មទណ្ឌសម័យ UNTAC។
អង្គការសិទ្ធិមនុស្សលីកាដូបានចេញសេចក្តីថែ្លងការណ៍មួយកាលពីថៃ្ងអង្គារថ្មីៗនេះថា ការផ្តន្ទាទោសនោះគឺអយុត្តិធម៌ គឺបានបង្ហាញថាតុលាការស្ថិតនៅក្រោមឥទ្ធិពលអំណាចរបស់រដ្ឋាភិបាលកម្ពុជា។
ការិយាល័យនៃឧត្តមស្នងការអង្គការសហប្រជាជាតិទទួលបន្ទុកផ្នែកសិទ្ធិមនុស្សនៅក្នុងប្រទេសកម្ពុជាបានចេញសេចក្តីថែ្លងការណ៍មួយនៅថៃ្ងពុធ ទី៥ ខែសីហា ថា ខ្លួនសុំបញ្ជាក់សុំឲ្យប្រកាន់ខ្ជាប់នូវសេរីភាពក្នុងការបញ្ចេញមតិការពារដោយច្បាប់រដ្ឋធម្មនុញ្ញនៅក្នុងប្រទេសកម្ពុជានោះ៕