តំណាង​អង្គការ​ក្រៅ​រដ្ឋាភិបាល​គ្រោង​ចូល​រួម​កិច្ច​ប្រជុំ​នៅ​ហ្សឺណែវ

តំណាង​អង្គការ​មិន​មែន​រដ្ឋាភិបាល​នៅ​កម្ពុជា​ផ្នែក​សិទ្ធិ​មនុស្ស មាន​គម្រោង​ទៅ​ចូល​រួម​កិច្ច​ប្រជុំ​ប្រចាំ​ឆ្នាំ​មួយ​នៅ​ទីក្រុង​ហ្សឺណែវ ប្រទេស​ស្វ៊ីស នៅ​ដើម​ខែ​ឆ្នូ​ខាង​មុខ​នេះ ដែល​មាន​និយាយ​អំពី​ស្ថាន​ការណ៍​រំលោភ​សិទ្ធិ​មនុស្ស​នៅ​ក្នុង​ប្រទេស​កម្ពុជា​នា​ពេល​បច្ចុប្បន្ន​ផង​ដែរ។

0:00 / 0:00

សកម្មជន​សំខាន់ៗ​នៃ​អង្គការ​ក្រៅ​រដ្ឋាភិបាល​ដែល​ទៅ​ចូល​រួម​ក្នុង​កិច្ច​ប្រជុំ​នោះ​មាន​ដូច​ជា លោកស្រី ពុង ឈីវកេក ប្រធាន​អង្គការ​ការពារ​សិទ្ធិ​មនុស្ស​លីកាដូ និង​លោក ធន់ សារ៉ាយ ប្រធាន​អង្គការ​ការពារ​សិទ្ធិ​មនុស្ស​អាដហុក។

លោកស្រី ពុង ឈីវកេក ជា​ប្រធាន​អង្គការ​សិទ្ធិ​មនុស្ស​ក្រៅ​រដ្ឋាភិបាល ហៅ​កាត់​ថា​លីកាដូ បាន​មាន​ប្រសាសន៍​នៅ​មុន​ការ​ចេញ​ដំណើរ​នោះ​ថា លោកស្រី​មាន​បំណង​លើក​យក​បញ្ហា​មួយ​ចំនួន​ទៅ​លាត​ត្រដាង​នៅ​ក្នុង​កិច្ច​ប្រជុំ​ខាង​មុខ​នេះ។

លោកស្រី ពុង ឈីវកេក មាន​ប្រសាសន៍​ដូច្នេះ ៖ «រឿង​ដី​ធ្លី​នៅ​ក្នុង​ប្រទេស​កម្ពុជា រឿង​សេរីភាព​ក្នុង​ការ​បញ្ចេញ​មតិ សេរីភាព​ក្នុង​ការ​ប្ដឹង​គ្នា និង​សេរីភាព​ក្នុង​ការ​ទទួល​ព័ត៌មាន ទោះ​បី​សេរីភាព​ហ្នឹង​ជា​សេរីភាព​គ្រឹះ​ដែល​នៅ​ក្នុង​កតិកា​សញ្ញា​ស្ដី​ពី​សិទ្ធិ​ប្រជាពលរដ្ឋ​និង​សិទ្ធិ​នយោបាយ អ៊ីចឹង​ខ្ញុំ​ចង់​ឃើញ​ប្រទេស​កម្ពុជា​យើង​អនុវត្ត​កតិកា​សញ្ញា​ហ្នឹង​ឲ្យ​បាន​ច្បាស់​លាស់»

លោក យឹម សុវណ្ណ តំណាង​រាស្រ្ត​នៃ​គណបក្ស​សមរង្ស៊ី និង​ជា​មន្រ្តី​អ្នក​នាំ​ពាក្យ​ផង​ដែរ​នោះ បាន​មាន​ប្រសាសន៍​ថា លោក​ចង់​ឃើញ​តំណាង​គណបក្ស​សមរង្ស៊ី ត្រូវ​បាន​គេ​អញ្ជើញ​ចូល​រួម​នៅ​ក្នុង​កិច្ច​ប្រជុំ​នោះ​ផង​ដែរ។

លោក យឹម សុវណ្ណ បាន​ឲ្យ​ដឹង​ដូច្នេះ ៖ «ដើម្បី​ស្វែង​រក​ដំណោះ​ស្រាយ ធ្វើ​យ៉ាង​ម៉េច​កុំ​ឲ្យ​មុខ​មាត់​ប្រទេស​កម្ពុជា​ចុះ​អាប់​ឱន​ដោយសារ​តែ​ការ​រំលោភ​សិទ្ធិ​មនុស្ស ពីព្រោះ​ថា មាន​ការ​ជះ​ឥទ្ធិពល​ខ្លាំង​ណាស់​ទៅ​ដល់​វិស័យ​សេដ្ឋកិច្ច ក៏​ដូច​ជា​ការ​អភិវឌ្ឍ​សង្គម​និង​នយោបាយ​នៅ​ក្នុង​ប្រទេស»

នៅ​មិន​ទាន់​មាន​ការ​បញ្ជាក់​ណា​មួយ​នៅ​ទើ្បយ​ទេ​ថា តើ​រដ្ឋាភិបាល​កម្ពុជា​មាន​គម្រោងការ​បញ្ជូន​តំណាង​របស់​រដ្ឋាភិបាល ឬ​បញ្ជូន​លោក ឱម យ៉ិនទៀង ប្រធាន​នៃ​គណៈកម្មាធិការ​សិទ្ធិ​មនុស្ស​របស់​រដ្ឋាភិបាល​នោះ ទៅ​ចូល​រួម​នៅ​ក្នុង​កិច្ច​ប្រជុំ​នោះ​ដែរ​ឬ​យ៉ាង​ណា។

លោក ទិត សុធា ជា​មន្រ្តី​ទីប្រឹក្សា​របស់​រដ្ឋាភិបាល​កម្ពុជា និង​ជា​ក្រុម​ប្រតិកម្ម​ព័ត៌មាន​របស់​ទី​ស្តីការ​គណៈរដ្ឋមន្រ្តី​នៃ​ប្រទេស​កម្ពុជា បាន​មាន​ប្រសាសន៍​ថា ៖ «ខ្ញុំ​គ្រាន់​តែ​អាច​និយាយ​បាន​ថា ចំពោះ​ស្ថាន​ការណ៍​សិទ្ធិ​មនុស្ស​នៅ​កម្ពុជា គឺ​មាន​ភាព​ល្អ​ប្រសើរ ហើយ​ចំពោះ​ការ​រិះគន់​ណា​មួយ​ដែល​វាយ​តម្លៃ​អំពី​ស្ថាន​ការណ៍​សិទ្ធិ​មនុស្ស​នៅ​កម្ពុជា​ថា បាន​ធ្លាក់​ចុះ​នោះ គឺ​ជា​ការ​វាយ​តម្លៃ​មិន​ត្រឹមត្រូវ មិន​អាច​ទទួល​យក​បាន​នោះ​ទេ»

កិច្ច​ប្រជុំ​ប្រចាំ​ឆ្នាំ​របស់​ក្រុម​ប្រឹក្សា​សិទ្ធិ​មនុស្ស​នៃ​អង្គការ​សហ​ប្រជាជាតិ​នៅ​ក្នុង​ទីក្រុង​ហ្សឺណែវ ប្រទេស​ស្វ៊ីស នឹង​ប្រព្រឹត្ត​ទៅ​នៅ​ថៃ្ង​ទី​១ ខែ​ឆ្នូ ខាង​មុខ​នេះ រយៈពេល​មួយ​ថៃ្ង ដែល​នឹង​មាន​ប្រទេស​សំខាន់ៗ​ចំនួន​៤០ ជា​សមាជិក​នៃ​ក្រុមប្រឹក្សា​នេះ​ចូល​រួម។

ការ​ប្រជុំ​ដើម្បី​សើរើ​ពិនិត្យ​មើល​អំពី​ស្ថាន​ការណ៍​គោរព​សិទ្ធិ​មនុស្ស​នា​ពេល​ខាង​មុខ​នេះ គឺ​ស្រប​ពេល​ដែល​មជ្ឈដ្ឋាន​នានា មាន​ដូច​ជា​សង្គម​ស៊ីវិល​និង​អង្គការ​អន្តរជាតិ​នានា បាន​រិះគន់​កន្លង​មក​អំពី​ការ​រំលោភ​ដីធ្លី ការ​ប្រើ​អំពើ​ហិង្សា​បង្រ្កាប ការ​រឹត​បន្តឹង​សេរីភាព​បញ្ចេញ​មតិ និង​ការ​ប្តឹង​ដក​ហូត​អភ័យ​ឯក​សិទ្ធិ​សកម្មជន​រិះគន់​រដ្ឋាភិបាល និង​តំណាង​រាស្រ្ត​គណបក្ស​ប្រឆាំង មាន​ដូចជា​លោក សម រង្ស៊ី លោក ហូ វ៉ាន់ និង​លោកស្រី មូរ សុខហួរ ជាដើម នៅ​ក្នុង​ឆ្នាំ​២០០៩​នេះ៕