សវនាការបឋមរយៈពេល ៤ ថ្ងៃ របស់សាលាក្ដីខ្មែរក្រហមអំពីអង្គច្បាប់ក្នុងសំណុំរឿងលេខ ០០២ បានបញ្ចប់នៅព្រឹកថ្ងៃទី ៣០ មិថុនា ឆ្នាំ ២០១១។ មុននឹងបញ្ចប់សវនាការនេះ ជនជាប់ចោទ នួន ជា និង ខៀវ សំផន បានព្យាយាមលើកឡើងនូវសំណើ និងបញ្ហាមួយចំនួនដល់អង្គសវនាការ។
នៅក្នុងកិច្ចពិភាក្សាចុងក្រោយ ដើម្បីត្រៀមសម្រាប់បំភ្លឺក្នុងដំណើរការជម្រះក្ដីនៅពេលខាងមុខនោះ មេធាវីការពារក្ដីឱ្យជនជាប់ចោទ នួន ជា គឺលោក វីកទ័រ កូប៉េ (Victor Koppe) បានជម្រាបជូនអង្គសវនាការបឋមថា ទាក់ទងនឹងរឿងរ៉ាវឧក្រិដ្ឋកម្មខ្មែរក្រហម កូនក្ដីរបស់លោក គឺ នួន ជា ស្នើសុំទៅចៅក្រមស៊ើបអង្កេតឱ្យស៊ើបឱ្យបានច្បាស់លើតួនាទីរបស់ប្រទេសវៀតណាម ទាំងនៅសម័យមុន និងទាំងក្នុងអំឡុងរបបកម្ពុជាប្រជាធិបតេយ្យផង។ គឺមិនមែនស៊ើបត្រឹមតែក្នុងអំឡុងឆ្នាំ ១៩៧៥ ដល់ ១៩៧៩ ប៉ុណ្ណោះទេ។
មេធាវីការពារបានឱ្យដឹងទៀតថា ជនជាប់ចោទ នួន ជា បានលើកឡើងថា វាជាការចាំបាច់ ដែលត្រូវស៊ើបអង្កេតអំពីរឿងតួនាទីនយោបាយវៀតណាមនេះ។ តាមរយៈអ្នកបកប្រែភាសានៅក្នុងសវនាការ លោក វីកទ័រ កូប៉េ លោកលើសំអាងហេតុផលពីនយោបាយពាក់ព័ន្ធនឹងវៀតណាមនោះដូច្នេះ ៖ «ព្រោះថា សេចក្ដីសម្រេចនៅក្នុងរបបកម្ពុជាប្រជាធិបតេយ្យជាច្រើន ធ្វើឡើងដោយសារតែគោលនយោបាយរបស់ប្រទេសវៀតណាម»។
លោកមេធាវី វីកទ័រ កូប៉េ បន្តថា នួន ជា កូនក្ដីរបស់លោក ក៏បានលើកហេតុផលដែរថា ផលវិបាកពីការទម្លាក់គ្រាប់បែករបស់អាមេរិក ក៏ត្រូវតែមានការស៊ើបអង្កេតដែរ ដើម្បីឱ្យដឹងច្បាស់ថា តើមានវិបត្តិស្បៀងអាហារឬទេនៅមុនឆ្នាំ ១៩៧៥។ ប្រសិនបើមានមែន តើមានផលប៉ះពាល់អ្វីខ្លះដល់ប្រជាជនកម្ពុជានៅពេលនោះ? តើរដ្ឋាភិបាលកម្ពុជាប្រជាធិបតេយ្យមានលទ្ធភាពដោះស្រាយបញ្ហានេះបានទេ?
មេធាវីជនជាប់ចោទ នួន ជា លើកឡើងទៀតថា វាជាការចាំបាច់ណាស់ដែរ ដែលត្រូវស៊ើបអង្កេតមេបញ្ជាការយោធាខ្មែរក្រហម នៅភូមិភាគបូព៌ា ដែលខាងគណៈមជ្ឈិមគ្មានតួនាទីអនុវត្តអំណាចរបស់ខ្លួនបាន។
ទាក់ទងទៅនឹងឧក្រិដ្ឋកម្មនៅគុកទួលស្លែង ជនជាប់ចោទ នួន ជា ថា ឌុច មិនបាននិយាយការពិតទេ ចំពោះតួនាទីរបស់គាត់ នៅក្នុងរឿងភាពសាហាវព្រៃផ្សៃ នៅមន្ទីរ ស២១ ឬគុកទួលស្លែងនោះ។ នួន ជា សុំឱ្យមានការស៊ើបអង្កេតឱ្យបានម៉ត់ចត់លើសេចក្ដីថ្លែងការរបស់ ឌុច ។
នៅក្នុងរយៈពេលចុងក្រោយ ដែលទាក់ទងនឹងបញ្ជីឈ្មោះសាក្សី អ្នកជំនាញ និងដើមបណ្ដឹងរដ្ឋប្បវេណី ជនជាប់ចោទ ខៀវ សំផន ក៏បានតវ៉ាដល់អង្គសវនាការដែរថា នៅក្នុងបញ្ជីឈ្មោះសាក្សីរបស់សាលាក្ដីមិនមានឃើញមានឈ្មោះសាក្សីរបស់គាត់ទេ គឺភាគច្រើនបំផុត សុទ្ធតែសាក្សីរបស់ព្រះរាជអាជ្ញា ដែលជាអ្នកត្រូវឆ្លើយដាក់បន្ទុកលើរូបគាត់ប៉ុណ្ណោះ។
លោក ខៀវ សំផន ថ្លែងថា លោកបាត់សាក្សីរបស់លោកដែលបានស្នើសុំកន្លងមក៖ «មានឈ្មោះសាក្សីខ្លះរបស់គាត់ បែរទៅជាសាក្សីរបស់ព្រះរាជអាជ្ញាសម្រាប់ចោទប្រកាន់ទៅវិញ»។
ជនជាប់ចោទ ខៀវ សំផន បន្តថា ដើម្បីឱ្យការពិត ភាពស្មោះត្រង់ និងត្រឹមត្រូវរបស់លោកលេចឡើង លុះត្រាតែតុលាការ យល់ស្រប និងសុខចិត្តស្ដាប់សាក្សីសំខាន់ៗ របស់គាត់ ព្រោះសាក្សីទាំងនោះស្គាល់ច្បាស់។ ជនជាប់ចោទ ខៀវ សំផន សន្យាថា គាត់នឹងដាក់បញ្ជីឈ្មោះជាលាយលក្ខណ៍អក្សរម្ដងទៀត៕