ទឹកប្រាក់ ៨លាន ៥សែនរៀលនេះ ជាប្រាក់ផាកពិន័យករណីដែលលោកស្រីត្រូវតុលាការកាត់ឲ្យចាញ់ក្តីករណីបរិហារកេរ្តិ៍លោកនាយករដ្ឋមន្ត្រី ហ៊ុន សែន។ ការកាត់ប្រាក់ខែនេះជាការកាត់ប្រាក់ខែលើកទី២ របស់លោកស្រី មូរ សុខហួរ ដោយកាលពីខែកក្កដា រដ្ឋសភាកម្ពុជាបានសម្រេចកាត់ប្រាក់ខែលោកស្រី មូរ សុខហួរ ម្តងរួចហើយ ចំនួន ៨លានរៀល ជាប្រាក់សំណងជំងឺចិត្តលោក ហ៊ុន សែន។
លោកស្រី មូរ សុខហួរ ថ្លែងថា ការកាត់ប្រាក់ខែលើកទី២ របស់រដ្ឋសភាកម្ពុជា ជាការលើកទឹកចិត្តឲ្យមានប្រព័ន្ធតុលាការមិនឯករាជ ដែលនៅក្រោមគំនាបនយោបាយ។
សមាជិកគណៈកម្មាធិការអចិន្ត្រៃយ៍រដ្ឋសភា លោក ជាម យៀប បានប្រាប់វិទ្យុអាស៊ីសេរីនៅថ្ងៃពុធ ទី១១ សីហា ថា រដ្ឋសភានឹងអនុវត្តតាមការស្នើសុំរបស់តុលាការក្រុងភ្នំពេញ ឲ្យរដ្ឋសភារឹបអូសប្រាក់ខែតំណាងរាស្ត្រលោកស្រី មូរ សុខហួរ ចំនួន ៨លាន ៥សែនរៀល ទៅឲ្យរតនាគារជាតិកម្ពុជា។
លោក ជាម យៀប បន្ថែមថា រដ្ឋសភាត្រូវគោរពសេចក្ដីសម្រេចរបស់តុលាការ ក្នុងការកាត់ប្រាក់ខែលោកស្រី មូរ សុខហួរ ហើយការស្នើកាត់ប្រាក់ខែរបស់តុលាការក្រុងភ្នំពេញវាសមស្រប ពីព្រោះតុលាការមិនបានកាត់ប្រាក់ខែលោកស្រីទាំងស្រុងនោះទេ គឺលោកស្រីនៅមានសល់ប្រាក់ខែសម្រាប់ជីវភាពរបស់លោកស្រី។
ចៅក្រមសាលាដំបូងរាជធានីភ្នំពេញ លោក ជា សុខហៀង កាលពីថ្ងៃច័ន្ទ ទី៩ សីហា បានសម្រេចរឹបអូសប្រាក់របស់លោកស្រី មូរ សុខហួរ ក្នុងមួយខែៗចំនួនប្រមាណ ៤លាន ២សែនរៀល រហូតដល់ចំនួន ៨លាន ៥សែនរៀល បន្ទាប់ពីរដ្ឋសភាអនុវត្តកាត់ប្រាក់សំណងជំងឺចិត្តលោក ហ៊ុន សែន រួចហើយ។ លោក ជា សុខហៀង ក៏បានបញ្ជាឲ្យលោកស្រី មូរ សុខហួរ មិនត្រូវរារាំង ឬហាមឃាត់មន្ត្រីទទួលបន្ទុកបើកប្រាក់បៀវត្សនៅឯរដ្ឋសភាទេ។
រដ្ឋសភាបានសម្រេចរួចហើយ ដើម្បីដាក់ប្រាក់ខែលោកស្រី មូរ សុខហួរ ក្នុងខែកក្កដា និងសីហា ចំនួន ៨លានរៀល សងទៅឲ្យលោក ហ៊ុន សែន ហើយរដ្ឋសភានឹងបន្តការកាត់ប្រាក់ខែស្រដៀងគ្នានេះក្រោយខែសីហា។ តុលាការក្រុងភ្នំពេញកាត់ឲ្យលោកស្រីបង់ប្រាក់ពិន័យ ដែលលោកស្រីចាញ់ក្តីក្នុងករណីបរិហារកេរ្តិ៍ចំនួន ១៦លាន ៥សែនរៀល។
លោកស្រី មូរ សុខហួរ នៅថ្ងៃពុធ ប្រកាសមិនយល់ព្រមឲ្យកាត់ប្រាក់ខែរបស់លោកស្រីទេ ពីព្រោះលោកស្រីជាជនរងគ្រោះពីការបរិហារកេរ្តិ៍ដោយលោក ហ៊ុន សែន។ លោកស្រីបន្ថែមថា រដ្ឋសភាមិនបានផ្តល់ការការពារដល់សមាជិករបស់ខ្លួន ដែលត្រូវបានរំលោភដោយតុលាការ ដោយអយុត្តិធម៌ទេ។
លោក ជាម យៀប ពន្យល់ថា រដ្ឋសភាត្រូវតែកាត់ប្រាក់ខែលោកស្រីបន្ថែម ពីព្រោះរដ្ឋសភាមិនអាចប្រឆាំងនឹងការសម្រេចរបស់តុលាការបានទេ។ លោកថា លោកស្រី មូរ សុខហួរ ត្រូវទទួលទោសចំពោះការប្រព្រឹត្តរបស់ខ្លួន។
គណៈកម្មាធិការសិទ្ធិមនុស្សរបស់សហភាពអន្តរសភា (IPU) កាលពីខែកក្កដា បានប្រកាសសេចក្ដីសម្រេចរបស់ខ្លួនថា ការកាត់ទោសរបស់លោកស្រី មូរ សុខហួរ ជាការប្រកាសអាសន្ន ហើយវាជាការសើចចំអកចំពោះប្រព័ន្ធយុត្តិធម៌។
សហភាពអន្តរសភា (IPU) ដែលជាអង្គការសភាអន្តរជាតិ ដែលមានសមាជិកចំនួន ១៥៥ប្រទេស បានស្នើឲ្យអាជ្ញាធរកម្ពុជា រួមទាំងរដ្ឋសភាកម្ពុជា ចាត់វិធានការដើម្បីធ្វើការកែកុនសភាពការណ៍ចំពោះករណីលោកស្រី មូរ សុខហួរ។ សហភាពអន្តរសភា នឹងបន្តពិនិត្យករណីលោកស្រី មូរ សុខហួរ ក្នុងកិច្ចប្រជុំរបស់ខ្លួននៅខែតុលា ឆ្នាំ២០១០។
លោក ជាម យៀប បានបដិសេធការចោទប្រកាន់របស់គណៈកម្មាធិការសិទ្ធិមនុស្សរបស់សហភាពអន្តរសភា (IPU) ដោយលោកសំអាងថា សហភាពអន្តរសភានេះមិនយល់អំពីច្បាប់កម្ពុជា៕