ទស្សនៈ​ជុំវិញ​ការ​បាត់បង់​សិទ្ធិ​ជា​អ្នក​តំណាងរាស្ត្រ​របស់​លោក សម រង្ស៊ី

សង្គម​ស៊ីវិល និង​ពលរដ្ឋ​មួយ​ចំនួន​នៅ​កម្ពុជា បាន​ចាត់​ទុក​ការ​បាត់បង់​បុព្វសិទ្ធិ និង​សិទ្ធិ​ឈរ​ឈ្មោះ​ជា​តំណាងរាស្ត្រ​​របស់​លោក សម រង្ស៊ី មេ​បក្ស​ប្រឆាំង​នៅ​កម្ពុជា​ថា បាន​បង្ហាញ​ឲ្យ​ឃើញ​ពី​ការ​ភ័យ​ខ្លាច​របស់​គណបក្ស​ប្រជាជន​កម្ពុជា ចំពោះ​ប្រជាប្រិយភាព​លោក សម រង្ស៊ី និង​ចាត់​ទុក​ថា ការ​លុប​ឈ្មោះ​នោះ​ជា​ការ​ថយ​ក្រោយ​នៃ​ដំណើរការ​លទ្ធិប្រជាធិបតេយ្យ​នៅ​កម្ពុជា។

0:00 / 0:00

លោក សម រង្ស៊ី ប្រធាន​គណបក្ស សម រង្ស៊ី ត្រូវ​បាន​រដ្ឋ​សភា​ប្រទេស​កម្ពុជា កាល​ពី​ថ្ងៃ​ទី​១៥ ខែ​មីនា ឆ្នាំ​២០១១ សម្រេច​ដក​បុព្វសិទ្ធិ និង​សិទ្ធិ​ជា​សមាជិក​តំណាងរាស្ត្រ​មណ្ឌល​កំពង់ចាម អាណត្តិ​ទី​៤ ឬ​និយាយ​ភាសា​សាមញ្ញ​ថា លុប​ឈ្មោះ​ចេញ​ពី​សមាជិក​សភា​កម្ពុជា។ ការ​លុប​ឈ្មោះ​នេះ អាច​ធ្វើ​ឲ្យ​ប្រធាន​គណបក្ស​ប្រឆាំង​មិន​មាន​សិទ្ធិ​ឈរ​ឈ្មោះ​ឲ្យ​គេ​បោះ​ឆ្នោត​ឲ្យ​សម្រាប់​អាណត្តិ​ថ្មី​ទៀត​ផង។

សាធារណជន​មួយ​ចំនួន​បាន​បញ្ចេញ​​ទស្សនៈ​​​​ថា សង្គម​មួយ​ដែល​ប្រកាន់​យក​ការ​ដឹក​នាំ​តាម​បែប​លទ្ធិប្រជាធិបតេយ្យ មិន​គួរ​រុញ​ច្រាន​ឲ្យ​មេដឹកនាំ​បក្ស​ប្រឆាំង​​មិន​ឲ្យ​មាន​សិទ្ធិ​ចូល​រួម​ប្រឡូក​ក្នុង​ឆាក​នយោបាយ ក៏​ដូចជា​ឈរ​ឈ្មោះ​ចូល​រួម​ការ​បោះឆ្នោត​នោះ​ទេ។

បុរស​ឈ្មោះ ដន ឫទ្ធី ជា​កសិករ​នៅ​ខេត្ត​ព្រៃវែង បាន​ថ្លែង​ថា លោក​ចង់​ឃើញ​លោក សម រង្ស៊ី មេ​បក្ស​​​​ប្រឆាំង​ដ៏​ធំ​នៅ​កម្ពុជា មាន​វត្តមាន​ចូល​រួម​ការ​បោះ​ឆ្នោត​ឃុំ-​សង្កាត់ និង​សកល​នា​ឆ្នាំ​២០១២ និង​​២០១៣ ខាង​មុខ​ដោយ​យុត្តិធម៌ និង​ស្មើ​ភាព​ជាមួយ​គណបក្ស​ប្រជាជន​កម្ពុជា កំពុង​កាន់​អំណាច។

ប្រភព​​​បាន​ឲ្យ​ដឹង​ថា ប្រទេស​កម្ពុជា ដែល​ថ្នាក់​ដឹកនាំ​អះអាង​ថា បាន​ប្រកាន់​យក​ការ​ដឹកនាំ​តាម​បែប​ប្រជាធិបតេយ្យ មិន​គួរ​បង្កើត​ព្រឹត្តិការណ៍​នយោបាយ​បង្ខំ​ឲ្យ​មេ​បក្ស​ប្រឆាំង​គ្មាន​សិទ្ធិ​​ចូល​រួម​ប្រកួត​ការ​បោះ​ឆ្នោត​​នោះ​ទេ។

លោក កែវ ថៃ គ្រូ​បង្រៀន​នៅ​អនុវិទ្យាល័យ ហ៊ុន សែន បរិបូរណ៍ ខេត្ត​កំពង់ឆ្នាំង បាន​ឲ្យ​ដឹង​ដែរ​ថា ការ​រុញ​ច្រាន​លោក សម រង្ស៊ី មិន​​​ឲ្យ​មាន​សិទ្ធិ​ឈរ​ឈ្មោះ ឬ​ក៏​ចូល​ប្រកួត​ប្រជែង​ការ​បោះឆ្នោត​នា​ឆ្នាំ​២០១២ និង​ឆ្នាំ​២០១៣ ខាង​មុខ​នេះ មិន​មែន​ជា​រឿង​ចៃដន្យ​នោះ​ទេ វា​ជា​រឿង​នយោបាយ​ពិតៗ។

ពលរដ្ឋ​មិន​បញ្ចេញ​ឈ្មោះ​ម្នាក់​មក​ពី​ខេត្ត​កំពង់ធំ បាន​បញ្ចេញ​ទស្សនៈ​ថា មាន​ប្រជាពលរដ្ឋ​ភាគ​ច្រើន​​នៅ​កម្ពុជា កំពុង​មាន​ការ​គាំទ្រ​លោក សម រង្ស៊ី ប្រធាន​គណបក្ស​ប្រឆាំង ដូច្នេះ​លោក​ថា ចង់ ឬ​មិន​ចង់ គណបក្ស​ប្រជាជន​កម្ពុជា កំពុង​កាន់​អំណាច​ត្រូវ​តែ​រិះ​រក​គ្រប់​យុទ្ធវិធី ដើម្បី​កម្ចាត់​លោក សម រង្ស៊ី មិន​ឲ្យ​មាន​ឈ្មោះ​ចូល​រួម​ប្រកួត​ការ​បោះឆ្នោត​បាន​ទេ ព្រោះ​មេ​បក្ស​ជំទាស់​រូប​នេះ​ហ៊ាន​ចេញ​មុខ និង​ធ្វើ​សកម្មភាព​ជួយ​ដល់​កសិករ​បាត់បង់​ដី​ស្រែ​ជាដើម។

ចំណែក​លោក រ៉ុង ឈុន ប្រធាន​សមាគម​គ្រូបង្រៀន​កម្ពុជា​ឯករាជ្យ បាន​សម្ដែង​ការ​ខក​ចិត្ត​ចំពោះ​រដ្ឋ​សភា​ដែល​បាន​ដក​សិទ្ធិ​លោក សម រង្ស៊ី មិន​ឲ្យ​មាន​ឈ្មោះ​ជា​តំណាងរាស្ត្រ ឬ​ក៏​អាច​វិល​ចូល​ស្រុក​ដើម្បី​ចូល​រួម​ប្រកួត​ការ​បោះឆ្នោត​នា​ឆ្នាំ​២០១២-​២០១៣ ខាង​មុខ​​បាន។ លោក​បាន​ចាត់​ទុក​ករណី​លោក សម រង្ស៊ី ជា​រឿង​នយោបាយ ហើយ​ថា ការ​បោះឆ្នោត​ដែល​មិន​មាន​វត្តមាន​មេ​បក្ស​ប្រឆាំង​ចូល​រួម​​ប្រកួតប្រជែង គឺ​ការ​បោះ​ឆ្នោត​នោះ​មិន​មាន​យុត្តិធម៌ និង​តម្លាភាព​នោះ​ទេ។

ទាក់ទង​បញ្ហា​នេះ លោក សម រង្ស៊ី បាន​ចាត់​ទុក​ការ​បញ្ឈប់​បុព្វសិទ្ធិ និង​ការ​ដក​សិទ្ធិ​ជា​អ្នក​តំណាងរាស្ត្រ​ របស់​លោក ផ្ដើម​ដោយ​រដ្ឋ​សភា​​កម្ពុជា កាល​ពី​ថ្ងៃ​ទី​១៥ ខែ​មីនា​ថា ជា​ទង្វើ​ផ្ទុយ​ពី​លទ្ធិប្រជាធិបតេយ្យ និង​បង្ហាញ​ឲ្យ​ឃើញ​អ្នក​ដឹកនាំ​ប្រទេស​បច្ចុប្បន្ន​​ចង់​​​ឲ្យ​​​ប្រទេស​មាន​បក្ស​តែមួយ។

យ៉ាង​នេះ​ក្ដី លោក សម រង្ស៊ី ប្រធាន​គណបក្ស​ប្រឆាំង​បាន​ផ្ដល់​បទសម្ភាសន៍​ឲ្យ​វិទ្យុ​អាស៊ីសេរី​ដឹង​តាម​ទូរស័ព្ទ​ថា គណបក្ស សម រង្ស៊ី នៅ​តែ​ខ្លាំង និង​មាន​ប្រជាប្រិយភាព បើ​ទោះ​រូប​លោក​មិន​មាន​វត្តមាន​ក្នុង​ប្រទេស​កម្ពុជា បែប​ណា​ក្ដី។

សម្រាប់​លោក​បណ្ឌិត ហង្ស ពុទ្ធា ទីប្រឹក្សា​គ្រប់គ្រង​អង្គការ​និចហ្វិក បាន​ចាត់​ទុក​បុគ្គល សម រង្ស៊ី គឺ​ជា​កោសិកា​មួយ​របស់​គណបក្ស​នេះ ដូច្នេះ​បើ​បាត់បង់​កោសិកា​មួយ​អាច​នាំ​ឲ្យ​គណបក្ស​នេះ​ចុះ​ខ្សោយ​ខ្លះ​ដែរ។

លោក​បណ្ឌិត​ឲ្យ​ដឹង​ថា ការ​មាន​វត្តមាន ឬ​មិន​មាន​វត្តមាន​របស់​លោក សម រង្ស៊ី នៅ​ថ្ងៃ​បោះ​ឆ្នោត​ខាង​មុខ គឺ​មិន​ជា​សំខាន់​ប៉ុន្មាន​ទេ សំខាន់​​ឲ្យ​តែ​មាន​គណបក្ស សម រង្ស៊ី មាន​ឈ្មោះ​ចូល​រួម​ប្រកួត​​ការ​បោះឆ្នោត​ជាមួយ​គណបក្ស​ប្រជាជន​កម្ពុជា កំពុង​កាន់​អំណាច។

បន្ថែម​លើស​ពី​នេះ លោក អ៊ូ វីរៈ ប្រធាន​មជ្ឈមណ្ឌល​សិទ្ធិ​មនុស្ស​កម្ពុជា បាន​ចាត់​ទុក​ការ​ដក​បុព្វសិទ្ធិ និង​សិទ្ធិ​ឈរ​ឈ្មោះ​ជា​តំណាងរាស្ត្រ​របស់​លោក សម រង្ស៊ី ផ្ដើម​ដោយ​រដ្ឋ​សភា​កម្ពុជា គឺ​បាន​ធ្វើ​ផ្ទុយ​ពី​ឆន្ទៈ​​ប្រជាពលរដ្ឋ​ដែល​បាន​បោះ​ឆ្នោត​ឲ្យ​លោក សម រង្ស៊ី ជាប់​ជា​តំណាងរាស្ត្រ​នោះ។

ប្រតិកម្ម​តប លោក ផៃ ស៊ីផាន រដ្ឋលេខាធិការ និង​ជា​អ្នក​នាំ​ពាក្យ​ទីស្ដីការ​គណៈរដ្ឋមន្ត្រី​កម្ពុជា បាន​ថ្លែង​​​ថា រដ្ឋាភិបាល​កម្ពុជា មិន​បាន​រារាំង​លោក សម រង្ស៊ី មិន​ឲ្យ​ចូល​ស្រុក​នោះ​ទេ។ ផ្ទុយ​ទៅ​វិញ ករណី​បុគ្គល​លោក សម រង្ស៊ី គឺ​បាន​ជំពាក់ជំពិន​ជាមួយ​តុលាការ មិន​ពាក់ព័ន្ធ​ជាមួយ​រដ្ឋាភិបាល​នោះ​ទេ។

គួរ​រំឭក​ថា មូលហេតុ​ដែល​នាំ​ឲ្យ​លោក សម រង្ស៊ី មិន​អាច​ចូល​រួម​ការ​ឈរ​ឈ្មោះ​បោះឆ្នោត​បាន​តទៅ​ទៀត ដោយសារ​​កាល​ពី​ថ្ងៃ​ទី​២៩ ខែ​តុលា ឆ្នាំ​២០០៩ មេដឹកនាំ​បក្ស​ប្រឆាំង​រូប​នេះ​បាន​ដឹកនាំ​កសិករ​មួយ​ក្រុម​ទៅ​ដក​តម្រុយ​បង្គោល​ព្រំដែន​​កម្ពុជា-​វៀតណាម​ លេខ​១៨៥ មាន​ទីតាំង​នៅ​ឃុំ​សំរោង ស្រុក​​ចន្ទ្រា ខេត្ត​ស្វាយរៀង ដែល​លោក សម រង្ស៊ី បាន​អះអាង​ថា តម្រុយ​នេះ​ត្រូវ​បាន​​គេ​បោះ​នៅ​លើ​ដី​ស្រែ​ប្រជាកសិករ​នៅ​តំបន់​នោះ។

លោក សម រង្ស៊ី ត្រូវ​រដ្ឋ​សភា​កម្ពុជា ដក​អភ័យ​ឯក​សិទ្ធិ​ជា​តំណាងរាស្ត្រ​ចំនួន​បី​លើក បន្ទាប់​ពី​រូប​លោក​បាន​ចូល​ប្រឡូក​ក្នុង​ឆាក​នយោបាយ។ លើក​ទី​១ ក្នុង​ឆ្នាំ​១៩៩៥ លើក​ទី​២ ឆ្នាំ​២០០៥ និង​លើក​ទី​៣ ចុង​ក្រោយ​នេះ រដ្ឋ​សភា​បាន​ដក​អភ័យ​ឯក​សិទ្ធិ​នៅ​ខែ​វិច្ឆិកា ឆ្នាំ​២០០៩។

បន្ទាប់​ពី​រដ្ឋ​សភា​ដក​អភ័យ​ឯក​សិទ្ធិ​សភា​កាល​ពី​ឆ្នាំ​២០០៩ លោក សម រង្ស៊ី ត្រូវ​បាន​តុលាការ​សាលា​ដំបូង​ខេត្ត​ស្វាយរៀង កាល​ពី​ថ្ងៃ​ទី​២៧​ ខែ​មករា ឆ្នាំ​២០១០ បាន​បើក​សវនាការ​ផ្ដន្ទាទោស​ឲ្យ​ជាប់​​​ពន្ធនាគារ​ចំនួន ២​ឆ្នាំ ចោទ​ពី​បទ​បំផ្លិចបំផ្លាញ​ទ្រព្យ​សម្បត្តិ​សាធារណៈ បន្ទាប់​ពី​លោក​បាន​ដក​តម្រុយ​បង្គោល​ព្រំដែន​កម្ពុជា-​វៀតណាម លេខ​១៨៥ កាល​ពី​ថ្ងៃ​ទី​២៩ ខែ​តុលា ឆ្នាំ​២០០៩។

ក្រោយ​មក​ទៀត លោក សម រង្ស៊ី ត្រូវ​តុលាការ​សាលា​ដំបូង​រាជធានី​ភ្នំពេញ បើក​សវនាការ​កំបាំង​មុខ​ផ្ដន្ទាទោស​ឲ្យ​ជាប់​ពន្ធនាគារ ១0​ឆ្នាំ​បន្ថែម​ទៀត ចោទ​ពី​បទ​ផ្សាយ​ព័ត៌មាន​មិន​ពិត ក្លែង​បន្លំ​ឯកសារ ដោយសារ​រូប​លោក​បាន​ផ្សព្វផ្សាយ​​ផែន​ទី​ដែល​លោក​​អះអាង​ថា កម្ពុជា​បាន​បាត់បង់​ទឹកដី​ទៅ​ខាង​ប្រទេស​វៀតណាម ដោយសារ​ការ​បោះ​តម្រុយ​បង្គោល​ព្រំដែន​​​លេខ​១៨៥៕