លោក យឹម សុវណ្ណ តំណាងរាស្រ្តគណបក្សសមរង្ស៊ីនិងជាមន្រ្តីអ្នកនាំពាក្យផងដែរនេះ បានមានប្រសាសន៍បញ្ជាក់ថា ការវិលត្រទ្បប់មកវិញរបស់លោកស្រី មូរ សុខហួរ ជារឿងធម្មតា។
លោក យឹម សុវណ្ណ ថ្លែងយ៉ាងដូច្នេះ ៖ «គាត់ទៅមកបំពេញការងារធម្មតា ជាអ្នកតំណាងរាស្រ្ដនៃប្រទេសកម្ពុជា គាត់អញ្ជើញត្រឡប់មកវិញ ពីបេសកកម្មនៅក្រៅប្រទេស ហើយសភានឹងបើកប្រជុំក្នុងពេលឆាប់ៗ ដូច្នេះគាត់នឹងចូលរួមក្នុងកិច្ចការសភា បម្រើប្រជាពលរដ្ឋទៅតាមតែអ្វីដែលជាតួនាទីភារកិច្ចរបស់អ្នកតំណាងរាស្រ្ដ»។
សុខ សេរី ៖ ចុះរឿងអភ័យឯកសិទ្ធិរបស់លោកស្រី? យឹម សុវណ្ណ ៖ «លោកស្រី មូរ សុខហួរ បន្តដាក់ពាក្យបណ្ដឹងទៅសាលាឧទ្ធរណ៍ រង់ចាំសេចក្ដីសម្រេចរបស់សាលាឧទ្ធរណ៍»។
ទាក់ទងនឹងការវិលត្រទ្បប់មកវិញរបស់លោកស្រី មូរ សុខហួរ នាពេលឆាប់ៗនេះ លោកឧត្តមសេនីយ៍ឯក ខៀវ សុភ័គ ជាមន្រ្តីអ្នកនាំពាក្យនៃក្រសួងមហាផៃ្ទប្រទេសកម្ពុជា បានមានប្រសាសន៍ថា លោកស្រី មូរ សុខហួរ មិនត្រូវមានការព្រួយបារម្ភអំពីសុវត្ថិភាពផ្ទាល់ខ្លួន ឬសន្តិសុខផ្ទាល់ខ្លួនទេ។
លោក ខៀវ សុភ័គ ថ្លែងដូច្នេះថា ៖ «គាត់ដូចប្រជាពលរដ្ឋធម្មតា ព្រោះគាត់មិនទាន់ត្រូវបានសភាប្រគល់អភ័យឯកសិទ្ធិជូននៅឡើយទេ។ ចំពោះរឿងខ្ញុំមិនព្រួយបារម្ភទេ ប៉ុន្តែបើគាត់ព្រួយអាស្រ័យលើគាត់ ធម្មតាគាត់ដូចប្រជាពលរដ្ឋយើង ១៣-១៤លាននាក់ ការការពារសុវត្ថិភាពមានដូចគ្នា»។
លោក ចាន់ សុវ៉េត ជាមន្រ្តីស៊ើបអង្កេតនៃអង្គការសិទ្ធិមនុស្សក្រៅរដ្ឋាភិបាលមួយហៅកាត់ថា អាដហុក បានមានប្រសាសន៍អត្ថាធិប្បាយថា ៖ «បើសិនជាយ៉ាងណាក៏ដោយ ពាក់ព័ន្ធជាមួយនឹងបញ្ហាសុវត្ថិភាពរបស់មន្រ្តីនយោបាយរបស់គណបក្សនិងមន្រ្តីសង្គមស៊ីវិល វាជារឿងមួយដែលជាកាតព្វកិច្ចរបស់រាជរដ្ឋាភិបាលកម្ពុជា ក្នុងកិច្ចការពារដល់សន្តិសុខដល់ពួកគាត់»។
សូមជម្រាបថា លោកស្រី មូរ សុខហួរ តំណាងរាស្រ្តគណបក្សសមរង្ស៊ីមណ្ឌលខេត្តកំពត ត្រូវបានសភាជាតិបានលើកអភ័យឯកសិទ្ធិជាតំណាងរាស្រ្តកាលពីថៃ្ងទី២២ ខែមិថុនា កន្លងទៅ ជាមួយនឹងលោក ហូ វ៉ាន់ ជាតំណាងរាស្រ្តគណបក្សសមរង្ស៊ីផងដែរ។
ក្រោយមក តុលាការសាលាដំបូងរាជធានីភ្នំពេញ បានកាត់ទោសកំបាំងមុខ កាលពីថៃ្ងទី៤ ខែសីហា កន្លងទៅ ឲ្យលោកស្រីបង់ប្រាក់សំណងជំងឺចិត្តចំនួន១៦លាន៥សែនរៀល ក្រោមបទបរិហារកេរ្តិ៍ ប្តឹងដោយលោកនាយករដ្ឋមន្រ្តី ហ៊ុន សែន។
លោកស្រីបានប្តឹងទាស់ទៅនឹងសាលក្រមនេះ ភ្លាមៗក្រោយពីការប្រកាសសាលក្រមដោយគ្មានមេធាវីការពារនោះ។
លោកស្រីបានចាកចេញពីប្រទេសកម្ពុជា ទៅសហរដ្ឋអាមេរិក កាលពីថៃ្ងទី៥ ខែសីហា កន្លងទៅ ដើម្បីបេសកកម្មផងនិងរឿងផ្ទាល់ខ្លួនផង។
លោកស្រីចូលរួមក្នុងសវនាការរបស់គណៈកម្មការសិទ្ធិមនុស្សនៃសភាអាមេរិក ថៃ្ងទី១០ ខែកញ្ញាកន្លងទៅ នៅក្នុងទីក្រុងវ៉ាស៊ិនតោន សហរដ្ឋអាមេរិក ជាមួយលោកស្រី ពុង ឈីវកេក ប្រធានអង្គការសិទ្ធិមនុស្សលីកាដូ និងលោក មឿន តុលា ប្រធានកម្មវិធីពលកម្មនៃមណ្ឌលអប់រំច្បាប់សហគមន៍។
លោកស្រី មូរ សុខហួរ បានរិះគន់ដំណើរការអនុវត្តលទ្ធិប្រជាធិបតេយ្យនៅក្នុងប្រទេសកម្ពុជាក្នុងសវនាការនោះ និងបានរិះគន់សិទ្ធិសេរីភាពក្នុងការបញ្ចេញមតិ ដែលបានឲ្យមានការធ្វើប្រតិកម្មជាច្រើនពីមន្រ្តីជាន់ខ្ពស់នៅក្នុងរដ្ឋាភិបាលកម្ពុជា៕