ការប្រកាន់ជំហរនេះ គឺជាការឆ្លើយតបទៅនឹងការព្រមានបណ្ដេញលោក គ្រីស្តូហ្វ ប៉េស៊ូ (Christophe Peschoux) ចេញពីប្រទេសកម្ពុជា ពីសំណាក់ក្រសួងការបរទេសកម្ពុជា ប្រសិនបើលោក គ្រីស្តូហ្វ ប៉េស៊ូ នៅបន្តជ្រៀតជ្រែកចូលកិច្ចការផ្ទៃក្នុងរបស់កម្ពុជា។
លោក គ្រីស្តូហ្វ ប៉េស៊ូ បន្តថា លោកនឹងឆ្លើយតបជាលាយលក្ខណ៍អក្សរទៅនឹងលិខិតរបស់លោករដ្ឋមន្ត្រីក្រសួងការបរទេស ហោ ណាំហុង ចុះថ្ងៃទី៨ ខែកក្កដា ព្រមានថា ការធ្វើអត្ថាធិប្បាយរបស់លោកពីការចាប់បញ្ជូនជនសង្ស័យថៃ ទាំងពីរនាក់ ជាការជ្រៀតជ្រែកចូលអធិបតេយ្យភាពរបស់កម្ពុជា។ លោកថា លិខិតរបស់លោកមានគោលដៅដើម្បីបំភ្លឺបន្ថែមអំពីការវិភាគច្បាប់របស់លោក ដែលឈរលើមូលដ្ឋានបទដ្ឋានសិទ្ធិមនុស្សអន្តរជាតិ ដែលប្រទេសកម្ពុជា មានកាតព្វកិច្ចត្រូវគោរពតាម។
លោក គ្រីស្តូហ្វ ប៉េស៊ូ ក៏បង្ហាញជំហរដើម្បីសហការជាមួយរដ្ឋាភិបាល ដើម្បីពង្រឹងក្របខ័ណ្ឌច្បាប់ ទាក់ទងនឹងការនិរទេសជនបរទេសចេញពីប្រទេសកម្ពុជា។
អ្នកនាំពាក្យរបស់ក្រសួងការបរទេសកម្ពុជា លោក កុយ គួង មានប្រសាសន៍នៅថ្ងៃសៅរ៍ ទី១០ កក្កដា ថា លោកមិនទាន់បានទទួលលិខិតលោក គ្រីស្តូហ្វ ប៉េស៊ូ នៅឡើយទេ ប៉ុន្តែការធ្វើអត្ថាធិប្បាយរបស់លោក គ្រីស្តូហ្វ ប៉េស៊ូ ជាការជ្រៀតជ្រែកចូលកិច្ចការផ្ទៃក្នុងកម្ពុជា៕