លោក ហ៊ុន សែន បញ្ជាក់​ជំហរ​ជា​ថ្មី​ចំពោះ​ការ​ដោះស្រាយ​បញ្ហា​ដីធ្លី

បញ្ហា​ជម្លោះ​ដីធ្លី​នៅ​កម្ពុជា នៅ​តែ​ជា​បញ្ហា​ចោទ​នៅ​ឡើយ​នៅ​តាម​តំបន់​ជម្លោះ​នីមួយៗ​នោះ។ ទំនាស់​នេះ ជួន​កាល​មាន​អំពើ​ហិង្សា​កើត​ឡើង និង​មាន​សកម្មជន​ការពារ​សិទ្ធិ​មនុស្ស​ចុះ​ទៅ​ស៊ើប​អង្កេត​ផ្ទាល់​នៅ​កន្លែង​កើត​ហេតុ និង​ផ្ដល់​ប្រឹក្សា​យោបល់​ផ្នែក​ផ្លូវ​ច្បាប់​ជូន​ប្រជាពលរដ្ឋ​រង​គ្រោះ។

0:00 / 0:00

ទន្ទឹម​នឹង​នោះ ប្រជាពលរដ្ឋ​អ្នក​រង​គ្រោះ​នៅ​ក្រោយ​ពេល​រក​ដំណោះស្រាយ​ពី​អាជ្ញាធរ​មូលដ្ឋាន​មិន​បាន​ជោគជ័យ​អំពី​បញ្ហា​ជម្លោះ​ដីធ្លី​នេះ ប្រជាពលរដ្ឋ​រង​គ្រោះ​ពួក​គាត់​រត់​ទៅ​រក​មន្ត្រី​អង្គការ​សង្គម​ស៊ីវិល និង​តំណាង​រាស្ត្រ​គណបក្ស​ប្រឆាំង ដើម្បី​ឲ្យ​ជួយ​ពួក​គាត់​តាម​ផ្លូវ​ច្បាប់។

ជា​ថ្មី​ម្ដង​ទៀត លោកនាយក​រដ្ឋមន្ត្រី ហ៊ុន សែន បាន​ប្រកាស​ថា លោក​នឹង​ដោះស្រាយ​ទាំង​អស់​នូវ​រាល់​បញ្ហា​ជម្លោះ​ដីធ្លី​ដែល​កើត​មាន ប៉ុន្តែ​លោក​បញ្ជាក់​ថា ប្រសិន​បញ្ហា​ជម្លោះ​ដីធ្លី​នោះ​ត្រូវ​បាន​អង្គការ​សង្គម​ស៊ីវិល ឬ​គណបក្ស​នយោបាយ​លូក​ដៃ​ដោះស្រាយ​ក្រោម​រូបភាព​នយោបាយ លោក​មិន​ដោះស្រាយ​ជូន​នោះ​ទេ។

លោក ហ៊ុន សែន មាន​ប្រសាសន៍​ដូច្នេះ​នៅ​ក្នុង​ឱកាស​បើក​ការដ្ឋាន​សាងសង់​ស្ពាន​អាកាស​ស្ទឹងមានជ័យ ខណ្ឌ​មានជ័យ រាជធានី​ភ្នំពេញ នៅ​ថ្ងៃ​ទី២៦ វិច្ឆិកា។ លោក ហ៊ុន សែន មាន​ប្រសាសន៍​ថា បើ​សិន​ជា​អង្គការ គណបក្ស​ប្រឆាំង ឬ​អង្គការ​សង្គម​ស៊ីវិល ចូល​រួម​ដោះស្រាយ​បញ្ហា​ជម្លោះ​ដីធ្លី​ដោយ​គ្មាន​ចេតនា​នយោបាយ​នោះ គ្មាន​បញ្ហា​អ្វី​ទេ។

ការ​ប្រកាស​បញ្ជាក់​ឡើង​វិញ​របស់​លោក ហ៊ុន សែន ដូច្នេះ នៅ​បន្ទាប់​ពី​លោក​មាន​ប្រសាសន៍​កាល​ពី​ថ្ងៃ​ទី២៣ វិច្ឆិកា ថា លោក​នឹង​មិន​ដោះស្រាយ​បញ្ហា​ដីធ្លី​ទាំង​ឡាយ​ណា​ដែល​មាន​អ្នក​នយោបាយ និង​សង្គម​ស៊ីវិល​ចូល​រួម​ឈឺឆ្អាល​នោះ​ឡើយ ព្រោះ​អ្នក​នយោបាយ និង​មន្ត្រី​សង្គម​ស៊ីវិល​ទាំង​នោះ បង្ក​ឲ្យ​រដ្ឋាភិបាល​ពិបាក​ក្នុង​ការ​ដោះស្រាយ​លើ​បញ្ហា​ទាំង​នោះ។

ប្រជាពលរដ្ឋ និង​អង្គការ​សង្គម​ស៊ីវិល បាន​បញ្ចេញ​ប្រតិកម្ម​ចំពោះ​លោក ហ៊ុន សែន ដែល​ថា លោក​មិន​ដោះស្រាយ​ចំពោះ​ករណី​ជម្លោះ​ដីធ្លី​ណា​ដែល​មាន​អង្គការ​សង្គម​ស៊ីវិល និង​បក្ស​ប្រឆាំង​លូក​ដៃ​នោះ។ ដោយ​ពួក​គេ​បាន​ចាត់​ទុក​ការ​ប្រកាស​របស់​លោក ហ៊ុន សែន បែប​នេះ ជា​រឿង​លាប​ពណ៌​រើសអើង និង​ការ​បែង​ចែក​បក្ខពួក គឺ​ផ្ទុយ​ពី​អ្វី​ដែល​មាន​ចែង​នៅ​ក្នុង​រដ្ឋធម្មនុញ្ញ។

ប៉ុន្តែ ទោះ​ជា​យ៉ាង​ណា​ក៏ដោយ ការ​ប្រកាស​ជំហរ​ជា​ថ្មី​របស់​លោក ហ៊ុន សែន នៅ​ពេល​នេះ ត្រូវ​បាន​អង្គការ​សង្គម​ស៊ីវិល បាន​ស្វាគមន៍​ចំពោះ​ការ​បកស្រាយ​ជា​ថ្មី​ឡើង​វិញ​អំពី​គោល​ជំហរ​របស់​រដ្ឋាភិបាល សហការ​ជាមួយ​អង្គការ​សង្គម​ស៊ីវិល​ដែល​ចូល​រួម​ក្នុង​ការ​ដោះស្រាយ​បញ្ហា​ជម្លោះ​ដីធ្លី​នោះ។

នាយក​លេខាធិការដ្ឋាន​នៃ​ក្រុម​ការងារ​ពិសេស​សិទ្ធិ​លំនៅឋាន លោក សៀរ ភារម្យ មាន​ប្រសាសន៍​ថា អង្គការ​សង្គម​ស៊ីវិល​ធ្វើ​ការងារ​មាន​បេសកកម្ម និង​ទស្សនៈ​វិស័យ​របស់​ខ្លួន​ច្បាស់​លាស់​ក្នុង​ការ​ប្រឹក្សា​យោបល់​ផ្នែក​ផ្លូវ​ច្បាប់​ជូន​ប្រជាពលរដ្ឋ ក្នុង​ការ​ទប់ស្កាត់​នូវ​អំពើ​ហិង្សា​កើត​មាន​នៅ​ពេល​មាន​ជម្លោះ​ដីធ្លី ពុំ​មែន​ទាក់​ទង​នឹង​រឿង​នយោបាយ​អ្វី​ទេ។

ទោះ​បី​ជា​យ៉ាង​ណា​ក៏ដោយ ក្រុម​អ្នក​វិភាគ​បាន​លើក​ឡើង​ថា អង្គការ​សង្គម​ស៊ីវិល គណបក្ស​ប្រឆាំង និង​រដ្ឋាភិបាល មាន​តួនាទី ទស្សនៈ​វិស័យ និង​ការ​ទទួល​ខុស​ត្រូវ​ខុស​គ្នា។ ប៉ុន្តែ​បញ្ហា​សំខាន់​នៅ​ត្រង់​ថា រដ្ឋាភិបាល​មាន​តួនាទី​សំខាន់​ណាស់ គឺ​ការ​ទទួល​ខុស​ត្រូវ​រួម។ រដ្ឋាភិបាល​មិន​អាច​ធ្វើ​ការ​ចោទ​ប្រកាន់ និង​បែង​ចែក​អំពី​ក្រុម​នេះ ក្រុម​នោះ​បាន​ទេ។ រាល់​ករណី​ជម្លោះ​ដីធ្លី​ដែល​កើត​មាន រដ្ឋាភិបាល​មាន​តួនាទី​សំខាន់​ណាស់​ក្នុង​ការ​ដោះស្រាយ។ រដ្ឋាភិបាល​មិន​អាច​ទម្លាក់​ចោល ហើយ​ចោទ​ថា មក​ពី​អ្នក​នេះ​លូក​ដៃ អ្នក​នោះ​លូក​ដៃ​បាន​ទេ។

មន្ត្រី​ស៊ើប​អង្កេត​ជាន់​ខ្ពស់​នៃ​អង្គការ​សិទ្ធិ​មនុស្ស​លីកាដូ (Licadho) លោក អំ សំអាត បាន​សង្កត់​ធ្ងន់​ថា ប្រជាពលរដ្ឋ​រង​គ្រោះ​រឿង​ដីធ្លី​កន្លង​មក ដោយ​សារ​តែ​ពួក​គាត់​គ្មាន​ជម្រើស​អ្វី​ផ្សេង ក្រៅ​ពី​ទៅ​រក​មន្ត្រី​អង្គការ​សង្គម​ស៊ីវិល និង​ក្រុម​អ្នក​តំណាង​រាស្ត្រ​គណបក្ស​ប្រឆាំង ដើម្បី​ជួយ​គាត់ ពីព្រោះ​អាជ្ញាធរ​ពាក់ព័ន្ធ​មិន​បាន​ជួយ​ពួក​គាត់។ លោក អំ សំអាត បញ្ជាក់​ថា ក្រោយ​ពី​អង្គការ​សង្គម​ស៊ីវិល​ប្រមូល​បាន​ព័ត៌មាន​អំពី​បញ្ហា​ជម្លោះ​ដីធ្លី​នេះ ក៏​យក​ទៅ​ដាក់​នៅ​ស្ថាប័ន​ពាក់ព័ន្ធ ឬ​ដាក់​ឲ្យ​រដ្ឋាភិបាល​ជា​អ្នក​ដោះស្រាយ​ដដែល​ទេ អង្គការ​សង្គម​ស៊ីវិល​គ្មាន​សមត្ថកិច្ច​ដោះស្រាយ​ទេ។

អង្គការ​សង្គម​ស៊ីវិល បក្ស​ប្រឆាំង និង​រដ្ឋាភិបាល មាន​តួនាទី​ខុសៗ​គ្នា ប៉ុន្តែ​នៅ​ក្នុង​ប្រទេស​ប្រជាធិបតេយ្យ គេ​តម្រូវ​ឲ្យ​ស្ថាប័ន​ទាំង​បី​នេះ​ជា​កត្តា​សំខាន់ ក្រៅ​ពី​ស្ថាប័ន​រដ្ឋាភិបាល​ដែល​មាន​ស្រាប់​នោះ។ អង្គការ​សង្គម​ស៊ីវិល ជា​កញ្ចក់​ឆ្លុះ​បញ្ចាំង​រាល់​តថភាព​នៃ​ការ​អនុវត្ត​ច្បាប់ គណបក្ស​ប្រឆាំង​មាន​តួនាទី​តាម​ដាន និង​អង្កេត​ទៅ​លើ​សកម្មភាព​ខ្វះខាត​របស់​រដ្ឋាភិបាល និង​លើក​ពី​ចំណុច​ខ្វះខាត​ទាំង​នោះ​ឲ្យ​រដ្ឋាភិបាល​កែ​តម្រូវ និង​ដោះស្រាយ។

មន្ត្រី​នាំ​ពាក្យ​គណបក្ស សម រង្ស៊ី លោក យឹម សុវណ្ណ មាន​ប្រសាសន៍​ថា លោក​សាទរ​ប្រសិន​បើ​រដ្ឋាភិបាល​មាន​យន្តការ​ច្បាស់​លាស់​ក្នុង​ការ​ដោះស្រាយ​បញ្ហា​ជម្លោះ​ដីធ្លី​ឲ្យ​មាន​តម្លាភាព និង​ត្រឹមត្រូវ។ លោក​អះអាង​ថា គណបក្ស​ប្រឆាំង​ធ្វើ​សកម្មភាព​ជូន​ប្រជាពលរដ្ឋ​អំពី​បញ្ហា​ដីធ្លី​នេះ មិន​មែន​ជា​រឿង​នយោបាយ​ទេ គឺ​គេ​គ្រាន់​តែ​បំពេញ​តួនាទី​របស់​ខ្លួន​ជា​អ្នក​តំណាង​របស់​ប្រជាពលរដ្ឋ​តែ​ប៉ុណ្ណោះ។

ម្យ៉ាង​វិញ​ទៀត អនុប្រធាន​ក្រុម​ស៊ើប​អង្កេត​នៃ​សមាគម​សិទ្ធិ​មនុស្ស​អាដហុក លោក ចាន់ សុវ៉េត បាន​បញ្ជាក់​ថា ទោះ​បី​ជា​យ៉ាង​ណា​ក៏ដោយ អង្គការ​សង្គម​ស៊ីវិល​នៅ​តែ​បន្ត​ការងារ​របស់​ខ្លួន​ក្នុង​ទិសដៅ​ការពារ​ការ​រំលោភ​សិទ្ធិ​មនុស្ស និង​ការពារ​បញ្ហា​អយុត្តិធម៌​នៅ​ក្នុង​សង្គម។ តួ​យ៉ាង​ដូច​ជា​ករណី​ជម្លោះ​ដីធ្លី​នេះ លោក ចាន់ សុវ៉េត បាន​ជំរុញ​ឲ្យ​រដ្ឋាភិបាល​ប្រើប្រាស់​យន្តការ​ដែល​មាន​ស្រាប់ រួម​មាន អាជ្ញាធរ​ជាតិ​ដោះស្រាយ​វិវាទ​ដីធ្លី និង​គណៈកម្មការ​ស្រុក-ខណ្ឌ ដើម្បី​ដោះស្រាយ​ដីធ្លី​ជាដើម។

បន្ថែម​ពី​លើ​បញ្ហា​នេះ អ្នក​វិភាគ​បាន​ពន្យល់​ថា ក្នុង​នាម​ជា​រដ្ឋាភិបាល​ដឹកនាំ​ប្រទេស ទោះ​បី​ជា​ករណី​ជម្លោះ​ដីធ្លី​នោះ​ស្ថិត​នៅ​ក្នុង​កណ្ដាប់​ដៃ​របស់​ស្ថាប័ន​ណា​ក៏ដោយ គឺ​នៅ​តែ​ជា​បន្ទុក​របស់​រដ្ឋាភិបាល​ជា​អ្នក​ដោះស្រាយ រដ្ឋាភិបាល​មិន​ត្រូវ​ចោទ​ប្រកាន់ ឬ​លាប​ពណ៌​ថា ករណី​នេះ គណបក្ស​នេះ​គណបក្ស​នោះ បាន​លូក​ដៃ​ដើម្បី​ចង់​ចំណេញ​រឿង​នយោបាយ​នោះ​ទេ។

អ្នក​វិភាគ​បាន​លើក​ទឡ្ហីករណ៍​ថា រដ្ឋាភិបាល​បាន​អះអាង​ថា ករណី​ជម្លោះ​ដីធ្លី​ណា​ដែល​មាន​គណបក្ស​នយោបាយ​លូក​ដៃ​ដោះស្រាយ ហើយ​ទាញ​យក​ចំណេញ​នយោបាយ​បក្ស​របស់​ខ្លួន​នោះ លោក​មិន​ដោះស្រាយ​ជូន​នោះ ជា​ការ​ឆ្លុះ​បញ្ចាំង​អំពី​ការ​មិន​ទទួល​ខុស​ត្រូវ​របស់​រដ្ឋាភិបាល។ អ្នក​វិភាគ​បាន​ពន្យល់​ថា រដ្ឋាភិបាល​មិន​អាច​រ៉ាប់រង​នូវ​បញ្ហា​នៅ​ក្នុង​សង្គម​បាន​តែ​ម្នាក់​ឯង​បាន​ទេ រដ្ឋាភិបាល​ត្រូវ​មាន​គំនិត​សុទិដ្ឋិនិយម​នៅ​ពេល​មាន​អង្គការ​សង្គម​ស៊ីវិល និង​គណបក្ស​ប្រឆាំង​ជួយ​ដោះស្រាយ​រឿង​ជម្លោះ​ដីធ្លី ដើម្បី​ប្រយោជន៍​ប្រជាពលរដ្ឋ​នោះ ពីព្រោះ​ថា​សកម្មភាព​ទាំង​នេះ​ស្រប​ទៅ​នឹង​សង្គម​ប្រជាធិបតេយ្យ។

ម្យ៉ាង​វិញ​ទៀត ក្រុម​អ្នក​វិភាគ​អះអាង​ថា បើ​ពិនិត្យ​មើល​សកម្មភាព​ជួយ​ប្រជាពលរដ្ឋ​នេះ ហើយ​ទាញ​យក​ចំណេញ​ខាង​ផ្នែក​នយោបាយ​នេះ លោក​នាយក​រដ្ឋមន្ត្រី ហ៊ុន សែន ដែល​ជា​អនុប្រធាន​គណបក្ស​ប្រជាជន មាន​ឱកាស​ច្រើន​ជាង​គេ​នៅ​ក្នុង​ការ​បំពេញ​ការងារ​ជូន​ប្រជាពលរដ្ឋ ហើយ​ទាញ​យក​ចំណេញ​ខាង​ផ្នែក​នយោបាយ ដូច​ជា​ការ​ចុះ​ទៅ​ចែក​ប័ណ្ណ​កម្មសិទ្ធិ​ជូន​ប្រជាពលរដ្ឋ​ជាដើម លោក​តែង​តែ​លើក​ឡើង​ថា ដរាប​ណា​គណបក្ស​ប្រជាជន​ឈ្នះ​ឆ្នោត លោក​នឹង​នៅ​តែ​ផ្ដល់​ប័ណ្ណ​កម្មសិទ្ធិ​ជូន​ប្រជាពលរដ្ឋ។

របាយការណ៍​បណ្ដោះ​អាសន្ន​របស់​អង្គការ​សិទ្ធិ​មនុស្ស​អាដហុក បាន​សរសេរ​ថា នៅ​ក្នុង​ឆ្នាំ​២០១២ ករណី​ជម្លោះ​ដីធ្លី​មាន​ប្រមាណ​ជាង ៣០​ករណី។ ប្រជាពលរដ្ឋ​ចំនួន ៩២​នាក់ កំពុង​ជាប់​បណ្ដឹង​នៅ​តុលាការ ក្នុង​នោះ​មាន​ប្រជាពលរដ្ឋ​ចំនួន ១៨​នាក់ ត្រូវ​បាន​តុលាការ​ចាប់​ដាក់​គុក និង ៧៤​នាក់ កំពុង​ជាប់​បណ្ដឹង​ក្រោម​បទ​ចោទ​ការ​កាប់​បំផ្លាញ​ទ្រព្យ​សម្បត្តិ​សាធារណៈ ការ​ក្លែង​បន្លំ​ឯកសារ ការ​បង្ក​របួស​ស្នាម និង​បទ​ចោទ​មួយ​ចំនួន​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។