លោក យឹម សុវណ្ណ មន្ត្រីនាំពាក្យគណបក្សសមរង្ស៊ី បានផ្ដល់បទសម្ភាសន៍ឲ្យអ្នកយកព័ត៌មានវិទ្យុអាស៊ីសេរីដឹង នៅថ្ងៃទី២០ ខែមីនា ថាគ្មានហេតុផលណាមួយដែលគណបក្សប្រឆាំង ដាក់សំណើសុំផ្លាស់ប្ដូរបេក្ខភាពតំណាងរាស្ត្រថ្មី ជំនួសលោក សម រង្ស៊ី ប្រធានគណបក្សនោះទេ បើទោះបីរដ្ឋសភាបានបញ្ចប់បុព្វសិទ្ធិ និងសិទ្ធិជាតំណាងរាស្ត្ររបស់លោក នៅមណ្ឌលកំពង់ចាមរួចហើយក៏ដោយ។
លោក យឹម សុវណ្ណ បានចាត់ទុកការប្រើប្រព័ន្ធតុលាការផ្ដន្ទាទោសលោក សម រង្ស៊ី ឲ្យមានទោសជាប់ពន្ធនាគារសរុបចំនួន ១២ឆ្នាំ កើតពីការជួយកសិករកុំឲ្យបាត់បង់ដីស្រែ និងការពារទឹកដីកុំឲ្យបរទេសឈ្លានពាន គឺបក្សកាន់អំណាចមានចេតនារុញច្រានលោក សម រង្ស៊ី មិនឲ្យចូលប្រឡូកក្នុងឆាកនយោបាយនៅកម្ពុជា ៖ «ជាការប៉ុនប៉ងផ្នែកនយោបាយដើម្បីមិនឲ្យលោកប្រធានចូលរួមការបោះឆ្នោតខាងមុខ។ លោកប្រធាន សម រង្ស៊ី ជាអ្នកមានសេចក្ដីក្លាហាន ហ៊ានចេញមុខការពារទឹកដីកុំឲ្យបរទេសឈ្លានពាន។ ការពារយុត្តិធម៌ជូនប្រជាពលរដ្ឋ ការពារដីធ្លីជូនប្រជាពលរដ្ឋ ដូច្នេះលោកត្រូវបានចាត់ទុកជាវីរជន។ ដូច្នេះបើគ្មានកំហុសឆ្គងពីបទព្រហ្មទណ្ឌទេ គឺគ្មាននរណាម្នាក់អាចឲ្យលោកប្រធានឈប់ពីតំណាងរាស្ត្រទេ។ ដូច្នេះដាច់ខាតគឺយើងមិនដាក់បេក្ខជនជាដាចខាត»។
ការដកសិទ្ធិនេះ អាចនាំឲ្យលោក សម រង្ស៊ី មិនមានសិទ្ធិឈរឈ្មោះបោះឆ្នោតតំណាងរាស្ត្រសម្រាប់អាណត្តិថ្មីខាងមុខនេះបានទេ។
ទាក់ទងបញ្ហានេះ លោក អ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប. បានឲ្យដឹងថា រហូតដល់ថ្ងៃទី២០ ខែមីនា គ.ជ.ប. លោក មិនទាន់បានទទួលសំណើពីគណបក្សប្រឆាំង ស្នើឲ្យដាក់បេក្ខភាពថ្មី ជំនួសកៅអីតំណាងរាស្ត្រមណ្ឌលកំពង់ចាម ជំនួសតំណែងលោក សម រង្ស៊ី នៅឡើយទេ បន្ទាប់ពីរដ្ឋសភាបញ្ចប់មុខតំណែងរួមមក ៖ «នៅតាមច្បាប់បោះឆ្នោតកន្លងមក កាលណាសមាជិកណាមួយចេញដោយស្លាប់ ដោយមានធុរៈ ដោយមានស្អីផ្សេងៗ គឺគណបក្សគេស្នើអ្នកជំនួសក្រោយ។ យើងអត់ឃើញនៅឡើយទេ»។
មន្ត្រី គ.ជ.ប. បានឲ្យដឹងថា ប្រព័ន្ធបោះឆ្នោតប្រទេសកម្ពុជាបានផ្ដល់សិទ្ធិសម្រេចទៅឲ្យគណបក្សសំខាន់ជាងបេក្ខភាពតំណាងរាស្ត្រ។ ដូច្នេះរាល់ការសម្រេចផ្លាស់ប្ដូរសមាជិកសភា ឬដកបេក្ខភាពតំណាងរាស្ត្រណាម្នាក់ គឺគណបក្សជាអ្នកមានសិទ្ធិសម្រេច។
យ៉ាងណាក៏ដោយ លោក សម រង្ស៊ី ប្រធានគណបក្សប្រឆាំងបានប្រកាសប្រាប់បណ្ដាញផ្សព្វផ្សាយដឹងថា មន្ត្រីគណបក្សលោក នឹងមិនស្នើបេក្ខភាពថ្មីជំនួសកៅអីរបស់លោកនៅមណ្ឌលកំពង់ចាមនោះទេ។ ហើយថា រូបលោកនៅតែចាត់ទុកខ្លួនឯង នៅមានតួនាទីជាអ្នកតំណាងរាស្ត្រដដែល។ លោក សម រង្ស៊ី បានថ្លែងពីប្រទេសបារាំង ដោយចាត់ទុកការដកហូតតួនាទីតំណាងរាស្ត្ររបស់លោកផ្ដើមដោយរដ្ឋសភាកម្ពុជា ថាជារឿងខុសច្បាប់។
ទោះជាបែបនេះក្តី លោក អ៊ឹម សួស្តី ថ្លែងថា ការណ៍ដែលលោក សម រង្ស៊ី បានវិលចូលប្រឡូកក្នុងឆាកនយោបាយ ឬបែបណានោះ មិនមែនជាសមត្ថកិច្ចរបស់ គ.ជ.ប. ទេ គឺជាសមត្ថកិច្ចរបស់ក្រសួងមហាផ្ទៃ ដែលជាអ្នកអនុវត្តច្បាប់ស្តីពីគណបក្សនយោបាយឯណោះទេ។
វិទ្យុអាស៊ីសេរីមិនអាចទាក់ទងលោក ខៀវ សុភ័គ មន្ត្រីនាំពាក្យក្រសួងមហាផ្ទៃ ដើម្បីបំភ្លឺជុំវិញសំណុំរឿងលោក សម រង្ស៊ី បានទេ តាមទូរស័ព្ទ ថ្ងៃទី២០ ខែមីនានេះ។
លោក សម រង្ស៊ី មេគណបក្សសមរង្ស៊ី ត្រូវបានលោក ហេង សំរិន ប្រធានរដ្ឋសភា ចេញសេចក្ដីប្រកាសកាលពីថ្ងៃទី១៥ ខែមីនា លុបឈ្មោះចេញពីបុព្វសិទ្ធិសមាជិកសភាមណ្ឌលកំពង់ចាម អាណត្តិទី៤ បន្ទាប់ពីសាលដីការបស់តុលាការកំពូល បានចូលជាស្ថាពរ កាលពីថ្ងៃទី១ ខែមីនា ឆ្នាំ២០១១ លើសំណុំរឿងដកបំផ្លាញតម្រុយបង្គោលព្រំដែនកម្ពុជា-វៀតណាម លេខ១៨៥ នៅភូមិកោះក្បានកណ្ដាល ស្រុកចន្ទ្រា ខេត្តស្វាយរៀង កាលពីចុងឆ្នាំ២០០៩។
លោក សម រង្ស៊ី ដែលកំពុងនិទ្ទេសខ្លួននៅក្រៅប្រទេស ក៏កំពុងជាប់ប្ដឹងមួយករណីទៀត ដែលរដ្ឋាភិបាលប្ដឹងចោទពីបទក្លែងឯកសារសាធារណៈ ក្លែងផែនទី ដែលត្រូវសាលាដំបូងកាត់ក្ដីកំបាំងមុខផ្ដន្ទាទោសដាក់គុករយៈពេល ១០ឆ្នាំ និងពិន័យប្រាក់ចំនួន ១០០លានរៀន។ ដូច្នេះសំណុំរឿងចោទប្រកាន់ទាំងពីរករណីនេះ លោក សម រង្ស៊ី ត្រូវបានតុលាការផ្ដន្ទាទោសឲ្យជាប់ពន្ធនាគារសរុបចំនួន ១២ឆ្នាំ។
ទោះជាបែបនេះក្ដី សាធារណជន និងសង្គមស៊ីវិលមួយចំនួននៅកម្ពុជា បានបញ្ចេញទស្សនៈថា សង្គមមួយដែលប្រកាន់យកការដឹកនាំតាមបែបលទ្ធិប្រជាធិបតេយ្យ មិនគួររុញច្រានឲ្យមេដឹកនាំបក្សប្រឆាំង មិនឲ្យមានសិទ្ធិបានចូលរួមប្រឡូកក្នុងឆាកនយោបាយ ក៏បានឈរឈ្មោះចូលរួមការបោះឆ្នោត ដោយស្មើភាពជាមួយគណបក្សកំពុងកាន់អំណាចនោះទេ៕