អង្គរក្ស​ចម ប្រសិទ្ធ​រង​ការ​ចោទ​ថា​ប្រើ​អំពើ​ហិង្សា

អង្គរក្ស​៦​នាក់​ដែល​ជា​អ្នក​ការពារ​លោក​រដ្ឋមន្រ្តី​ក្រសួង​ពាណិជ្ជកម្ម ចម ប្រសិទ្ធ រង​ការ​ចោទ​ថា បាន​ប្រើ​អំពើ​ហិង្សា​វាយ​បុរស​ម្នាក់​ឲ្យ​សន្លប់ និង​មនុស្ស​២​នាក់​ឲ្យ​រង​របួស​ធ្ងន់។

0:00 / 0:00

ស្ត្រី​ម្នាក់​នៅ​ភូមិ​ចាក់ជ្រូក សង្កាត់​សំរោង​ក្រោម ខណ្ឌ​ដង្កោ រាជធានី​ភ្នំពេញ បាន​ថ្លែង​ឲ្យ​ដឹង​នៅ​ថ្ងៃ​ទី​៨ តុលា ដោយ​បាន​ចោទ​ប្រកាន់​ក្រុម​អង្គរក្ស​លោក ចម ប្រសិទ្ធ ជា​ទេសរដ្ឋមន្ត្រី រដ្ឋមន្រ្តី​ក្រសួង​ពាណិជ្ជកម្ម មាន​គ្នា​ចំនួន​៦​នាក់ បាន​វាយ​កូន​គាត់​សន្លប់​ម្នាក់ របួស​ធ្ងន់​ពីរ​នាក់ ប៉ុន្តែ​ខាង​អាជ្ញាធរ​មិន​បាន​ដោះស្រាយ​ជូន​ទេ​ពី​បញ្ហា​នេះ។

អ្នកស្រី កង ស៊ីខេម ដែល​ជា​ម្តាយ​ជន​រងគ្រោះ​បាន​ឲ្យ​ដឹង​ថា អ្នក​ភូមិ​ចំនួន​៦២​គ្រួសារ ដែល​ជា​សាក្សី​នៅ​កន្លែង​កើត​ហេតុ បាន​ផ្តិត​មេដៃ​ភ្ជាប់​ជាមួយ​ពាក្យ​បណ្តឹង ដាក់​ទៅ​ប្រធាន​ប៉ុស្តិ៍​នគរបាល​សង្កាត់​សំរោង​ក្រោម និង​ដាក់​ជូន​ទៅ​ចៅសង្កាត់​ផង​ដែរ ប៉ុន្តែ​គេ​មិន​ដោះស្រាយ​ឲ្យ​នោះ​ទេ។

អ្នកស្រី កង ស៊ីខេម បាន​ឲ្យ​ដឹង​ដូច្នេះ ៖ «គ្នា​វា​ច្រើន កាន់​កាំភ្លើង​គ្រប់​ដៃ វា​បាញ់​ចម្រុះ​ឡើង​លើ​ទៅ កូន​ខ្ញុំ​រើស​បាន​ពីរ​គ្រាប់​សំបក​គ្រាប់​កាំភ្លើង។ បាញ់​សន្ធាប់​ទៅ​បាន​ប្រជាជន កូនៗ​ខ្ញុំ​សន្លប់​នៅ​លើ​ដី កូន​ស្រី​ខ្ញុំ​ទ្រហោ​យំ​ឱប​បង​ស្រែក​ទៅ បាន​អ្នក​ភូមិ​គេ​ទៅ​ជួយ​យក។ ដាក់​ពាក្យ​ទៅ​សង្កាត់ ទៅ​ប៉ុស្តិ៍​អី​អ៊ីចឹង​ទៅ។ ម្នាក់ៗ​គេ​ប្រាប់​ថា កុំ​យក​ពងមាន់​ជល់​នឹង​ថ្ម ខ្លាច​គេ យើង​ក្រ​ណាស់ យើង​អត់​ណាស់»

កាល​ពី​ថ្ងៃ​អាទិត្យ ទី​៤ តុលា មាន​កម្មករ​រោងចក្រ​បាន​ឈ្លោះ​គ្នា​ក្បែរ​ផ្ទះ​លោក ចម ប្រសិទ្ធ ដែល​នៅ​ជិត​ផ្ទះ​អ្នកស្រី​ដែរ ពេល​នោះ​កូន​ប្រុស​របស់​អ្នកស្រី និង​កូន​ស្រី​ម្នាក់​ទៀត បាន​នាំ​គ្នា​ទៅ​មើល​គេ​ឈ្លោះ​គ្នា ប៉ុន្តែ​ពេល​ត្រឡប់​មក​ផ្ទះ​វិញ​បែរ​ជា​មាន​ក្រុម​អង្គរក្ស​បាន​មក​ប្រើ​អំពើ​ហិង្សា​មក​លើ​កូន​អ្នកស្រី ដែល​មាន​អាយុ​១៨​ឆ្នាំ និង​អាយុ​ជាង​២០​ឆ្នាំ​សន្លប់​ភ្លាមៗ ជាមួយ​គ្នា​នោះ​ក្មួយ​ស្រី​ម្នាក់​ទៀត មាន​អាយុ​ជាង​៣០​ឆ្នាំ​មក​ឃាត់ គេ​វាយ​ទាំង​ក្មួយ​ស្រី​នោះ​ទៀត។

ចៅ​សង្កាត់​សំរោង​ក្រោម ទូច ភឿន មិន​បាន​ធ្វើ​ការ​អត្ថាធិប្បាយ​អំពី​បញ្ហា​នេះ​ទេ ដោយ​លោក​ឲ្យ​សួរ​ទៅ​លោក​ប្រធាន​ប៉ុស្តិ៍​នគរបាល​វិញ។

ប្រធាន​ប៉ុស្តិ៍​នគរបាល​សង្កាត់​សំរោង​ក្រោម លោក អ៊ឹម កាក់ ក៏​មិន​បាន​បំភ្លឺ​ជុំវិញ​នឹង​ករណី​នេះ​ដែរ ដោយ​លោក​ឆ្លើយ​ថា លោក​មាន​តួនាទី​តួចតាច​មិន​ហ៊ាន​និយាយ​នោះ​ទេ ឲ្យ​សួរ​ទៅ​ថ្នាក់​លើ។

វិទ្យុ​អាស៊ី​សេរី​មិន​អាច​ទាក់​ទង​ក្រុម​អង្គរក្ស​លោក ចម ប្រសិទ្ធ ដែល​បាន​ត្រូវ​អ្នក​ភូមិ​ចោទ​ថា បាន​ប្រព្រឹត្ត​អំពើ​ហិង្សា​នោះ​បាន​ទេ នៅ​ថ្ងៃ​ទី​៨ តុលា។

អនុ​ប្រធាន​ភូមិ​ចាក់​ជ្រូក សុំ​មិន​បញ្ចេញ​ឈ្មោះ​មាន​ប្រសាសន៍​ថា នៅ​ថ្ងៃ​កើត​ហេតុ​នោះ លោក ក៏​ដូច​ជា​អ្នក​ភូមិ​ដទៃ​ទៀត ភាគច្រើន​បាន​ឃើញ​ក្រុម​អង្គរក្ស​លោក ចម ប្រសិទ្ធ បាន​ប្រើ​អំពើ​ហិង្សា​ទៅ​លើ​កូន​និង​ក្មួយ​អ្នកស្រី កង ស៊ីខេម នៅ​វេលា​ម៉ោង​ប្រមាណ​៦​ល្ងាច ថ្ងៃ​ទី​៤ តុលា នោះ ៖ «វ៉ៃ​ហើយ​បាញ់​ទៀត ពលរដ្ឋ​ផ្អើល​មក​មើល ធម្មតា​ថ្ងៃ​ហ្នុង​ថ្ងៃ​អាទិត្យ​ផង ហើយ​កម្មករ​ច្រើន ប្រជាជន​ខ្ញុំ​ក៏​ច្រើន​ដែរ​មក​មើល។ ពួក​អង្គរក្ស​ស្រែក​ដេញ​ថា​ចោរៗ»

អ្នកស្រី កង ស៊ីខេម បាន​ឲ្យ​ដឹង​ថា អ្នកស្រី​មិន​ចង់​បាន​អ្វី​នោះ​ទេ សុំ​ឲ្យ​អាជ្ញាធរ​រក​ខុស​ត្រូវ​តាម​ផ្លូវ​ច្បាប់ និង​ចេញ​ថ្លៃ​ព្យាបាល​កូន​អ្នកស្រី​ដែល​រង​របួស​ធ្ងន់​តែប៉ុណ្ណោះ។

មន្ត្រី​ស៊ើប​អង្កេត​សមាគម​សិទ្ធិ​មនុស្ស​អាដហុក លោក ចាន់ សុវ៉េត បាន​ឲ្យ​ដឹង​ថា អាជ្ញាធរ​គួរ​បញ្ជូន​សំណុំ​រឿង​មក​ថ្នាក់​លើ ដើម្បី​ចាត់ការ​តាម​ផ្លូវ​ច្បាប់។ លោក​ក៏​បាន​ចាត់​ទុក​ទង្វើ​នេះ​ថា ជា​អំពើ​រំលោភ​ទៅ​លើ​សិទ្ធិ​មនុស្ស​និង​ច្បាប់ អ្នក​ដែល​ប្រព្រឹត្ត​ទង្វើ​នេះ ទោះ​បី​ជា​មាន​ឋានៈ​ជា​អ្វី​ក៏ដោយ ត្រូវ​តែ​ទទួល​ទោស​ព្រហ្មទណ្ឌ៕